Umugore yakoresheje umuti urengeje urugero umubiri we uhinduka ubururu

Yanditswe na Ndayikunda Josué
Kuya 21 Nzeri 2019 saa 12:00
Yasuwe :
0 0

Umugore w’imyaka 25 yajyanywe igitaraganya kwa muganga afite ikibazo cyo gucika intege mu mubiri, umunaniro no kubura umwuka, ndetse umubiri we wari watangiye kuba ubururu.

Nkuko ikinyamakuru The New England Journal of Medicine kibitangaza, uyu mugore wo mu gace ka Rhode Island muri Leta Zunze Ubumwe za Amerika umubiri we wahindutse ubururu nyuma yo gukoresha ikigero kiri hejuru y’umuti wa benzocaine bogesha amenyo bitewe n’uburwayi bw’iryinyo yari afite.

Nyuma yuko abaganga bamaze gusuzuma uyu mugore, basanze afite indwara ya methemoglobinemia ituma agira ikibazo mu maraso bitewe nuko intungamubiri zikungahaye ku butare ziboneka ku nsoro zitukura z’amaraso zari zagabanutse kandi ubundi arizo zigeza umwuka mwiza (oxygèn) mu mubiri.

Uyu muti wa benzocaine ubundi ntiwemewe gukoreshwa n’abana bari munsi y’imyaka ibiri.

Nyuma yo kugera kwa muganga, uyu mugore utavugwa izina yaje gukira nyuma yo guhabwa umuti wa methylene blue maze amara ijoro rimwe kwa muganga.

Jamie Alan, umwarimu mu bijyanye n’imiti muri kaminuza ya Michigan States University yavuze ko iyo insoro zitakiri gutanga umwuka mwiza mu mubiri, umubiri w’umuntu ushobora guhinduka ubururu.

Nubwo indwara ya methemoglobinemia iterwa nuko inzira inyuramo umwuka mwiza ujya mu maraso uba wifunze, ngo iyo nanone uzamutse cyane ukarenga 50% umuntu ashobora kugwa muri koma, kubura amaraso, kugira ibibazo by’umutima n’ubwonko. Iyo byageze kuri 60%, bishobora kuba byateza n’urupfu.

Indwara ya methemoglobinemia ishobora guhererekanwa mu muryango cyangwa igaterwa n’ibinyabutabire bitandukanye, imiti, cyangwa ibiryo runaka. Imwe muri iyo miti ni benzocaine, nitrobenzene n’indi miti nka dapsone na Chloroquine.

Ibimenyetso by’indwara ya methemoglobinemia ni nko gucika intege, guhumeka gahoro, kubabara umutwe no kubura imbaraga mu mubiri. Iyi ndwara ni mbi cyane kuko igabanya imbaraga z’utunyangingo tw’amaraso dutembereza oxygene mu mubiri bikaba byavamo kurwara umutima n’urupfu.

Umubiri w'umugore wahindutse ubururu kubera umuti yakoresheje

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza