Udukingirizo turenga miliyoni enye turimo utw’abagore tudakunze kuboneka tugiye gukwirakwizwa mu baturage

Yanditswe na Evariste Nsengimana
Kuya 19 Gashyantare 2020 saa 08:44
Yasuwe :
0 0

Umuryango urwanya Sida (AHF) ishami ryo mu Rwanda watangaje ko ugiye gukwirakwiza hirya no hino udukingirizo turenga miliyoni enye turimo utw’abagore tudakunze kuboneka mu gufasha abaturage kwirinda no gukumira virusi itera Sida, inda zitateganyijwe n’izindi ndwara zandurira mu mibonano mpuzabitsina.

Byagarutsweho n’umuyobozi wa AHF mu Rwanda, Dr Brenda Asiimwe kuri uyu wa 18 Gashyantare 2020 ubwo mu Karere ka Musanze hizihirizwaga umunsi mpuzamahanga wo gukoresha neza agakingirizo.

Dr Brenda yavuze u Rwanda n’ibindi bihugu byinshi bigifite urugamba rukomeye rwo kurwanya no gukumira virusi itera Sida, inda zitateguwe n’indwara zandurira mu mibonano mpuzabitsina kandi ko umuryango ahagarariye uzakomeza gufatanya na Leta mu bikorwa byo kubikumira no kubirwanya.

Ati "Turasaba by’umwihariko urubyiruko gufata ingamba zo gukumira Virus itera Sida. Nka AHF dufite intego yo gukwirakwiza udukingirizo turenga miliyoni enye muri uyu mwaka."

Umuyobozi wungirije w’Akarere ka Musanze ushinzwe imibereho myiza y’abaturage, Kamanzi Axelle, yavuze ko mu gihe Isi yizihiza ikoreshwa neza ry’agakingirizo ari umwanya wo kwibutsa ko Sida ihari kandi yica.

Ati "Dukunze kuvuga ko hari uburyo butatu bwo kwirinda Sida ari bwo kwifata, gukoresha agakingirizo no kudaca inyuma uwo mwashakanye."

Kamanzi yavuze ko agakingirizo ari bumwe mu buryo bwizewe bwo kwirinda virusi itera Sida n’izindi ndwara zandurira mu mibonano mpuzabitsina abantu bakunze kugirira ipfunwe kandi ari ubuzima bwabo barengera.

Ati "Twese turabizi ko yandurira mu buryo butandukanye ariko ubwanduriramo benshi ni imibonano mpuzabitsina idakingiye. Ni ibintu benshi bakora bihishe, ari naho benshi bagirira isoni zo kuba bagura agakingirizo nyuma bagahura n’ingaruka zinyuranye, bamwe bakagira isoni zo kujya kwipimisha ngo bamenye uko bahagaze."

"Ntabwo twagakwiye kugira isoni kuko iyo umuntu amaze kugera ku gitanda ibyuririzi byaje, ntawe utamenya uko byagenze. Aho kugira ngo rero ubure ubuzima, igihugu kibure amaboko, twakoresha agakingirizo, cyane ko katwegerejwe hirya no hino."

Bamwe mu baturage bo muri aka Karere bavuga ko udukingirizo tw’abagore tudakunze kuboneka ariko n’utw’abagabo duhari hari abagira isoni zo kudukoresha.

Uwineza Grace yavuze ko agakingirizo akifashisha mu gihe akora imibonano mpuzabitsina n’uwo bashakanye nk’uburyo bwo kuboneza urubyaro ariko ko kanifashishwa mu gukumira indwara zandurira mu mibonano mpuzabitsina zirimo na virus itera Sida.

Ati "Urumva umuntu atagakoresheje mwarashakanye ashobora kugenda agasambana, akakuzanira indwara zandurira mu mibonano mpuzabitsina. Ushobora no kukifashisha mu kwirinda gusama inda urateganyije."

Mugenzi we yavuze ko n’uwo bashakanye bafitanye umwana umwe babikesha kuboneza urubyaro bakoresheje agakingirizo.

Ati "Tukifashisha nk’uburyo bwo kuboneza urubyaro kuko mu myaka icyenda tumaranye, dufitanye umwana umwe kandi nibwo buryo dukoresha."

Polisi y’igihugu yatanze ubutumwa bugaruka ku bukangurambaga bwa Gerayo Amahoro, kwirinda ibiyobyabwenge n’ibindi biteza umutekano mucye mu muryango Nyarwanda, isaba abaturage kwihutira gutangira amakuru ku gihe.

Umuvugizi wa Polisi mu ntara y’Amajyaruguru, CIP Alexis Rugigana yavuze ko ibiyobyabwenge biri mu bituma abantu batagira urukundo ahubwo bagahorana ibitekerezo bibaganisha gukora ikibi.

Ati "Ntushobora kubona n’izo mbaraga zo gukoresha agakingirizo mu gihe ukoresha ibiyobyabwenge. Duhereye ku cyadutereranyije hano, ibyo ni ibigenda bikadushora mu buzima bwo kwandura indwara zandurira mu mibonano mpuzabitsina n’ibindi byose bitera amakimbirane, intonganya mu muryango n’ahandi hose."

Buri mwaka, udukingirizo turenga miliyoni 20 dukwirakwizwa mu Rwanda bigizwemo uruhare na Guverinoma n’indi miryango y’ubuzima. Muri two miliyoni 15 zigurishwa mu maduka, miliyoni eshanu zigakoreshwa mu bajyanama b’ubuzima n’amavuriro, miliyoni imwe n’igice tugafatirwa mu tuzu twabugenewe aho dutangirwa ubuntu.

Raporo y’Ubushakashatsi bwa (RPHIA) yo muri Nzeri 2019 yerekanye ko mu Rwanda abafite ubwandu bwa Virusi itera SIDA ari 3%; abari hagati y’imyaka 15 na 45 bageze kuri 2.6%. Iyo nyigo igaragaza ko abagore aribo banduye (3%) kurusha abagabo (2.2%).

Bamwe mu baturage bari bitabiriye uyu muhango
Dr Brenda yavuze ko umuryango ahagarariye uzatanga udukingirizo miliyoni enye
Umuyobozi wa AHF Dr Brenda n'umuyobozi wungirije w'Akarere ka Musanze Kamanzi bari kuganira
Umuyobozi wungirije w'Akarere ka Musanze ushinzwe imibereho myiza y'abaturage Kamanzi yavuze ko abantu badakwiye guterwa ipfune n'agakingirizo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza