00:00:00 IGIHE NETWORK KN KINYARWANDA EN ENGLISH FR FRANCAIS

Uko gukangura ubwonko bw’umwana uri mu nda bihindura imibereho ye amaze kuvuka: Uruhare rw’abajyanama b’ubuzima

Yanditswe na Nsanzimana Erneste
Kuya 21 Ukuboza 2022 saa 02:00
Yasuwe :

Abajyanama b’ubuzima bo mu Karere ka Karongi bavuga ko mu byo bagiye gushyiramo imbaraga harimo kwigisha imiryango by’umwihariko abagabo, uko bakangura ubwonko bw’umwana, kuko byagaragaye ko bimugirira akamaro mu buzima bwe bwose.

Guhera mu mpera z’Ugushyingo 2022, Leta y’u Rwanda ifatanyije n’Abafatanyabikorwa bayo barimo Ishami ry’umuryango w’Abibumbye ryita ku Baturage, UNFPA, batangiye guhugura abajyanama b’ubuzima bo mu Turere twa Karongi na Musanze, bikaba biteganyijwe ko iyi gahunda izakomereza no mu tundi turere.

Aba bajyanama b’ubuzima mu bumenyi bahabwa butandukanye harimo kumenya kwita ku mubyeyi n’umwana, iby’ibanze mu kuvura indwara zimwe na zimwe ndetse no kumenya uko bafasha abaturage kwirinda indwara.

Mushimiyimana Joseph, umujyanama w’ubuzima wo mu Kagari ka Bubazi mu murenge wa Rubengera mu karere ka Karongi, yavuze ko mu masomo ajyanye no kwita ku buzima bw’umwana bigishijwe n’ibijyanye no gukangura ubwonko bw’umwana.

Ati "Nsanze gukangura ubwonko bw’umwana ari ikintu cy’ingenzi ababyeyi bombi bakwiye kwitaho. Tugiye kwegera abayobozi bacu baba ba mudugudu, na ba gitifu uko bakoze inama bajye baduha umwanya dushishikarize abagabo kugira uruhare mu gukangura ubwonko bw’umwana".

Baziramwabo Claude, nawe uri mu bahugurwa, yavuze ko bigishijwe ko gukangura ubwonko bw’umwana bikorwa ahanini n’umugabo arinda ihohoterwa uwo bashakanye, ndetse akajya akora ku nda y’umubyeyi utwite, akaririmbira umwana uri mu nda.
Ati "Ibijyanye no gukangura ubwonko bw’umwana twabikoraga ariko ku kigero cyo hasi kubera ko amahugurwa yari ataraboneka ahagije. Twize ko ubwonko bw’umwana butangira gukanguka umugore akimara gusama kugeza umwana agize imyaka itanu".

Baziramwabo avuga ko muri rusange abagabo bo mu bice by’icyaro, ibijyanye no gukangura ubwonko bw’umwana babikora ku kigero cyo hasi.

Ati "Nyuma yo guhugurwa tugiye gukora ubukanguramabaga, dutange ibiganiro mu nteko z’abaturage n’aho dutuye, aho twicaye tuganira na bagenzi bacu tubashishikarize gukangura ubwonko bw’abana ndetse tunabigisha uburyo bikorwa".

Dr Anicet Nzabonimpa, inzobere mu bijyanye n’ubuzima bw’imyororokere akaba n’umukozi wa UNFPA mu Rwanda, yabwiye IGIHE ko ubushakashatsi bwagiye bugaragaza ko iyo umwana yakanguwe ubwonko akiri mu nda ya nyina, byongerera umuvuduko ubwonko bwe mu bijyane no gutekereza no gufata ibyemezo byiza kandi byihuse mu buzima bwe bwose.

Ati "Icyo dushyiramo imbaraga ni uko ababyeyi bombi bagomba kubigiramo uruhare. Umubyeyi utwite akirinda guhangayika akishyira mu mutuzo. Umubyeyi w’umugabo na we abifitemo uruhare ntagereranwa kuko rya jambo ryiza abwira umugore we rigera no ku mwana uri mu nda".

Dr Nzabonimpa avuga ko ubushakashatsi bwagaragaje ko iyo umugore utwite aguyaguwe, umubiri we ukora imisemburo y’ibyishimo igira uruhare mu gukangura ubwonko bw’umwana.

Ati "Iyo ubwonko bw’umwana bwakanguwe neza bigira uruhare ku buzima bwe na nyuma yo kuvuka, akazagira imitekerereze myiza, imibanire myiza n’abandi ndetse yajya no mu ishuri akamenya gusobanura neza ibyo yize."
"Ikindi iyo ahuye n’ikintu kimusaba gutekereza no gufata icyemezo abikora vuba kandi neza, ndetse umwana wakanguwe ubwonko bituma agirira urukundo abo mu muryango we, ni ukuvuga nyina, se n’abavandimwe be".

Umuyobozi w’ishami ry’ubuzima mu karere ka Karongi, Rafiki Gashanana, yibukije ababyeyi ko kugwingira k’umwana atari mu mikurire gusa, kuko n’ubwonko bw’umwana iyo budakanguwe hakiri kare bugwingira.

Ati "Turasaba abajyanama b’ubuzima ko mu butumwa baha abagore batwite n’abitegura gutwita bajya bibuka kubashishikariza gukangura ubwonko bw’umwana kandi muri ubwo bukangurambaga ntabwo bazabikora bonyine, turahari nk’inzego z’ibanze tuzabafasha".

Mu Rwanda kugeza ubu habarurwa abajyanama b’ubuzima barenga ibihumbi 58, bashimirwa uruhare bakomeje kugira muri serivisi z’ubuzima by’umwihariko uruhare bagize mu kugabanya umubare w’ababyeyi bapfa babyara n’abana bapfa batarageza ku myaka itanu.

Abajyanama b'ubuzima bo mu karere ka Karongi biyemeje gushishikariza abagabo ibijyanye no gukangura ubwonko bw'umwana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .