Ntacyo rwantwaye! Ubuhamya bw’umwe mu Banyarwanda bahawe urukingo rwa COVID-19

Yanditswe na Nsengiyumva Emmy
Kuya 4 Mutarama 2021 saa 06:52
Yasuwe :
0 0

COVID-19 yashegeshe ubuzima bw’abatuye Isi mu mfuruka zose ndetse yatumye uko abantu babagaho bihinduka mu kwirinda kwanduzanya. Kugeza magingo aya benshi bahanze amaso urukingo nk’amakiriro yo kubafasha guhashya iki cyorezo.

Icyizere cyo gutsinda COVID-19 kiri kwiyongera nyuma y’uko hamaze kuboneka inkingo zitandukanye zanemejwe mu bihugu bitandukanye zimwe zitangira no guhabwa abantu zirimo urwa Pfizer-BioNTech, Moderna na AstraZeneca.

Amatsiko ni yose ku Banyarwanda, bahawe icyizere ko bashobora kurugezwaho muri Werurwe uyu mwaka. Ibibazo bibaza ni byinshi birimo uko aho rwatangiye gutangwa byifashe, uko imibiri y’abaruhabwa irwakira n’ibindi.

Ibihugu byinshi byatangiye gukingira abaturage babwo ndetse abayobozi bakuru babimburiye abandi mu guhabwa urukingo bereka abaturage ko nta mpungenge ruteye.

Nko muri Canada, abaturage batangiye gukingirwa ndetse Jada Hemedi, Umunyarwandakazi w’Umuganga ukorera muri iki gihugu ni umwe mu ba mbere bahawe urukingo rwa COVID-19.

Urukingo ‘BNT162b2’ rukorwa n’Ikigo cya ‘Pfizer and BioNTech’ ni rwo abaturage batangiye guhabwa, haherewe ku bakora muri serivisi z’ubuvuzi.

Jada Hemedi yabwiye IGIHE ko yakingiwe, anakomoza ku makuru akwirakwizwa ko uru rukingo ruri guhabwa abirabura mbere.

Yagize ati "Impamvu narubonye mu ba mbere ni uko nkora ahantu mpurira n’abantu batandukanye barimo n’abarwayi. Twaruhawe turi benshi bakora mu nzego z’ubuvuzi.”

Jada yavuze ko urwo rukingo ruhabwa umuntu ubishaka nta gahato kaba karimo, ndetse ashimangira ko kuva yaruterwa atigeze agira ikibazo.

Ati ”Ntababeshye rwose nta kibazo nigeze ngira. Icyakora ayo magambo y’uko rufite ingaruka uko muyabona aho, na hano [Canada] arahari ndetse atera bamwe gutinya kwikingiza.”

Uyu muganga yavuze ko uru rukingo baruterwa kabiri, kuri we avuga ko afite icyizere ko nyuma yo kuzuza inkingo azaterwa azaba afite ubwirinzi kuri iki cyorezo.

Urukingo rwa COVID-19 rukigera muri Canada rwatangiye gutangwa ku baganga ku ikubitiro mbere yo guhabwa abaturage basanzwe.

Ibinyamakuru byo muri iki gihugu bihamya ko byibuza muri Nyakanga uyu mwaka abaturage bose ba Canada bazaba bamaze gukingirwa.

Nubwo ariko bari gukingirwa COVID-19, ubuyobozi bwa Canada busaba abaturage gukomeza gukurikiza amabwiriza yo kwirinda iki cyorezo.

Yakomeje ati “Umuntu watewe urukingo, azaba akwiye gukomeza kwirinda kuko COVID-19 iracyahari, ni uburyo bwo kwirinda.”

Canada ni kimwe mu bihugu byugarijwe na COVID-19, muri iyi minsi gikomeje guhangana n’iki cyorezo giherutse kongera kubyutsa umutwe. Amabwiriza yo kwirinda COVID-19 yarongeye arakomezwa, ku buryo imirimo myinshi kugeza ubu ifunze.

Muri Canada hamaze kuboneka abantu ibihumbi 607 banduye COVID-19, abayikize ni 509 mu gihe 15,927 bamaze guhitanwa nayo.

Jada yasabye Abanyarwanda gukomeza kwirinda iki cyorezo mu gihe urukingo rutarahagera n’igihe ruzazira ntibaterwe ubwoba n’ibihuha ngo bange kurufata.

Yongeyeho ko urukingo rwa COVID-19 ari kimwe n’izindi zisanzwe zitangwa ku buryo uwo rugwa nabi ari nkuko n’izisanzwe hari igihe zimugiraho ingaruka.

Jada Hemedi, Umunyarwandakazi w’Umuganga ukorera muri Canada ari mu ba mbere bahawe Urukingo rwa COVID-19
Jada Hemedi ari mu Banyarwanda bahawe urukingo rwa COVID-19
Jada Hemedi amaze imyaka 11 muri Canada
Jada Hemedi ahamya ko urukingo yahawe nta ngaruka rwamugizeho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .