00:00:00 IGIHE NETWORK KN KINYARWANDA EN ENGLISH FR FRANCAIS

Ibyo wamenya ku ndwara yo kubira ibyuya ku buryo bukabije

Yanditswe na Mutangana Gaspard
Kuya 2 Mata 2021 saa 08:07
Yasuwe :
0 0

Kubira ibyuya ni bumwe mu buryo karemano umubiri wifashisha usohora imyanda, yaba iba yakomotse ku byo twariye, twanyoye cyangwa se imiti iba yakoreshejwe mu kuvura uburwayi runaka.

Mu kiganiro kirambuye yagiranye na IGIHE, muganga w’indwara z’uruhu mu bitaro bya CHUK, Dr Bazirisa Frida, yasobanuye byinshi kuri ubu burwayi.

Iyo ubira ibyuya ku buryo busanzwe biba ari amahire, ariko iyo umuntu abira ibirenze ibikenewe aba arwaye indwara yitwa Hyperhidrosis.

Impamvu zishobora gukururira umuntu kurwara iyi ndwara ziri mu bice bibiri. Ubwoko bwa mbere, umuntu ashobora kubira ibyuya byinshi bitewe n’imikorere idasanzwe ya kamwe mu duce tw’ubwonko kitwa Hypothalamus.

Aka gace gategeka imvubura z’ibyuya gukora cyane maze umuntu akabira ibyuya birenze ibikenewe, ariko bikaza ku gice runaka cy’umubiri. Ngo icyo gihe nta mpamvu idasanzwe iba ibiteye.

Ubwoko bwa kabiri bw’iyi ndwara, umuntu abira ibyuya byinshi umubiri wose. Icyakora na none, ngo ashobora kubira ibyuya byinshi atari uburwayi ahubwo bigaterwa n’aho ari cyangwa ibyo yakoze.

Mu gihe kandi umuntu ari gukora imirimo y’ingufu, agize amarangamutima nko kwikanga, ashobora kubira ibyuya byinshi.

Umuntu ashobora kubira ibyuya byinshi umubiri wose bitewe n’uko yakoze siporo, ari ahantu hashyuye cyane, yariye ibiryo birimo ibirungo runaka, ariko iyo mpamvu yabiteye yavaho ntibisubire.

Dr Bazirisa yavuze ko bitewe n’uko umubiri w’umubyeyi utwite uba uri gukora cyane, nawe ashobora kubira ibyuya byinshi umubiri wose.

Yavuze ko hari ingaruka zitandukanye zigera ku muntu urwaye kubira ibyuya ku buryo bukabije, zirimo kugira imfunwe, kudakora akazi yari asanzwe akora neza n’ibindi.

Kugira impumuro mbi, bromhidrosis, ni imwe mu ngaruka zikomoka kuri ubu burwayi. Ibi biterwa n’udukoko (bacteria) tuba twaje aho ibyo byuya byiganje, maze bigateza impumuro mbi nko ku birenge mu gihe umuntu akuyemo inkweto zifunze, mu kwaha n’ahandi.

Dr. Bazirisa yavuze ko nibura 99% by’abagira impumuro mbi, baba barwaye Hyperhidrosis. Icyakora ngo n’ubwo urwaye iyi ndwara ashobora kugira impumuro mbi, ntabwo biba bisobanuye ko ari umunyamwanda.

Umuntu ugira impimuro mbi bikomotse kuri Hyperhidrosis, aba akwiye kwambara imyambaro imurekuye, koga kenshi akoresheje amazi meza n’isabune zagenewe kwica udukoko kujya kwa muganga agahabwa imiti, kugira ngo ingaruka z’iyi ndwara zigabanuke.

Dr Bazirisa ati “Ku mubiri w’umuntu haba hariho udukoko. Iyo utu dukoko twihuje n’icyuya umuntu yabize, bibyara impumuro mbi. Nk’umuntu ugira impumuro mbi ku birenge mu gihe akuyemo inkweto, aba akwiye kugira amasogisi menshi akajya ayasimburanya. Hari inkweto zabugenewe ziba zirimo ibitambaro binyunyuza ibyo byuya.”

Dr Bazirisa yagiriye abantu inama ko kujya kwa muganga mu gihe biketseho kubira ibyuya ku buryo budasanzwe, kuko bishobora kuba ikimenyetso cy’ubundi burwayi baba bafite ariko batabizi.

Ati “Hari ubwo biba bigaragaza ko umuntu arwaye diabète, kuba ageze mu gihe cyo guca imbyaro [ku bagore], kugirwaho ingaruka n’inzoga, itabi cyangwa imiti runaka umuntu yakoresheje n’ibindi.”

Bishobora kandi kuba ikimenyetso cy’uko imvubura ikorana bya hafi n’ubwonko, umutima n’ibindi bice by’umubiri kandi ikangenzura ubushyuhe bw’umubiri irwaye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .