00:00:00 IGIHE NETWORK KN KINYARWANDA EN ENGLISH FR FRANCAIS

U Bushinwa bwemeje urukingo rwa COVID-19 runyuzwa mu mazuru

Yanditswe na Zigiranyirazo Bajecteur
Kuya 7 September 2022 saa 07:42
Yasuwe :

U Bushinwa bwabaye igihugu cya mbere cyatanze uburenganzira ku ikoreshwa ry’urukingo rwa COVID-19 rukora biciye mu guhumeka, intambwe iganisha ku kuba ibyo gukingira hifashishijwe gutera urushinge byazahagarara mu gihe iki gihugu gikomeje urugamba rwo guhangana n’ikwirakwira ry’icyorezo cya Coronavirus.

CanSino Biologics ni bo bakoze uru rukingo aho babinyujije mu itangazo basohoye ku Cyumweru gishize, bavuze ko ikigo gishinzwe kugenzura imiti mu Bushinwa cyamaze gutanga uburenganzira bwo kuba uru rukingo rwatangira gukoreshwa mu gihe bibaye ngombwa ko hifashishwa uburyo bwihutirwa, bigafatwa nka doze ishimangira y’urukingo rwa COVID-19.

Uru rukingo rwahawe izina rya ‘Convidecia Air’ rutangwa hifashishijwe agakoresho ubusanzwe kamenyerewe ku bafite uburwayi bwa asthma kugira ngo kabafashe guhumeka neza.

Mu Bushinwa imirimo yo gutanga iyi doze hakoreshejwe Convidecia yaratangiye ndetse irarimbanyije ku buryo hari n’ibihugu bindi bike byamaze kwemeza ikoreshwa ry’uru rukingo rutangwa nka doze ishimangira.

Amakuru atangwa n’Ishami ry’Umuryango w’Abibumbye ryita ku Buzima (OMS) avuga ko uru rukingo rwakozwe na CanSino ruri muri ebyiri zikora biciye mu mwuka zimaze kugera ku rwego rwo kuba zakwifashishwa mu buvuzi mu gihe umubare munini w’ibigo bikomeye mu ikorwa ry’imiti n’ubushakashatsi, bikomeje gushakisha uko haboneka uburyo bwo kurinda umuntu COVID-19 biciye mu mazuru no mu kanwa.

U Bushinwa bukomeje kurwana ngo bugere ku rugero rwo guhashya COVID-19 burundu nubwo kuva mu mpera z’ukwezi gushize imijyi igera kuri 70 yo muri icyo gihugu yagiye ihura n’ibihe byo gushyirwa muri Guma mu Rugo, ibintu byagize ingaruka ku baturage bagera kuri miliyoni 300 nk’uko bigarukwaho na CNN.

Urukingo rwa Convidecia ruhuje ibirugize n’urwa Johnson&Johnson kimwe n’urwa Oxford Astrazeneca aho hifashishwa virusi zitangiza zitera umubiri kwiremamo ubudahangarwa bwo guhangana n’iya COVID-19.

CanSino Biologics nicyo kigo cyakoze uru rukingo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .