Turishimira ko ababyeyi bahawe amahirwe yo kubyara nubwo baba bafite ubwandu- Minisitiri Gashumba

Yanditswe na Thamimu Hakizimana
Kuya 21 Nyakanga 2019 saa 10:25
Yasuwe :
0 0

Minisitiri w’Ubuzima Dr Diane Gashumba, avuga ko Leta y’u Rwanda yishimira ko abanyarwanda bafite ubuzima bwiza kuko nta mwana ukivuka afite ubwandu bw’agakoko gatera Sida bitewe nuko ababyeyi bafite iyo virusi bahawe amahire yo kubyara abana bazima.

Ibi yabitangaje ku wa Kane, ubwo yari mu Kigo cy’Urubyiruko cya Maison de Jeunes mu Murenge wa Kimisagara, mu birori byo kwizihiza imyaka 15 ya gahunda ya Perezida wa Amerika mu kurwanya Sida, (PEPFAR) imaze itangijwe mu Rwanda.

Yagize ati “Uyu munsi turishimira imyaka 15 ariko turanishimira ubuzima bwiza bw’abanyarwanda, turishimira abana bavuka badafite ubwandu, turishimira ababyeyi ko bahawe amahirwe yo kubyara n’ubwo baba bafite ubwandu bakanahabwa amahirwe yo kubyara abana bifuza ariko bakabona imiti n’igihe bayikenereye.”

Yakomeje agira ati “Ni ikintu cyiza gikomeye kubona imyaka 15 ishira tutarabyuka ngo tubure imiti, tutarabyuka ngo dusange ibyo turimo kubaka birimo gusubira inyuma.”

Ambasaderi wa Leta Zunze Ubumwe za Amerika, Peter Vrooman, yavuze ko PEPFAR kuva yatangira gukora imaze kurengera ubuzima bw’abasaga miliyoni 16 ku Isi.

Yagize ati “Uyu munsi turizihiza isabukuru y’imyaka 15 ya gahunda idasanzwe ya Perezida wa Leta Zunze Ubumwe za Amerika, ndahamya ko uyu munsi dushyize hamwe twafasha kurwanya icyorezo cya Sida mbere y’ibihumbi 2020”.

Kuva PEPFAR yatangira mu 2003 harengewe ubuzima bw’abasaga miliyoni 16 ku Isi. PEPFAR yatanze amadolari asaga miliyoni imwe mu Rwanda mu kurwanya icyorezo cya Sida no kuvura abantu babana na virusi itera Sida.

Yongeyeho ko muri uyu mwaka wa 2019 gusa PEPFAR yateye inkunga muri gahunda zitandukanye zirimo gutanga imiti igabanya ubukana bwa virusi itera Sida ku bantu hafi ibihumbi 100 no kwikebesha ku bushake ku bagabo basaga ibihumbi 150 n’izindi.

Umuyobozi w’urugaga nyarwanda rw’abafite Virusi itera Sida (RRP+), Muneza Sylvie, we yashimye iyi gahunda ya PEPFAR bitewe n’uburyo ikomeje gufasha abanyarwanda bafite virusi itera Sida.

Yagize ati “Turashima PEPFAR kuko abarenga miliyoni imwe mu gihugu bipimishije virusi itera Sida ku bushake bwabo tukanayishIma kuko kugeza ubu abantu barenga ibihumbi 100 bari ku miti mu gihugu cyose no kuba abagabo barenga ibihumbi 250 barahawe serivise zo kwikebesha nka bumwe mu buryo bwo kwirinda ubwandu bushya bwa virusi itera Sida.”

Yongeyeho ko iyi gahunda yahaye ubufasha abana 100 bahuye n’ibyago byo kwandura virusi itera Sida, butuma bakomeza kugira ubuzima bwiza.

Kugeza ubu mu gihugu hose habarirwa abantu bangana na 3% bafite ubwandu bw’agakoko gatera Sida mu gihe mu Mujyi wa Kigali ho habarirwa abagera kuri 7%.

Minisitiri w'Ubuzima Dr Diane Gahumba ari kumwe na Ambasaderi wa Amerika mu Rwanda Peter Vrooman
Umuyobozi w’urugaga nyarwanda rw’abafite Virusi itera Sida (RRP+), Muneza Sylvie, yishimiye gahunda ya PEPFAR
Ambasaderi wa Leta Zunze Ubumwe za Amerika, Peter Vrooman avuga ko iyi gahunda imaze kugera kuri byinshi
Minisitiri w'Ubuzima, Dr Gashumba Diane yishimiye ko ababyeyi bafite virusi itera Sida babyara abana bazima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza