Ibintu bishobora kudogera mu Burayi kubera ubwiyongere bwa Coronavirus

Yanditswe na Umwali Zhuri
Kuya 8 Nzeri 2020 saa 03:51
Yasuwe :
0 0

Ubwoba ni bwose ku bihugu by’i Burayi kuko bikomeje kwibasirwa na Coronavirus mu gihe hari icyizere ko iki cyorezo kiri gukendera ku Isi yose. Ubu umwaduko wa Coronavirus uri kugaragara mu Bufaransa, u Budage n’u Bwongereza.

Ubwo iki cyorezo cyigabizaga Isi, ibihugu byinshi byafashe ingamba zirimo na gahunda ya Guma mu Rugo mu kwirinda ko gikwirakwira. Ubu ibintu biri guhinduka ugereranyije n’uko muri Werurwe na Mata byari bimeze, impfu ziri kwiyongera buhoro buhoro.

Mu Bufaransa ku wa Mbere w’iki Cyumweru, umubare w’ubwandu wariyongereye ugera ku 4203. Ku wa Gatanu w’icyumweru gishize, ubwandu bwabaye ibihumbi bitandatu, umubare wari hejuru y’ubwagiye bugaragara mu minsi imwe n’imwe muri Mata na Werurwe.

Minisitiri w’Ubuzima mu Bufaransa, Olivier Veran, yatangaje ko bishoboka ko mu minsi mike iri imbere hashobora kuboneka impfu nyinshi n’abantu benshi bajya mu bitaro.

Mu masaha 24 ashize, u Budage bwagaragayemo abantu 1898 banduye, ni benshi ugereranyije n’abagaragaraga muri Mata.

Mu Bwongereza naho ni uko, abantu bagera ku bihumbi bitatu nibo banduye ku wa Mbere w’iki cyumweru ndetse kuva muri Gicurasi, imibare y’ubwandu iriyongera, aho inzego z’ubuzima zigaragaza ko hari ukwidegembya cyane ku buryo abantu barenze ku mabwiriza yo kwirinda iki cyorezo bigatuma icyorezo kigera kure.

Minisitiri w’Ubuzima mu Bufaransa asobanura ko ubwiyongere bw’icyorezo cya Coronavirus budatewe no kuba mu gihugu hari gufatwa ibipimo byinshi. Impamvu ihurirwaho hose ni uko amabwiriza yo kwirinda abantu bayajenjekeye.

Mu Burayi abamaze kwandura barenga miliyoni 3,7 mu gihe abamaze gupfa bo ari ibihumbi 209 muri Amerika ya Ruguru ho barenga 7,6 mu gihe abapfuye bo ari ibihumbi 280.

Muri Aziya, abamaze kwandura ni miliyoni 7,7 mu gihe abamaze gupfa bo ari ibihumbi 152. Muri Amerika y’Epfo abamaze kwandura ni miliyoni 6,7 mu gihe abamaze gupfa ni ibihumbi 212.

Ku mugabane wa Afurika niho hari ubwandu buke kuko abamaze kwandura ni miliyoni 1,3 naho abamaze gupfa ni 31357.

Ubwiyongere bwa Coronavirus mu bihugu by'u Burayi bituruka ahanini mu kudohoka ku ngamba zashyizweho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .