00:00:00 IGIHE NETWORK KN KINYARWANDA EN ENGLISH FR FRANCAIS

Uruhare rw’inzoga mu kwangiza ubwonko bw’umuntu utaruzuza imyaka 21

Yanditswe na Igizeneza Jean Désiré
Kuya 22 Ukuboza 2022 saa 09:44
Yasuwe :

Nubwo inzoga zinyobwa n’abatari bake ndetse bakavuga ko zibafasha kwishima no gusabana n’inshuti n’abavandimwe, iyo zinyowe n’umuntu utaruzuza imyaka 21 zimwangiriza ubwonko bikaba byaganisha no ku rupfu, ibyari ibyishimo bigahinduka amarira.

Hari abavuga ko zituma umuntu yishima ndetse zikabamo alukoro (alcool) umubiri ukenera, nyamara bishobora kuboneka inzoga zitabigizemo uruhare.

Umukozi mu Kigo cy’Igihugu cyita ku Buzima, RBC, mu Ishami rishinzwe kurwanya ibiyobyabwenge, Ndacyayisenga Dynamo, avuga ko ubwonko bw’umuntu cyane igice cyabwo cya cortex frontal gikura kugera ku myaka 21, kandi ni nacyo gifasha mu kwibuka no kugenzura amarangamutima.

Ati “Iki gice kimufasha no kwibuka ibyo yafashe cyangwa yize mu minsi yashize bijyana n’uko ari cyo gifasha umuntu gukora akoresha ubwenge. Iyo uhaye umuntu uri munsi y’imyaka 21 inzoga icyo gice ntigikura, ibituma agwingira."

Mu ndwara zishobora kwibasira umuntu unywa inzoga harimo na kanseri y’umwijima.

Imibare ikagaragaza ko abarenga ibihumbi 800 bahitanwa na kanseri y’uru rugingo buri mwaka.

Ndacyayisenga akavuga ko uretse kurwaya kanseri, n’itembera ry’amaraso rikorwa mu buryo budakwiriye kubera inzoga.

Ati “Usazanga itembera ry’amaraso rya bariya bantu [banywa inzoga] rikorwa nabi ku buryo bishobora no kumukururira umuvuduko w’amaraso kubera ko umubiri ukoresha ingufu zidasanzwe kugira ngo umubiri uyakure mu mutima ujya kuyayungururira mu mwijima.”

Akomeza avuga ko uyu mwana muto ukoresha inzoga kandi n’uwo mwijima utarakura, imitemberere y’amaraso ye yangirika ndetse n’umwijima ugogora inzoga ukanayungurura amaraso na wo ukangirika.

Bijyanye n’uko abantu bagiye kujya mu minsi minsi mikuru, Ndacyayisenga atanga inama ko abantu bakwiriye kwitonda “kuko ubuzima burahenda, ntibukwiriye kuguranwa ibyishimo by’umunsi umwe ngo ejo nyirabwo azabe ahura n’indwara yatewe n’inzoga.”

Anakebura abakuru ko batagomba kunywera inzoga aho abana bareba cyane ko hari ahagenewe kunywera inzoga, aho kuzinywera mu rugo kuko bishobora gushyira ubuzima bw’umwana mu kaga, cyane ko inzoga itarera.

Mu nama y’Ihuriro rya 15 ry’Umuryango Unity Club Intwararumuri yabaye ku itariki ya 12 Ugushyingo 2022, iki ikibazo cyakomojweho ku buryo abayitabiriye banasabye kongera imyaka yo kwemererwa kunywa inzoga mu Rwanda, ikava kuri 18 ikajya kuri 21.

Basabye ibi mu gihe imibare iheruka y’ibitaro bivura indwara zo mu mutwe bya Caraes Ndera, yerekana ko mu mwaka wa 2021/2022 bakiriye abarwayi 96.357, aho abasaga 70% ari urubyiruko rufite ibibazo byakomotse ku biyobyabwenge n’inzoga.

Raporo y’Umuryango mpuzamahanga wita ku Buzima, OMS, yo mu 2018, yagaragaje ko u Rwanda ruza ku mwanya wa kabiri mu karere mu kugira abantu banywa inzoga nyinshi.

Nibura ngo abantu bafite hejuru y’imyaka 15 mu Rwanda, umuntu umwe ku mwaka anywa litilo 9 za alukoro itavangiye.

Imibare ya OMS kandi igaragaza ko nibura buri mwaka, abantu miliyoni eshatu ku Isi bapfa biturutse ku mpamvu zatewe n’inzoga, bangana na 5.3% by’impfu zose zibaho ku mwaka.

Mu rubyiruko ruri hagati y’imyaka 20 na 29, OMS ivuga ko 13.5 % by’impfu z’abari muri iyo myaka ziterwa no kunywa inzoga.

Uwanyoyeye inzoga akiri muto ashobora gutakaza ubushobozi bwo gufata ibyemezo, aho usanga umuntu ahubuka cyangwa agakoreshwa n’amarangamutima akaba yakwangiriza byinshi.

Inzoga zinyowe n'utaruzuza imyaka zimukururira indwara zitandukanye kuko ibice by'umubiri we biba bigikeneye gukura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .