Ubushakashatsi bwagaragaje ko ubukurugutwa bushobora kwifashishwa mu gupima indwara zo mu mutwe

Yanditswe na IGIHE
Kuya 4 Ugushyingo 2020 saa 07:12
Yasuwe :
0 0

Ubushakashatsi bwakorewe ku bantu 37 bwagaragaje ko umuntu ashobora gupima ubukurugutwa akamenya ubwiyongere bw’umusemburo witwa Cortisol, ubusanzwe ugaragara mu mibiri igihe umuntu agize uguhangayika gukabije n’igihe afite izindi ndwara zo mu mutwe.

Ibi bituma uyu musemburo ukoreshwa igihe abaganga bapima indwara zo mu mutwe zirimo agahinda gakabije, guhangayika n’izindi, gusa ukaba wapimagwa igihe umuntu afashwe amaraso. Ibyo kuba ugaragara no mu bukurugutwa bikaba ari bishya.

Uwakoze ubu bushakashatsi, Dr Andres Herane-Vives, yavuze ko bushobora gufungura uburyo bworoshye bwo gusuzuma indwara zibasira ubuzima bwo mu mutwe zirimo n’iy’agahinda gakabije.

Ubusanzwe abantu bose bafite ibimenyetso by’uburwayi bwo mu mutwe baba bagomba gupimwa ingano ya Cortisol bigafasha mu kumenya uko bavurwa.

Kuri ubu ariko ubuvuzi bw’indwara zo mu mutwe ngo ahanini bushingira ku buryo umuganga abona ibintu ku buryo rimwe na rimwe ashobora kwibeshya ntavure indwara nyayo y’umurwayi.

BBC yatangaje ko ubu bushakashatsi bwitezweho kuba bwafasha abaganga kubona ukuri kw’indwara mu gihe barimo gusuzuma abarwayi, ibi bigatuma bamenya uwo baha imiti ivura agahinda gakabije n’uwo batayiha.

Cortisol ubusanzwe ikunze gupimirwa mu maraso ariko ni ibipimo bitanga ishusho nto y’ingano y’imisemburo muri ako kanya.

Ikindi gituma ibiva mu bipimo by’amaraso biba bitizewe ni uko gufata umuntu amaraso ubwabyo bishobora kumutera guhangayika, bityo mu gihe barimo kuyamufata imisemburo iza igihe umuntu ahangayitse, ikaba ishobora kuzamuka bigatuma umuganga abona ko umuntu arwaye kandi byatewe no gutinya gufatwa amaraso.

Ibi nibyo byatumye Dr Herane-Vives yiyemeza kuvumbura izindi nzira zakwifashishwa mu gupima Cortisol bitanyuze mu maraso.

Ubushakashatsi bwagaragaje ko ubukurugutwa bushobora gukoreshwa mu gupima indwara zo mu mutwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .