Abantu 10 bakize Coronavirus, abayanduye mu Rwanda biyongeraho umwe baba 285

Yanditswe na Ishimwe Israel
Kuya 11 Gicurasi 2020 saa 08:39
Yasuwe :
0 0

Abantu 10 basezerewe mu bitaro nyuma yo gusuzumwa bagasangwa barakize Coronavirus mu gihe umuntu umwe yasanganywe ubwandu bwayo mu bipimo 380 byafashwe kuri uyu munsi.

Kuva umurwayi wa mbere wa COVID-19 iterwa n’agakoko ka Coronavirus agaragaye ku butaka bw’u Rwanda, hamaze kuboneka abantu 285 bayanduye mu bipimo 42 805.

Ku wa 14 Werurwe 2020 nibwo u Rwanda rwemeje ko umurwayi wa Mbere wa Coronavirus yageze mu gihugu, yari Umuhinde wari uturutse mu Mujyi wa Mumbai.

Mu basanganywe Coronavirus uko ari 285, muri bo 150 barasezerewe nyuma yo gusuzumwa bagasangwa nta bwandu bagifite.

  • Abanduye ni 285 (barimo umwe mushya)
  • Abakize ni 150 (barimo 10 bashya)
  • Abakirwaye ni 135
  • Nta muntu uritaba Imana
  • Ibipimo bimaze gufatwa ni 42 805 (birimo 380 bishya)

Kugeza ubu umubare w’abakize [150] niwo munini kurusha uw’abakirwariye [135] mu bitaro byagenewe kwita ku banduye Coronavirus.

Abantu bane ba mbere barimo Abanyarwanda batatu n’Umurundi umwe bagaragaweho Coronavirus mu Rwanda basezerewe aho bari barwariye mu Kigo Nderabuzima cya Kanyinya ku wa 5 Mata 2020. Basezerewe nyuma yo gukorerwa ibizamini bibiri bikerekana ko nta Coronavirus ikiri mu mubiri wabo.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Abaturarwanda basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, guhana intera ya metero, kwambara udupfukamunwa mu gihe umuntu avuye mu rugo cyangwa ahuye n’abantu benshi mu nsisiro cyangwa ahatuye imiryango myinshi.

Ishami ry’Umuryango w’Abibumbye ryita ku Buzima (OMS) ryemeje ku wa 11 Werurwe 2020 ko Coronavirus ari icyorezo cyugarije Isi bitewe n’ubwiyongere bw’abayandura.

Coronavirus yagaragaye bwa mbere mu Mujyi wa Wuhan mu Bushinwa mu Ukuboza 2019; kuri ubu 4 232 351 bamaze kuyandura ku Isi yose, barimo 285 743 yahitanye na 1 517 483 bamaze kuyikira.

Abantu 10 bakize Coronavirus, umubare w’abayanduye mu Rwanda wiyongeraho umwe uba 285

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .