Ubwoko bwa Paracetamol zikorerwa muri Kenya bwakumiriwe ku isoko ry’u Rwanda

Yanditswe na Habimana James
Kuya 20 Ugushyingo 2019 saa 10:35
Yasuwe :
0 0

Ikigo gishinzwe kugenzura Ibiribwa n’Imiti mu Rwanda (FDA) cyakumiriye ku isoko ubwoko bwa Paracetamol bwitwa ‘TOTO-MOL’.

Paracetamol yakumiriwe ku isoko ni isukika ifite ibirango bya 120/5ml (TOTO-MOL®). Ni icyiciro cy’imiti gifite nimero 73718, ikaba yarakozwe muri Gashyantare 2019 yagombaga kurangira muri Mutarama 2022. Yakozwe n’Ikigo, Laboratory and Allied Ltd cyo mu Mujyi wa Mombasa muri Kenya.

FDA yatangaje ko ifata mu buryo bukomeye ahagaragaye hose amakuru avuye mu bafatanyabikorwa kugira ngo habungwabungwe ibintu birusheho kugira ubuziranenge.

Iki cyiciro cy’iyi miti ngo cyasanganwe ibibazo by’ubuziranenge nyuma y’igenzurwa ryakozwe ryakurikiye raporo zagaragajwe n’abantu na farumasi zitandukanye.

FDA mu itangazo ryayo yavuze ko “Dushingiye ku makuru yavuye mu bakiliya na farumasi zicuruza imiti n’iperereza twikoreye aho Paracetamol 120/5ml (TOTO-MOL®) yari yarahagaritswe, iboneyeho gutangaza ko iki cyiciro cy’imiti cyasanganwe ikibazo cy’ubuziranenge.”

Itangazo ryashyizweho umukono n’Umuyobozi w’Agateganyo wa FDA, Dr Charles Karangwa, ribwira abinjiza imiti mu gihugu, ibigo bibitse imiti, ibiyicuruza, farumasi z’uturere, ibigo by’ubuvuzi byaba ibya leta n’iby’abikorera, guhagarika ikwirakwizwa ry’iyi miti no kuyigarura ku bayibagurishije.

Iki kigo kandi cyavuze ko abazana imiti mu gihugu batanga raporo igaragaza imiti binjije, iyakwirakwijwe, ikagarurwa kandi ikabikwa, mu gihe cy’iminsi itanu.

Muri Gicurasi uyu mwaka, FDA yatangaje ko hari amapaki y’imiti irimo ivura inzoka nka Mébendazole na Albendazole yakuwe ku isoko ry’u Rwanda nyuma y’uko ubugenzuzi bugaragaje ko itari yujuje ubuziranenge.

FDA yatangaje ko yafashe ibipimo by’imiti ikomeye igera kuri 15, itatu muri yo yiganjemo ivura inzoka n’indi ihabwa abagore babyaye kugira ngo badakomeza kuva, basanze itujuje ubuziranenge ihita ikurwa ku isoko ryo mu Rwanda.

Umuyobozi Mukuru w’Ishami rishinzwe kwandika imiti n’ibiribwa muri FDA, Kabatende Joseph, yabwiye IGIHE ko imiti yakuwe ku isoko ari iyo basanze ifite ibibazo gusa.

Ati “Hari icyiciro cy’imiti ya “Albendazole 400mg” gifite nimero 370420 yagombaga kutarenza Kanama 2022 yari ifite ikibazo cy’ubuziranenge, ikurwa ku isoko. Umuti witwa “Miprosol” nawo niko byagenze aho ibinini bya 200mg byaje mu cyiciro No M8TAN 1801, yagombaga kutarenza Mata 2020 nayo yakuwe ku isoko.”

Mu Ukwakira 2019 nibwo Guverinoma y’u Rwanda yatangaje ko igiye gutangiza igenzura ryihariye ku nganda zikorera ku butaka bwarwo imiti n’ibiribwa n’ibivanywe mu mahanga bihacururizwa mu rwego gukumira ibitujuje ubuziranenge n’ingaruka byagira ku baturage bayo.

Mu minsi ishize kandi Ikigo gishinzwe kugenzura Ibiribwa n’Imiti, FDA (Food and Drugs Authority) cyahagaritse ku isoko ry’u Rwanda inganda zirindwi zo muri Kenya zagemuraga umushongi ukozwe mu bunyobwa uzwi nka ‘Peanut Butter’.

Paracetamol zo mu bwoko bwa ‘TOTO-MOL’ zakumiriwe ku isoko ry'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza