Coronavirus kuwa 14 Mata: Abantu barenga 1500 bapfuye muri Amerika ku munsi umwe

Yanditswe na Habimana James
Kuya 14 Mata 2020 saa 09:50
Yasuwe :
0 0

Abantu 1509 nibo bapfuye muri Leta Zunze Ubumwe za Amerika bazize icyorezo cya Coronavirus mu masaha 24, bituma abamaze gupfa muri iki gihugu bagera ku 23644 naho 587173 bamaze kwandura.

Ku rwego rw’Isi, abantu 1925877 bamaze kwandura naho 119719 bamaze gupfa naho 452333 barakize.

Guverineri wa Leta ya New York ari nayo ifite abantu benshi bamaze gupfa muri iki gihugu, Andrew Cuomo , yanenze mu buryo bukomeye Perezida Donald Trump watangaje ko abayobozi ba za leta bagomba kuvanaho ibihe bidasanzwe.

Yagize ati “Amerika ifite itegeko nshinga, ntabwo Trump ari Umwami.”

Kuri uyu wa Mbere mu kiganiro n’abanyamakuru, Trump yari yatangaje ko ibiro bye bifite ubushobozi bwose bwo kuvanaho ihagarikwa ry’ibikorwa mu bihugu kubera Coronavirus.

Trump yagize ati “Iyo umuntu ari Perezida wa Leta Zunze Ubumwe za Amerika, aba afite ubushobozi bwose.”

Mu Buhinde, Minisitiri w’Intebe, Narendra Modi, nawe yategetse ko ibihe bidasanzwe mu gihugu byongerwa bikageza tariki 3 Gicurasi 2020 kugira ngo icyorezo cya Coronavirus gikomeze kurwanywa.

Gusa yavuze ko muri leta zimwe aho bigaragara ko bakirwanyije, ibikorwa by’ibanze bishobora gukorwa.

Abantu 10541 nibo bamaze kwandura muri iki gihugu mu gihe 358 bamaze gupfa.

Ibindi bihugu bifite abanduye ndetse n’abapfuye benshi, ni nka Espagne ifite abantu 170099 bamaze kwandura naho 17756 bamaze gupfa, u Butaliyani bufite abanduye 159516 mu gihe 20465 bamaze gupfa.

Mu Bufaransa abantu 136779 bamaze kwandura, abandi 14967 bamaze gupfa.

U Budage bwo bufite abanduye 130072 mu gihe 3194 bapfuye, u Bwongereza bufite abanduye 88621 ariko abamaze gupfa ni 11329.

Ku Mugabane wa Afurika, abantu 15944 nibo bamaze kwandura Coronavirus. Abamaze gupfa ni 838, abakize ni 3045.

Afurika y’Epfo niyo imaze kugira benshi banduye kuko ari 2272 mu gihe abamaze gupfa ari 27, ikurikirwa na Misiri ifite abanduye 2190 abapfuye ni 164.

Algeria niho hamaze gupfa abantu benshi muri Afurika kuko ari 313 mu gihe abamaze kwandura ari 1983.

Muri Afurika y’Iburasirazuba, muri Kenya habonetse abanduye 208 mu gihe abamaze gupfa ari icyenda, mu Rwanda hamaze kuboneka abantu banduye 127 abamaze gukira ni 42, Uganda habonetse 54, muri Tanzania hamaze kuboneka abantu 49 hamaze gupfa batatu, mu Burundi habonetse batanu hamaze gupfa umwe mu gihe muri Sudani y’Epfo ari bane.

Abamaze kwandura Coronavirus ku Isi bagiye kugera kuri miliyoni ebyiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .