U Bushinwa bwashinje USA guca igikuba mu gufata ingamba zo gukumira Coronavirus

Yanditswe na Twarabanye Venuste
Kuya 3 Gashyantare 2020 saa 05:43
Yasuwe :
0 0

Guverinoma y’u Bushinwa yashinje Leta Zunze Ubumwe za Amerika (USA) guca igikuba no kubiba ubwoba mu bantu, mu ngamba yafashe hagamijwe gukumira Coronavirus nshya ikomeje guhitana abantu ibateye umusonga.

U Bushinwa bubitangaje nyuma y’icyemezo cya USA cyo gutangaza Coronavirus nk’ikibazo gihangayikishije urwego rw’ubuzima mu gihugu no kubuza abanyamahanga basuye u Bushinwa mu byumweru bibiri bishize, kwinjira muri icyo gihugu.

Leta Zunze Ubumwe za Amerika ni cyo gihugu cya mbere cyihutiye gukura abaturage bacyo mu Bushinwa ndetse ku Cyumweru cyatangaje ko nta muntu wageze mu Bushinwa wo mu kindi gihugu wemerewe gukandagira ku butaka bwayo.

Ku wa 23 Mutarama nibwo Amerika yategetse ko abaturage bayo bari mu mujyi wa Wuhan aho iki cyorezo gifata imyanya y’ubuhumeker cya Coronavirus cyatangiriye, bakaba badakora muri serivisi z’ubufasha bwihutirwa, ko bagomba guhita bava muri icyo gihugu.

Ubwo ku wa 30 Mutarama Ishami ry’Umuryango w’Abibumbye ryita ku buzima, OMS, ryemezaga coronavirus nk’icyorezo cyugarije Isi, USA yategetse ko abanyamerika bose bari mu Bushinwa, bafite munsi y’imyaka 21, bahava, ndetse umunyamerika wese wakandagiye mu Ntara ya Hubei ibarizwamo umujyi wa Wuhan, agahabwa akato k’iminsi 14 uhereye igihe yagereye muri Amerika.

Umuvugizi wa Minisiteri y’Ububanyi n’amahanga y’u Bushinwa, Hua Chunying, yavuze ko icyo USA ikora ari ukongera ubwoba mu baturage gusa aho gutanga ubutabazi.

Mu kiganiro yagiranye n’abanyamakuru kuri uyu wa Mbere, yavuze ko Leta Zunze Ubumwe za Amerika zabaye igihugu cya mbere cyatanze amabwiriza akumira imigenderanire n’u Bushinwa n’uwo guhamagaza bamwe mu bakozi ba ambasade.

Nk’uko Reuters yabitangaje, yakomeje ati “Ni ibihugu byateye imbere nka Leta Zunze Ubumwe za Amerika bifite ubushobozi buhanitse bwo kwirinda indwara, byafashe iya mbere mu gushyiraho amabwiriza akomeye, binyuranye n’ibyari byasabwe na OMS.”

Yavuze ko nk’igihugu giteye imbere kandi gifite uburyo bukomeye bwo kurwanya indwara, gikwiye gufata ibyemezo byumvikana kandi bifatiye kuri siyansi.

Imibare itangazwa n’u Bushinwa igaragaza ko abantu bamaze kwandura coronavirus nshya ari 17.238 bo mu Bushinwa na 148 bo mu bindi bihugu. Mu bamaze gupfa harimo 361 bo mu Bushinwa n’umwe wo hanze yabwo, waguye muri Philippines ku wa Gatandatu. Hari na 480 bamaze gukira, basezerewe basubira mu miryango yabo.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza