Uko imfashabere y’umwana itegurwa n’uburyo abajyanama b’ubuzima bamenya umwana ufite imirire mibi

Yanditswe na Hakizimana Jean Paul
Kuya 26 Gashyantare 2021 saa 09:41
Yasuwe :
0 0

Guverinoma y’u Rwanda ikora ibishoboka byose mu kwita ku mubyeyi n’umwana no kubarinda igwingira rya hato na hato rishobora guturuka ku kubura imfashabere no ku kutabona indyo yuzuye byatuma umwana agwingira mu mikurire ye.

Igwingira ni kimwe mu bimaze kurwanywa cyane kandi bigikomeje kurwanywa, ibi bigaragarira ku ntego Leta yihaye y’uko muri 2024 igwingira rizaba riri kuri 19% rivuye kuri 33% riri kuri ubu.

Mu bizatuma rigabanuka harimo kuba umubyeyi yigishwa uburyo yafata indyo yuzuye igizwe ibirinda umubiri, ibitera imbaraga n’ibyubaka umubiri. Harimo kandi guha ababyeyi ifu ya Shisha Kibondo na Ongera byunganira umubyeyi mu gutuma umwana we abona imfashabere ikwiriye.

Ni ibikorwa byahawe umwihariko kuva kuwa Mbere tariki ya 22 Gashyantare kugeza tariki ya 7 Werurwe, Minisiteri y’Ubuzima ibinyujije mu Kigo cy’Igihugu gishinzwe ubuzima ( RBC), ku bufatanye n’ubuyobozi bw’inzego z’ibanze kugera ku Masibo, aho barimo gukurikirana umubyeyi n’umwana mu rwego rwo kurwanya igwingira.

IGIHE yasuye bamwe mu babyeyi bo mu Karere ka Rutsiro mu Murenge wa Kivumu kugira ngo irebe uburyo bakoresha mu kwita ku mwana wabo n’imfashabere bakoresha.

Nirere Solange ufite imyaka 26 avuga ko bimwe mu bituma umwana we yonka neza kandi akabyibuha harimo indyo yuzuye, imfashabere nka Ongera ndetse no kugira isuku yaba ku bikoresho akoresha mu kwita ku mwana we ndetse no kuri we bwite.

Ati “ Ndya imboga za buri munsi, akenshi nteka ibiryo byoroshye birimo ibitera imbaraga nk’igitoki, ibirayi cyangwa umwumbati, nkashyiramo ibishyimbo n’imboga, ubundi nkanagira igikoma. Iyo byanagenze neza mbona ibinyomoro kuko nibyo biboneka hafi cyane, ibi bituma ngira amashereka menshi kuburyo umwana wanjye nta kibazo agira.”

Ongera yatumye umwana we yiyongera ibiro
Ongera ni imwe mu mfashabere zirimo intungamubiri zirenga icumi zituma umwana akura neza kandi akanagira ubuzima bwiza. Igenerwa abana bafite amezi atandatu kugera ku mezi 23 y’amavuko, iba irimo vitamini n’imyunyu by’inyongera bigamije kuzamura imirire y’umwana.

Nirere yakomeje avuga ko gufata indyo yuzuye ndetse n’imfashabere ya Ongera byatumye umwana we arushaho kwiyongera ibiro ndetse akanakura neza.

Ati “ Kuva yagira amezi atandatu yagiye yiyongera ibiro ntakunde kurwaragurika cyane. Ongera nyikoresha mu biryo byoroshye bidafashe cyane nkagenda muha ibiryo bike ashobora kumira, iyo abimaze mwongera ibindi biryo bitarimo Ongera umunsi ku munsi.”

Nirere yavuze ko umwana we buri uko agiye kumupimisha ibiro bye asanga byariyongereye ugereranije na mbere.

Uwiduhaye Diane ufite imyaka 23 utuye mu Mudugudu w’icyitegererezo wa Karungu mu Kagari ka Bunyunju mu Murenge wa Kivumu, we avuga ko Ongera iri mu byamufashije gutuma umwana we agarura ibiro.

Yagize ati “ Njye natangiye kuyikoresha umwana wanjye atangiye kumenya kurya, icyo gihe yahise asubira inyuma mu biro bitewe nuko aba atangiye guhabwa ibiryo. Yaje gusubira inyuma ho amagarama make, njya kwa muganga bampa Ongera bananyigisha uburyo nzajya nyikoresha mugaburira.”

Uwiduhaye yakomeje avuga ko kuva ubwo yatangiraga kuyikoresha kugeza ubu ngo umwana we amaze kwiyongeraho ibiro byinshi mu buryo bugaragara.

Ati “ Ubu buri uko ngiye kumupimisha nsanga ibiro bye byiyongereye, hari ubwo nsanga yiyongereyeho amagarama cyangwa yanayarengeje, ubu ndabona akura neza kuburyo hari icyo azimarira.”

Umwana watangiye gusubira inyuma bigaragarira he?

Kimwe mu bipimo byifashishwa cyane n’abajyanama b’ubuzima mu gupima abana bakiri bato, harimo umunzani bapimiraho ibiro by’abana ndetse n’ikarita yiswe ‘Agasambi’ ikoreshwa mu kureba niba umwana atarasubiye inyuma mu kubona indyo yuzuye.

Niyitegeka Providence uri mu bapima abana ku gasambi mu Kagari ka Bunyunju, avuga ko agasambi kareberwaho niba umwana atagaragara mu mirire mibi, bakaba bagashyiraho umwana guhera ku mezi atatu kugeza ku mezi 18.

Iyo bashyizeho umwana bagasanga ari mu cyatsi aba ameze neza, iyo ari mu muhondo aba yaratangiye kugwingira naho iyo ari mu mutuku aba yaragwingiye cyane akeneye koherezwa ku kigo Nderabuzima kugira ngo yitabweho cyane.

Umukozi ushinzwe gukurikirana abajyanama b’ubuzima mu Kigo Nderabuzima cya Kivumu, Sinibagiwe Adrien, avuga ko kuri ubu imyumvire y’ababyeyi imaze kuzamuka. Ngo nta mubyeyi ucyanga gupimisha umwana we cyangwa ngo yanjye gukoresha Ongera.

Yavuze ko Ongera ihabwa ababyeyi bose mu mu byiciro byose kandi bakayihabwa ku buntu. Yavuze ko ibi byatumye igwingira rigabanuka muri uyu Murenge kuburyo ngo n’umwana ugaragaye ari mu mutuku cyangwa mu muhondo yitabwaho agakira vuba.

Umubyeyi ukoresha Ongera asabwa gukoresha agashashi kamwe inshuro ebyiri cyangwa agakoresha udusashi dutatu mu cyumweru, avanga ifu yose mu ifunguro ryoroshye cyangwa rinombye mbere gato yo kugaburira umwana. Buri mubyeyi ntagomba kuyivanga n’ifunguro rishyushye cyangwa ngo ayishyire mu binyobwa.

Muri iki cyumweru cyahariwe kwita ku buzima bw’umwana, buri mwana wese ufite amezi atandatu kugeza ku mezi 23 ari guhabwa imfashabere ya Ongera ndetse n’indyo yuzuye mu rwego rwo gutuma bakura neza yaba mu gihagararo no mu bwenge. Ibi bikorwa biri kubera mu Masibo hirya no hino mu gihugu hose.

Abajyanama b'ubuzima bigisha umubyeyi uburyo azajya akoresha ongera
Agasambi kifashishwa mu gupima umwana harebwa niba atabarizwa mu mirire mibi
Abajyanama b'ubuzima bakoresha agasambi mu kumenya uko imirire y'umwaha ihagaze
Nirere Solange uba mu Murenge wa Kivumu avuga ko ongera yatumye umwana we akura neza
Ongera ishyirwa mu biryo by'umwana byoroshye bidashyushye cyane kandi bitanahoze
Uwiduhaye Diane wabyaye afite imyaka 23 ni umwe mu bitaweho cyane n'abajyanama b'ubuzima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .