Abantu 11 bakize Coronavirus, abayanduye mu Rwanda biyongeraho umwe baba 287

Yanditswe na Ishimwe Israel
Kuya 13 Gicurasi 2020 saa 08:13
Yasuwe :
0 0

Umuntu umwe yasanganywe Coronavirus mu bipimo 866 byafashwe uyu munsi bituma umubare w’abanduye mu Rwanda ugera ku 287, mu gihe abamaze gukira biyongereyeho 11 baba 164.

Itangazo rya Minisiteri y’Ubuzima ryo ku mugoroba wo kuri uyu wa 13 Gicurasi 2020 rivuga ko mu bantu 284 banduye mu bipimo 44 245- kuva uwa mbere agaragaye ku wa 14 Werurwe 2020- ‘‘abakize ari 164 [umwe mushya], abakirwaye ni 123 mu gihe nta n’umwe urapfa.’’

Kuri ubu umubare w’abamaze gukira Coronavirus mu Rwanda uraruta abarwaye, kuko ari 164 ku 123. Ni imibare ubu itanga icyizere, niba atari nk’icyatangiye kubaho ku wa 19 Mata ubwo ku nshuro ya mbere abakize barutaga abakirwaye, mbere y’uko haza amahindura yatewe n’abashoferi b’amakamyo.

Kugeza ku wa Kabiri, imibare igaragaza ko aharimo gusangwa Coronavirus hakiri “mu bashoferi bambukiranya imipaka n’abo bahuye nabo”, nk’uko bishimangirwa n’Umuyobozi Mukuru w’Ikigo cy’Igihugu Gishinzwe Ubuzima, Dr Nsanzimana Sabin.

Bitandukanye no mu minsi yashize ubwo humvikanaga ko umuntu wanduye yasanzwe muri ‘quartier’ runaka nk’uko byagenze mu Gatenga cyangwa i Gicumbi, uwanduye akajyanwa mu bitaro n’abo bahuye bagashyirwa mu kato.

Ubu abarimo gusangwamo ubwandu ni abarimo gufatirwa ku mupaka, bagashyirwa mu kato, bagapimwa.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, guhana intera ya metero, kwambara udupfukamunwa mu gihe umuntu avuye mu rugo cyangwa ahuye n’abantu benshi mu nsisiro cyangwa ahatuye imiryango myinshi.

Ishami ry’Umuryango w’Abibumbye ryita ku Buzima (OMS) ryemeje ku wa 11 Werurwe 2020 ko Coronavirus ari icyorezo cyugarije Isi bitewe n’ubwiyongere bw’abayandura.

Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 4 396 222 bamaze kuyandura ku Isi yose, barimo 295 745 yahitanye na 1 637 705 bamaze kuyikira.

Abantu 11 bakize Coronavirus, abayanduye mu Rwanda biyongeraho umwe baba 287

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .