Coronavirus ku wa 22 Gicurasi: Abanduye ku Isi bongeye kurenga ibihumbi 100 umunsi umwe

Yanditswe na Habimana James
Kuya 22 Gicurasi 2020 saa 09:17
Yasuwe :
0 0

Nyuma y’aho ku wa Gatatu tariki 20 Gicurasi Ishami ry’Umuryango w’Abibumbye ryita ku Buzima, OMS, ryari ryatangaje ko abanduye icyorezo cya Coronavirus umunsi umwe ku Isi bari ibihumbi 106, kuri uyu wa Kane biyongereye baba ibihumbi 107.

Iyi mibare ikomeje kwiyongera mu gihe ibihugu hirya no hino ku Isi bikomeje koroshya ingamba zo kuguma mu rugo hirindwa ko iki cyorezo gikomeza gukwira.

OMS kandi yatangaje ko kuri uyu wa Kane, abantu 4 926 aribo bapfuye ku Isi. Ibi byatumye abamaze kwandura baba 5197863 naho abandi 334680 nibo bamaze gupfa.

Brésil yabaye igihugu cya gatandatu ku Isi gifite umubare w’abantu barenze ibihumbi 20 bapfuye kubera Coronavirus, ni nyuma y’aho kuri uyu wa Kane gipfushije abagera ku 1200.

U Bwongereza nabwo bwatangaje ko bwafashe ingamba zikomeye ku bantu binjira mu gihugu, ntibubahirize amabwiriza yo kwishyira mu kato.

Buvuga ko mu gihe uwo muntu azaba atahuwe ko atagiye mu kato k’iminsi 14, azajya acibwa amande y’amapawundi 1000, arenga miliyoni y’amafaranga y’u Rwanda.

Muri Leta Zunze Ubumwe za Amerika, kuri uyu wa Kane bapfushije abantu barenga 1418, abandi barenga ibihumbi 28 barandura.

Ibi byatumye abamaze kwandura Coronavirus muri iki gihugu baba 1620902, naho abandi ibihumbi 96 354 bamaze gupfa.

Leta Zunze Ubumwe za Amerika nizo zikomeje kuza imbere mu kugira umubare munini w’abanduye n’abamaze gupfa ku Isi, u Burusiya buri ku mwanya wa Kabiri mu banduye kuko ari 317554, hamaze gupfa 3 099.

Brésil iza ku mwanya wa gatatu kuko ifite abanduye 310 921 hamaze gupfa 20 082, muri Espagne handuye 280 117, hamaze gupfa 27 940, mu Bwongereza handuye 250 908, hamaze gupfa 36 042.

Ku mugabane wa Afurika wose hamaze kugaragara abantu 101 901 banduye Coronavirus, abamaze gupfa basaga 3 115 naho abakize ni 40 641.

Afurika y’Epfo iri imbere mu kugira abafite ubwandu benshi kuko ari 19 137, abamaze gupfa ni 369, ikurikirwa na Misiri ubu ifite abamaze gupfa benshi kuri uyu mugabane, kuko bageze kuri 696 naho abamaze kwandura ni 15 003.

Muri Afurika y’Iburasirazuba, kugeza ubu igihugu kiza imbere mu bwandu bwinshi ni Kenya kuko hamaze kwandura 1 109 hapfuye 50, Tanzania iza ku mwanya wa kabiri, kuko handuye 509 hapfuye 21.

U Rwanda rufite abanduye 320, abamaze gukira ni 217, muri Uganda ubu hari abanduye 160, mu Burundi handuye abantu 42 hapfa umwe naho muri Sudani y’Epfo hamaze kwandura abantu 481 hamaze gupfa bane.

Umubare w'abandura Coronavirus ukomeje kwiyongera ku Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .