00:00:00 IGIHE NETWORK KN KINYARWANDA EN ENGLISH FR FRANCAIS

Ubwoko bwa Omicron bwihinduranya bwagaragaje kudakangwa n’inkingo

Yanditswe na Zigiranyirazo Bajecteur
Kuya 23 June 2022 saa 11:34
Yasuwe :

Ubwoko bwa COVID-19 bwihinduranya bwa Omicron bwahawe amazina ya BA.4 na BA.5, bwagaragaje kwihagararaho no gukwepana n’abasirikare b’umubiri haba ku bantu bigeze kwandura COVID-19 no ku bakingiwe mu buryo bwuzuye bakanahabwa urukingo rushimangira.

Aya makuru yatangajwe n’abashakashatsi bo mu Kigo cy’Ubuvuzi cya Beth Israel Deaconess gishamikiye ku Ishuri ry’Ubuvuzi rya Havard.

Ubu bushakashatsi bwerekanye ko uwakingiwe byuzuye akanahabwa urukingo rushimangira, aba afite amahirwe yo kutaremba no kuzahazwa cyane n’ubu bwoko bwa COVID-19 bwihinduranya.

Ni mu gihe abakora inkingo bakomeje gukora iyo bwabaga ngo haboneke doze ifite ubudahangarwa bwisumbuye mu guhangana n’ubu bwoko bwihinduranya.

Muri ubu bushakashatsi, hahishuwe ko ubwoko bwihinduranya bwa BA.4 na BA.5 bufite ubushobozi bwo kwihagararaho mu mubiri w’umuntu wakingiwe.

Ni mu gihe abasirikare b’umubiri we batabasha kubuhashya ugereranyije n’uko bigenda ku bwoko bwa Omicron bwitwa BA.1 na BA.2.

Mu cyumweru gishize muri Leta Zunze Ubumwe za Amerika habaruwe ubwandu bushya bungana na 35% butewe na BA.4 hamwe na BA.5 mu gihe icyumweru cyari cyakibanjirije iyi mibare yari iri kuri 29%.

Ni ikintu kigaragaza ubukana no gukwirakwira vuba k’ubu bwoko bushya ku buryo amakuru avuga ko mu byumweru biri imbere ubu bwoko bushobora kuzaba buri guca ibintu mu bindi bihugu nk’u Bwongereza n’ahandi mu Burayi.

Inzobere mu by’ubuzima by’umwihariko ibijyanye n’ibyorezo, zivuga ko icyorezo cya COVID-19 kigifite ubushobozi bwo gukomeza kwihinduranya ku buryo na nyuma y’ibyumweru bike umuntu afashe urukingo ashobora kwisanga yongeye kwandura.

Hatangwa inama ko abamaze gukingirwa badakwiye guterera agati mu ryinyo biyumvamo ko ubwoko bwa BA.4 na BA.5 butabageraho ahubwo bakubahiriza ingamba zifasha zo kwirinda kwandura iki cyorezo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .