Ingendo ziratangira gusozwa saa Mbili z’umugoroba

Yanditswe na Ferdinand Maniraguha
Kuya 22 Ukuboza 2020 saa 08:48
Yasuwe :
0 0

Kuri uyu wa Kabiri tariki 22 Ukuboza 2020, Abaturarwanda baratangira kubahiriza amabwiriza yo gusoza ingendo saa Mbili z’umugoroba, mu gihe kuva mu ngo bitangira saa Kumi za mu gitondo mu rwego rwo kwirinda Coronavirus.

Ingamba nshya zashyizweho n’Inama y’Abaminisitiri ku wa 15 Ukuboza zigena ko ingendo zibujijwe guhera saa Tatu z’ijoro kugera saa Kumi z’igitondo mu gihe guhera ku wa 22 Ukuboza 2020 amasaha y’ingendo ahinduka aho zizajya ziba zibujijwe guhera saa Mbili z’ijoro, umwanzuro uzageza tariki ya 4 Mutarama 2021. Mu mujyi wa Musanze ho amabwiriza avuga ko ingendo zizajya zihagarikwa saa Moya.

Ni umwanzuro ugamije gufasha Abaturarwanda gukomeza kwirinda muri ibi bihe by’iminsi mikuru yo gusoza umwaka, dore ko umubare w’abandura ukomeje kwiyongera.

Umuvugizi wa Polisi y’u Rwanda, CP John Bosco Kabera, yabwiye RBA ko nubwo ingendo zari zibujijwe guhera saa Tatu z’ijoro, hagiye hagaragara abantu bayarengaho, abibutsa kwisubiraho kuko icyorezo kigihari.

CP Kabera yasabye Abaturarwanda gutegura kare gahunda zabo, kugira ngo amasaha agere batashye.

Ati “Turasaba Abaturarwanda gutegura gahunda zabo neza, buri wese akwiriye kubyuka agategura icyo ari bukore, igihe agikorera, isaha biri butware n’igihe kiri burangirire.”

Kubera ko umuntu ashobora kugira gahunda nyinshi, yavuze ko abantu bakwiriye kumenya guhitamo gukora iby’ingenzi.

CP Kabera kandi yavuze ko abantu bagomba kubahiriza no gutegura igihe bagira mu kazi n’igihe baviramo.

Ati “Abantu bakwiriye kumenya aho bava n’aho bajya gukorera ingendo n’igihe biri bubatware kugaruka mu rugo. Usanga nubwo amasaha yagabanutse, ntabwo icyo kintu abantu bajya bagitekereza.”

Yasabye abafite ibinyabiziga kandi kumenya gukoresha inzira zitandukanye kuko byagaragaye ko hari abafatwa n’amasaha kubera gukoresha imihanda imwe, kandi hari indi itari gukoreshwa.

Ati “Tuributsa Abaturarwanda ko bongera gushyiramo ingamba zikomeye mu kwirinda kwandura no gukwirakwiza COVID-19. Iyo urenze kuri aya mabwiriza, ntabwo COVID-19 igutinya cyangwa ngo ikubahe waba muto cyangwa mukuru.”

Kuri uyu wa Mbere tariki 21 Ukuboza 2020, Minisiteri y’Ubuzima yatangaje ko abantu babiri bahitanywe na Coronavirus , bituma umubare w’abamaze guhitanwa n’iyo ndwara mu Rwanda ugera kuri 65. Ni mu gihe abantu bashya 109 aribo banduye, bituma umubare w’abamaze kwandura guhera igihe icyorezo cyagereye mu Rwanda ungana na 7402.

Polisi y'u Rwanda yasabye abafite ibinyabiziga gukoresha imihanda itandukanye kugira ngo birinde umuvundo ubabuza kugerera mu ngo amasaha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .