00:00:00 IGIHE NETWORK KN KINYARWANDA EN ENGLISH FR FRANCAIS

Hatabayeho gukomeza gukaza ingamba ishobora kutuzamukana- Dr Mpunga avuga kuri COVID-19

Yanditswe na Dufitumukiza Salathiel
Kuya 14 Nzeri 2021 saa 06:55
Yasuwe :
0 0

Umunyamabanga wa Leta muri Minisiteri y’Ubuzima,Dr Mpunga Tharcisse, yibukije Abaturarwanda ko COVID-19 igihari ndetse ko hatabayeho gukomeza gukaza ingamba ishobora kongera gukaza umurego.

Mu kiganiro yagiranye na Radio Rwanda ku wa 13 Nzeri 2021, Dr Mpunga yavuze ko muri rusange hamaze guterwa intambwe ishimishije mu guhangana n’icyorezo ariko ko hadakwiye kubaho kwirara.

Ati “Hari aho imibare igenda igabanuka ariko hari n’aho bagifite abarwayi benshi ubona ubwandu bukiri hejuru cyane cyane mu turere dutuye ku mipaka mu Burasirazuba, mu Majyepfo ariko no mu Majyaruguru naho harahari.”

Raporo ngarukamunsi yasohowe na Minisante kuri iyo tariki igaragaza ko mu karere ka Gicumbi ari ho habonetse abanduye Coronavirus bashya benshi aho bageze kuri 67. Gakurikiwe na Karongi yabonetsemo 57, Kirehe 47 , Nyagatare 34 na Ngororero 34.

Uturere twa Bugesera, Kamonyi, Kayonza, Ngoma na Ruhango ho nta murwayi mushya wahabonetse.
Dr Mpunga yavuze ko magingo aya hakiboneka abajyanwa kwa muganga n’abahitanwa n’icyorezo, bityo ko gukomeza kwitwararika haba ku wakingiwe n’utarakingirwa ari ngombwa.

Icyakora imibare yerekana ko abarembye n’abahitanwa n’icyorezo baganuka. Nko muri iyo raporo ni batatu bitabye Imana, batanu aba ari bo bajyanwa mu bitaro naho abarembye ni 19.

Yakomeje ati “Ariko hatabayeho gukomeza gukaza ingamba zo kwirinda n’igihe cyo dukingira ishobora kongera kutuzamukana.”

Abaturarwanda 1.822.054 bamaze guhabwa dose ya mbere y’urukingo naho 1.000.439 bakingiwe byuzuye. Minisiteri y’Ubuzima yatangaje ko kuri uyu wa 14 Nzeri 2021 irakomeza gutanga dose ya kabiri ku bahawe iya mbere bamaze iminsi 21 n’abayirengeje bacikanywe.

Dr Mpunga yasobanuye ko mu bice by’igihugu biri kugaragaramo ubwandu bwinshi, hari kongerwa ubukangurambaga bwo kwirinda icyorezo ku bufatanye n’inzego z’ibanze, hakongerwa ibikorwa by’ikigingira ndetse hakanapimwa benshi harebwa niba bugabanuka cyangwa bukomeza kwiyongera.

“Uwakingiwe agomba kumva ko afite uruhare mu kurinda utarakingirwa…”

Nk’uko imibare ya Minisante ibyerekana, Abaturarwanda benshi ntibarahabwa urukingo rwa Coronavirus. Ikindi uwakingiwe ashobora kuyandura no kuyanduza ndetse nubwo ibyago byo kumurembya no kumuhitana ari bike ugereranyije n’utarakingiwe ariko nawe byamubaho. Na none abenshi bahawe dose imwe ku buryo ubudahangarwa bukiri hasi.

Dr Mpunga yavuze ko kuba umuntu yarakingiwe bidakwiye gutuma adohoka ku ngamba z’ubwirinzi cyane ko abatarakingirwa bamwanduza.

Ati “Ikindi abakingiwe benshi ntibarabona urukingo rwa kabiri, bivuze ko nabo n’ubudahangarwa bwitezwe bagomba kuba bafite ntibarabubona.”

“Uwakingiwe navuga ko ari amahirwe yagize si uko hari ikindi gitangaza yakoze. Nawe yagombye kumva ko afite uruhare rukomeye cyane mu kurinda utarakingirwa kuko na we ntabwo ari we ni uko inkingo zitaragera ku bantu bose. ”

Yakomeje avuga ko kwitwaza ko wakingiwe ugakomeza kudohoka mu gihe ibikorwa byinshi byafunguwe, bibangamira ingamba Leta yashyizeho zo guhangana na COVID-19, bikaba byanakoma mu nkokora ibimaze kugerwaho mu kuyihashya.

Dr Mpunga yavuze ko kuba umuntu yarakingiwe bidakwiye gutuma adohoka ku ngamba z’ubwirinzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .