00:00:00 IGIHE NETWORK KN KINYARWANDA EN ENGLISH FR FRANCAIS

Minisante yihanangirije abakwirakwiza ubutumwa bushishikariza bagenzi babo kutikingiza COVID-19

Yanditswe na Nsanzimana Erneste
Kuya 4 Ugushyingo 2021 saa 02:03
Yasuwe :
0 0

Minisitiri w’Ubuzima, Dr Ngamije Daniel, yavuze ko Leta itazihanganira abaturage bakomeje gutanga ubutumwa bubuza abaturage kwikingiza icyorezo cya COVID-19.

Ubu butumwa yabutangiye mu Karere ka Karongi kuri uyu wa 4 Ugushyingo 2021, mu gikorwa cyo gushishikariza abaturage kwikingiza icyorezo cya COVID-19.

Dr Ngamije yavuze ko hashize umwaka igikorwa cyo gutanga inkingo z’iki cyorezo gitangiye kandi ngo kugeza ubu nta muturage uragira ikibazo gikomeye.

Yavuze ko bahisemo gutangiriza ubu bukangurambaga mu Ntara y’Iburengerazuba by’umwihariko mu Karere ka Karongi, kuko hagaragara abaturage babuza bagenzi babo kwikingiza iki cyorezo.

Akarere ka Karongi ni kamwe mu tukigaragaramo imibare ijya kuba myinshi y’abandura icyorezo cya COVID-19 mu mirenge imwe n’imwe y’aka karere irimo Gishyita, Murundi na Mubuga.

Ati “Aha hose usanga hari abantu bakwirakwiza amakuru y’ibihuha, ku nkingo kandi bidafite ishingiro. Bakabivanga n’ubutumwa budasobanutse bwo kuvuga ko inkingo zifite uko zangiza umubiri, zifite ukundi kuntu zibangamira imiterere y’umubiri, ibyo byose ugasanga nta shingiro bifite kuko dukoresha inkingo zemewe n’Umuryango w’Abibumbye, zikoreshwa n’ibihugu byateye imbere. Umwaka ugiye gushira dutangiye gutanga izi nkingo nta kibazo kidasanzwe turumva.”

Minisitiri Dr Ngamije avuga ko kwikingiza ari inshingano z’umuturage kandi ko kudakingirwa ari ukubangamira uburenganzira bw’abantu bamuri hafi, kuko ushobora kubanduza iki cyorezo hakaba n’abashobora gupfa.

Ati “Icyo gihe uburenganzira bwawe buba butangiye kuba ikibazo ku burenganzira bw’abandi. Aha rero by’umwihariko muri Karongi, aba bantu bakwirakwiza amakuru adafite ishingiro turashaka kubamagana. Tubamenyesha ko batazihanganirwa kuko ntidushaka ko badusubiza mu bihe tuvuyemo bigoye by’abarwayi benshi bajyaga kwa muganga harimo n’abapfuye, ibihe bidusubiza muri Guma mu Rugo kandi ubuzima bwari butangiye gusubira ku murongo”.

Minisitiri w’Ubutegetsi bw’Igihugu, Gatabazi Jean Marie Vianney, yavuze ko kubuza bagenzi be gufata urukingo bihanirwa, asaba ababikora kubireka.

Ati “Uyu munsi turahura n’abanyamadini n’amatorero yose akorera mu Ntara y’Iburengerazuba, turahura n’abayobozi b’inzego n’abafatanyabikorwa batandukanye kugira ngo badufashe muri ubu bukangurambaga. Kwikingiza ni ukurinda ubuzima. Kwikingiza ni ukwiteganyiriza, kwikingiza bifite inyungu ku muturage, uwazana inyigisho zivuga kutikingiza ubwe aba ashaka gushyira abaturage mu buzima bubi bushobora kuba bwanaganisha no ku rupfu”.

Yakomeje agira ati “Birabujijwe, ubundi ndetse kiranazira, biranahanwa, ababikora nubwo ari bake bwose turabakurikirana ndetse tuzanabafatira ingamba zikomeye”.

Minisitiri Gatabazi yavuze ko mu Karere ka Karongi hari abantu bagiye bajugunya impapuro hirya no hino ziriho ubutumwa bubuza abantu kwikingiza.

Igikorwa cyo gukingira covid19 cyahereye ku bantu bafite ibyago byinshi byo kwandura kurusha abandi kuko bahura n’abantu benshi, hakurikiraho abasaza n’abakecuru, ubu kigeze ku bafite imyaka 18 kuzamura.

Abantu 4.049.590 bamaze guhabwa dose ya mbere y’urukingo rwa Covid-19 mu Rwanda, ibitanga icyizere ko uyu mwaka uzarangira abarenga miliyoni enye bamaze guhabwa inkingo ebyiri. Ni mu gihe abagera kuri 2.098.625 bamaze guhabwa dose ebyiri.

Minisitiri w'Ubuzima, Dr Ngamije Daniel akingira umwe mu baturage bo mu Karere ka Karongi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .