00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rugiye guha abaturage inzitiramibu miliyoni 7,5 guhera mu kwezi gutaha

Yanditswe na IGIHE
Kuya 29 April 2022 saa 09:05
Yasuwe :

Ikigo cy’Igihugu cy’Ubuzima (RBC) kigiye gutanga inzitiramibu miliyoni 7,5 mu gihugu hose, ibi bikazagendana no gutera mu nzu imiti yica imibu, hagamijwe kurandura Malaria.

Umuyobozi wa Porogaramu y’Igihugu yo kurwanya Malaria muri RBC, Dr Mbituyumuremyi Aimable, yavuze ko gukwirakwiza inzitiramibu biteganyijwe ko bizatangira mu kwezi gutaha mu Karere ka Nyamagabe mu Ntara y’Amajyepfo.

Ati "Tuzahera mu duce no ku bantu bibasirwa cyane na malaria barimo abana bari munsi y’imyaka itanu n’abagore batwite. Iki gikorwa giteganyijwe gukorwa mu byiciro kugeza umwaka utaha".

Dr Mbituyumuremyi yavuze ko miliyari 18 z’amadolari ya Amerika zatanzwe n’ikigega cy’Abanyamerika gishinzwe iterambere mpuzamahanga (USAID) zizashyirwa muri gahunda nyinshi zo kurwanya malaria harimo; gutanga inzitiramibu, gutera imiti, ubukangurambaga bwo kwirinda iyi ndwara n’izindi.

Imibare y’’Ikigo cy’Igihugu cy’ubuzima (RBC), yerekana ko hagati ya 2017 na 2021 [ni ukuvuga mu myaka itanu ishize] u Rwanda rwagabanyije abarwaraga malaria ku kigero cya 76%. Mu 2021 abarwaye malaria bari miliyoni 1.1 bavuye kuri miliyoni 4,8 mu 2017.

Kuri malaria y’igikatu, mu 2021 abayirwaye ni 1900 bavuye ku 11,000 mu 2017, hakaba harabayeho igabanuka rya 85%. Ku bigendanye n’abishwe na malaria, mu 2021 yishe abantu 69 mu gihe mu 2016 bari 706, bakaba baragabanutseho 90 ku ijana.

Mu 2017, nibura abantu 409 ku 1000 barwaye malaria, mu gihe mu 2021 abayirwaye ari 86 ku 1000. Iyi akaba ari intambwe ikomeye mu rugendo rwo kurandura malaria mu gihugu.

Ibi birerekana ko mu myaka itanu abanyarwanda barwaraga malaria bagabanutseho miliyoni 3.7 bitewe n’ingamba zirimo gutanga inzitiramibu ku baturage bose, gutera imiti yica imibu, kwegereza abaturage ubuvuzi, gukangurira abaturage kurwanya no kwirinda malaria n’ibindi.

Inzitiramibu miliyoni 7,5 zigiye guhabwa abaturarwanda hirya no hino mu gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .