Coronavirus ku wa 12 Kamena: U Buhinde bwaciye k’u Bwongereza mu kugira ubwandu bwinshi

Yanditswe na Habimana James
Kuya 12 Kamena 2020 saa 09:24
Yasuwe :
0 0

Ishami ry’Umuryango w’Abibumbye ryita ku Buzima, OMS, ryagaragaje ko ubu igihugu cy’u Buhinde cyaje mu bihugu bitanu ku Isi byugarijwe na Coronavirus, ni nyuma y’aho kuri uyu wa Kane hagaragaye abantu 11 128 banduye umunsi umwe, abandi 394 bagapfa.

Minisiteri y’Ubuzima mu Buhinde, yatangaje ko Umurwa Mukuru, Delhi ariwo wagaragayemo ubwandu bwinshi kuko bugera ku 1 877.

OMS kandi yatangaje ko abandura Coronavirus ku Isi bakomeje kwiyongera, kuko mu gihe ku wa Gatatu hari handuye abantu 136 547, kuri uyu wa Kane handuye 137 786.

Brésil iracyari mu bihugu byugarijwe cyane na Coronavirus, kuri uyu wa Gatatu hagaragaye ubwandu bushya 30 465 mu gihe abapfuye ari 1 261.

Leta Zunze Ubumwe za Amerika zo zapfushije abantu 904 mu gihe abanduye ari 23 300.

Ku rwego rw’Isi, OMS ivuga ko abamaze kwandura ari 7 598 201, abamaze gupfa ni 423 866 mu gihe abamaze gukira ari 3 842 805.

Leta Zunze Ubumwe za Amerika nizo zikomeje kuza imbere mu kugira umubare w’abanduye n’abamaze gupfa benshi, kuko abanduye ari 2 089 701, abamaze gupfa bo ni 116 034. Brésil iza ku mwanya wa Kabiri aho ifite abanduye 805 649 naho abamaze gupfa ni 41 058, u Burusiya buza ku mwanya wa Gatatu kuko bufite abanduye 502 436, hamaze gupfa 6 532.

U Buhinde bwaje ku mwanya wa kane kuko hamaze kwandura 298 283, hamaze gupfa 8 501. Mu Bwongereza handuye 291 409, hamaze gupfa 41 279.

Ku mugabane wa Afurika hamaze kugaragara abantu 219 502 banduye Coronavirus, abamaze gupfa ni 5 881 naho abakize ni 100 787.

Afurika y’Epfo iri imbere mu kugira abafite ubwandu benshi kuko ari 58 568, abamaze gupfa ni 1 284, ikurikirwa na Misiri ubu ifite abamaze gupfa benshi kuri uyu mugabane kuko bageze kuri 1 377 naho abamaze kwandura ni 39 726.

Muri Afurika y’Iburasirazuba, Kenya ni cyo gihugu cyugarijwe cyane kuko hamaze kwandura abantu 3 215, hapfuye 92.

U Rwanda rufite abanduye 494, hamaze gupfa abantu babiri ariko hamaze gukira abandi 313, muri Uganda hari abanduye 679, Tanzania ifite abanduye 509 hamaze gupfa 21, mu Burundi handuye abantu 85 hapfa umwe naho muri Sudani y’Epfo hamaze kwandura abantu 1 670, hamaze gupfa 24.

Mu bihugu bihana imbibi n’u Rwanda, Repubulika Iharanira Demokarasi ya Congo niyo yibasiwe cyane, kuko ubu ifite abanduye 4 515 barimo 98 bamaze gupfa.

U Buhinde bwaje mu bihugu bitanu ku Isi byugarijwe na Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .