U Rwanda rwatangije gahunda ya miliyari 36 Frw igamije guhangana na Kanseri

Yanditswe na Habimana James
Kuya 5 Gashyantare 2020 saa 02:51
Yasuwe :
0 0

Guverinoma y’u Rwanda yatangije gahunda y’imyaka itanu ikubiyemo uburyo bwu guhangana na kanseri ikomeje guhitana imbaga.

Minisiteri y’Ubuzima mu Rwanda igaragaza ko abarwayi ba kanseri bagiye biyongera buri mwaka kuva mu 2007 kugeza mu 2018, aho bavuye ku bantu 635 bafatwaga n’iyi ndwara buri mwaka, bagera ku bantu 2,803 bandura buri mwaka.

Imibare igaragaza ko mu 2018, abarwayi ba kanseri mu Rwanda bari 10,704, muri aba 6,184 bakaba bari abagore, naho 4,520 bari abagabo.

Kubera ubu bwiyongere, leta y’u Rwanda n’abafatanyabikorwa, batangije gahunda y’imyaka itanu izava mu 2020-2024, ikaba igamije guhangana n’iyi ndwara.

Ni gahunda ikubiyemo gupima abantu hakiri kare, kongera ubuvuzi kandi bufite ireme, kongera ubufatanye n’ubushobozi mu guhangana n’iyi ndwara n’ibindi.

Ni gahunda biteganyijwe ko izatwara miliyari zirenga 36 Frw, akazatangwa na guverinoma y’u Rwanda n’abafatanyabikorwa batandukanye.

Umuyobozi w’ishami rishinzwe kurwanya kanseri mu kigo cy’igihugu cy’Ubuzima (RBC), Dr Uwinkindi François, yavuze ko umwihariko uhari muri iyi myaka itanu ari uko bashaka kugeza amakuru ku bantu bakoresheje n’abajyanama b’ubuzima, kuko aribo babana n’abaturage umunsi ku munsi.

Yagize ati “Ubundi bashyiraga imbaraga mu gukangurira abantu gahunda z’ubuzima bw’umubyeyi n’umwana, kwirinda malaria n’igituntu ariko ubu kanseri n’izindi ndwara zitandura nabyo byagiyemo. Kuba dufite abajyanama b’ubuzima bagera ku bihumbi 60 mu gihugu bazadufasha. Twamaze gukora agatabo k’imfashanyigisho ku buryo bazatangira kugenda urugo ku rundi bigisha abantu izi kanseri na ba bandi basanganye ibimenyetso, babakangurire kujya kwa muganga.”

Ati “Twazanye kandi n’uburyo bushya bwo kureba niba koko umuntu afite virusi itera kanseri y’inkondo y’umura, mbere twapimaga ibibazo byatewe na ya kanseri ariko ubu tugiye kuyipima kandi ipimirwe ku bigo nderabuzima, uwo muntu anavurirwe hasi kuri cya kigo nderabuzima.”

Avuga ko ikindi gishya muri iyi gahunda ari uko kuri kanseri y’ibere, ubusanzwe itangira haza akabyimba gato, ariko uko iminsi igenda kakagenda gakura kandi ugasanga abantu baba batabizi ko bagafite.

Yagize ati “Abo bantu bazajya basuzumwa na mbere y’uko bamenya ko bafite ka kabyimba. Turashaka kwegereza abaturage imashini zipima, ku buryo tuzajya dufata izo mashini tuzishyire mu modoka twegere abaturage aho batuye, abo tubonye tubohereze kwa muganga hakiri kare.”

Umunyamabanga wa Leta muri Minisiteri y’Ubuzima, ushinzwe ubuvuzi bw’ibanze, Dr Ndimubanzi Patrick, avuga ko ikibazo cya kanseri cyugarije Isi, by’umwihariko kikaba cyugarije cyane ibihugu bikiri mu nzira y’Amajyambere.

Yagize ati “Nk’uko tubizi ikibazo cya kanseri cyugarije Isi, ariko cyane cyane abenshi bakaba ari abantu bari mu bihugu bikiri mu nzira y’amajyambere kubera kubura ubushobozi, hakenewe ko hakomeza ubukangurambaga bwo kumenya kanseri hakiri kare.”

Iyi gahunda itangijwe nyuma y’aho kuri uyu wa Kabiri tariki 4 Mutarama 2020, Perezida Paul Kagame afunguye ikigo kivura indwara za kanseri mu Rwanda hakoreshejwe uburyo bugezweho bwifashisha imashini ikoresha imirasire, igashiririza igice kirwaye gusa (radiotherapy).

Iki kigo cyafunguwe giherereye mu bitaro bya gisirikare bya Kanombe, kikaba ari umwihariko mu karere u Rwanda ruherereyemo kubera ikoranabuhanga gikoresha.

Iki kigo gishya kije cyunganira ubundi buryo bwo kuvura kanseri bwatangirwaga mu bitaro bimwe na bimwe mu Rwanda nk’ubwo kuyivura hifashishijwe imiti (chemotherapy) no kubaga aharwaye.

Abayobozi bagaragaje ko hakenewe ingamba zikarishye mu guhangana na kanseri
Imbonerahamwe igaragaza uko abarwayi ba kanseri mu Rwanda uko imyaka yagiye isimburana
Umuyobozi w’ishami rishinzwe kurwanya kanseri mu kigo cy’igihugu cy’Ubuzima (RBC), Dr Uwinkindi François, yavuze ko umwihariko uhari muri iyi myaka itanu ni uko bashaka kugeza amakuru ku bantu bose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .