Amavuriro yigenga yemewe yatangiye gupima COVID-19

Yanditswe na Umwali Zhuri
Kuya 17 Ukuboza 2020 saa 08:41
Yasuwe :
0 0

Ikigo cy’Igihugu cy’Ubuzima, RBC, cyatangaje ko amavuriro yigenga yemewe, yahawe uburenganzira bwo gutangira gupima icyorezo cya COVID-19, aho uburyo azajya akoresha butanga ibisubizo mu minota 15 gusa.

Ubusanzwe gupima COVID-19 byakorwaga n’ibigo bya leta cyangwa se n’abandi bakozi ba Minisiteri y’Ubuzima babihuguriwe bari hirya no hino mu gihugu. Ntabwo ibigo byigenga byatangaga iyi serivisi.

Gusa kuri ubu, RBC yatangaje ko amavuriro yigenga yemewe, guhera kuri uyu wa 17 Ukuboza 2020 yemerewe gupima COVID-19 agatanga ibisubizo mu minota 15 hakoreshejwe uburyo buzwi nka “Antigen Rapid Tests”.

Antigen Rapid Test ni uburyo bwo gupima COVID-19 ibisubizo bikaboneka mu minota itarenze 15. Bufasha cyane ku bantu bafite ibimenyetso bya COVID-19, ariko ntabwo bukoreshwa ku bifuza gukora ingendo.

Mu butumwa iki kigo cyanyujije kuri Twitter, cyagize kiti “Mu rwego rwo kugeza serivisi zo gupima COVID-19 kuri benshi, turamenyesha abantu bose ko guhera ku wa 17 Ukuboza 2020 amavuriro yigenga yemewe azatangira gupima abayagana COVID-19 akoresheje Antigen Rapid Tests hakurikijwe amabwiriza ya Minisiteri y’Ubuzima.”

Uburyo busanzwe bukoreshwa mu gupima iki cyorezo bwo umuntu apimwa mu kanwa akabona ibisubizo mu gihe kitarenze amasaha 24 ariko ubu buryo butanga ibisubizo by’ako kanya, umuntu apimwa mu mazuru yombi aho umuganga acengezamo akantu (mu iry’iburyo n’iry’ibumoso) hanyuma amatembabuzi avuyemo akayashyira ku gakoresho kabugenewe ubundi agatonyangirizaho umuti ari nako kamuha ikimenyetso cy’uko umuntu ari muzima cyangwa ko yanduye.

U Rwanda rukomeje gufata ingamba zose zigamije gukumira ikwirakwira ry’icyorezo cya COVID-19 nyuma y’aho ubwandu bwongeye gufata indi ntera. Mu minsi itanu ishize, abantu 526 nibo banduye iki cyorezo, ni umubare munini ugereranyije n’uko byari bimeze mu minsi yashize.

Ikizamini cya COVID-19 gikoreshejwe “Antigen Rapid Test” gikorwa umuntu acengezwa akantu mu mazuru hanyuma amatembabuzi avuyemo agashyirwa ku gakoresho kabugenewe ari nako kerekana ko ari muzima cyangwa se ko arwaye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .