00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwakajije ingamba zo gukumira Ebola yagaragaye muri Uganda

Yanditswe na Cyprien Niyomwungeri
Kuya 20 Nzeri 2022 saa 01:30
Yasuwe :

Ikigo cy’Igihugu cy’ubuzima (RBC) cyatangaje ko u Rwanda rwiteguye kandi rugiye gukaza ingamba zo gukumira icyorezo cya Ebola cyagaragaye muri Uganda.

Minisiteri y’Ubuzima muri Uganda, kuri uyu wa Kabiri yemeje ko icyorezo cya Ebola kirimo gukwirakwira mu Karere ka Mubende, nyuma yo guhitana umusore w’imyaka 24. Aka gace ka Mubende kari mu bilometero 390 uvuye ku mupaka wa Gatuna ugabanya u Rwanda na Uganda.

Minisitiri w’Ubuzima yatangaje ko uwo musore yabanje kugaragaza ibimenyetso bya Ebola byo kuva amaraso menshi mu mubiri, ndetse aza kwitaba Imana.

Yakomeje iti "Uburwayi bwabonetse mu musore w’imyaka 24 wo mu mudugudu wa Ngabano, mu gace ka Madudu mu Karere ka Mubende, wagaragaje ibimenyetso by’iyi ndwara nyuma aza gupfa."

Iyi Minisiteri yavuze ko hari abandi bantu batandatu bapfuye muri ako gace muri uku kwezi, nyuma yo kugaragaza ‘ibimenyetso bidasanzwe’. Harimo gukorwa iperereza ngo hamenyekane niba baba barazize iki cyorezo.

Umuyobozi Mukuru w’Ikigo cy’Igihugu gishinzwe Ubuzima (RBC), Prof Claude Mambo Muvunyi, yabwiye IGIHE ko u Rwanda rwiteguye kandi rugiye kubyutsa ingamba rusanganywe zo guhangana n’icyorezo cya Ebola.

Ati “Hari amatsinda dufite mu bitaro byacu amenyereye guhangana na Ebola no ku rwego rw’igihugu dufite itsinda ry’abantu bahuguwe, ubu tugiye kubyutsa ayo matsinda ndetse n’ingamba dufite ku mipaka cyane cyane aho gukarabira, aho gusuzumira abinjira n’abasohoka n’ibigo by’akato tugiye kubishyiramo ingufu kugira ngo byitegure”.

Prof Muvunyi yakomeje avuga ko hagiye kujyaho ingamba zo gukangurira abaturage kwirinda kwandura Ebola ndetse igihugu kikaba cyamaze gutumiza igikoresho gipima kikemeza ko ukekwaho Ebola koko ayirwaye. Iki gikoresho icyari gihari cyacyuye igihe, ikindi kizagera mu Rwanda nibura kuri uyu wa Gatatu.

Ku mipaka hagiye gushyirwaho uburyo bwo kubaza abinjira n’abasohoka niba bavuye ahari icyorezo, gupimwa umuriro no kubazwa niba barahuye n’uwapfuye.

Uwo ababishinzwe bazasanga yarahuye n’uwo Ebola yishe cyangwa akaba yaranduye, azashyirwa mu kato k’iminsi 21 ahantu hateguwe mu bitaro bitandukanye, naho abazaba bakeneye kuvurwa cyane bazajyanwa mu kigo cya Kanyinya na Nyamata.

Prof Muvunyi yahumurije abanyarwanda ko kugeza ubu nta kibazo gihari ariko bagomba kwitwararika kandi n’inzego z’umutekano, iz’ibanze n’iz’ubuzima bari maso.

Ati “Kugeza ubu nta kibazo, turi mu byago ariko [abaturage] bagomba kwitwararika. Tugiye gutangaza amakuru y’uko bagomba kwitwara ariko ntabwo ari ikintu cyatuma bahangayika. Kugeza ubu nta kibazo ariko turakomeza kubikurikirana”.

Yakomeje avuga ko ibijyanye n’imyambaro yagenewe abakozi bo kwa muganga no ku mipaka bakurikiranira hafi Ebola ihari, ikaba igiye gutangwa.

Ebola yandurira mu matembabuzi ava mu mubiri, ku buryo ishobora gukwirakwira mu gihe umuntu akoze ku wanduye cyangwa mu guhererekanya ibintu byagiyeho ubwandu.

Urwaye Ebola agira umuriro, ababara umutwe, aribwa mu ngingo, mu muhogo, agacika intege, agahitwa, akaruka cyane kandi kenshi. Mu bindi bimenyetso agaragaza harimo kuribwa mu nda no kuva amaraso ahantu hose hari umwenge ku mubiri.

Minisiteri y’Ubuzima yemeje ko yasanze icyo cyorezo ari virus ya Ebola ikomoka muri Sudani.

Ishami ry’Umuryango w’Abibumbye ryita ku buzima, ku rwego rwa Afurika, ryavuze ko rikomeje gukurikiranira hafi ubwo bwandu.

Si ubwa mbere Ebola igaragaye muri Uganda, ariko inzego z’ubuzima zagiye zifata ingamba zituma ihashywa. Imaze iminsi igaragara cyane muri Repubulika ya Demokarasi ya Congo.

Umuyobozi Mukuru w’Ikigo cy’Igihugu cy’Ubuzima, Prof. Claude Mambo Muvunyi yavuze ko u Rwanda rwiteguye guhangana na Ebola

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .