Abashoferi 6 basanganywe Coronavirus mu Rwanda, abakize biyongeraho 1 baba 217

Yanditswe na Ishimwe Israel
Kuya 21 Gicurasi 2020 saa 07:53
Yasuwe :
0 0

Abantu batandatu batwara amakamyo yambukiranya imipaka basanzwemo Coronavirus mu Rwanda kuri uyu munsi mu gihe umwe yasezerewe mu bitaro nyuma yo gukira.

Abarwayi bashya basanganywe ubwandu bwa Coronavirus bose ni ‘abashoferi n’abakorana na bo’. Aba bose bakuwe ku Mupaka wa Rusumo uhuza u Rwanda na Tanzania.

Bahise bashyirwa ahabugenewe kugira bitabweho ndetse ntibagire abandi bantu banduza.

Itangazo rya Minisiteri y’Ubuzima ryo kuri uyu wa Kane, ryagaragaje ko undi muntu umwe yakoze Coronavirus, asezererwa mu bitaro.

  • Abanduye ni 320 (barimo batandatu bashya)
  • Abakize ni 217 (barimo umwe mushya)
  • Abakirwaye ni 103
  • Nta muntu uritaba Imana
  • Ibipimo bimaze gufatwa ni 54 400 (birimo 1083 bishya)

Umurwayi wa mbere mu Rwanda yabonetse ku wa 14 Werurwe 2020, yari Umuhinde ukorera rimwe mu mashami ya Loni mu gihugu wari uvuye mu Mujyi wa Mumbai.

Ku wa 5 Mata 2020, nibwo bane ba mbere barimo Abanyarwanda batatu n’Umurundi umwe basezererwaga aho bari barwariye mu Kigo Nderabuzima cya Kanyinya. Kuva icyo gihe hamaze gukira 217 mu bantu 320 banduye. Abakiri kwa muganga ni 103.

Kuva mu minsi ishize icyiciro cy’abatwara amakamyo yambukiranya imipaka cyatangiye kubonekamo abarwayi benshi ndetse byanatumye hakazwa ingamba zo gupima no kwita ku bakora mu bwikorezi bw’ibicuruzwa n’ibikoresho byambukiranya imipaka.

Abenshi muri bo ni abava muri Tanzania bajyanye ibicuruzwa mu Rwanda. Muri Tanzania habarurwa abarwayi ba Coronavirus 509, abagera ku 183 bamaze gukira mu gihe 21 yabahitanye.

Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 5 141 142 bamaze kuyandura ku Isi yose, barimo 331 732 yahitanye na 2 051 407 bamaze kuyikira.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, guhana intera ya metero, kwambara udupfukamunwa n’amazuru mu gihe umuntu avuye mu rugo cyangwa agiye ahari abantu benshi.

Abashoferi batandatu basanganywe Coronavirus mu Rwanda, abakize biyongeraho 1 baba 217

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .