Perezida Kagame yafunguye ikigo kivura kanseri hakoreshejwe imirasire mu Rwanda

Yanditswe na Ferdinand Maniraguha
Kuya 4 Gashyantare 2020 saa 04:36
Yasuwe :
0 0

Perezida Paul Kagame yafunguye ku mugaragaro ikigo kivura indwara za kanseri mu Rwanda hakoreshejwe uburyo bugezweho bwifashisha imashini ikoresha imirasire, igashiririza igice kirwaye gusa (radiotherapy).

Iki kigo cyafunguwe giherereye mu bitaro bya gisirikare bya Kanombe, kikaba ari umwihariko mu karere u Rwanda ruherereyemo kubera ikoranabuhanga gikoresha.

Iki kigo gishya kije cyunganira ubundi buryo bwo kuvura kanseri bwatangirwaga mu bitaro bimwe na bimwe mu Rwanda nk’ubwo kuyivura hifashishijwe imiti (chemotherapy) no kubaga aharwaye.

Perezida Kagame afungura iki kigo, yavuze ko kije gutabara ubuzima bwa benshi no gufasha igihugu n’abagituye kuzigama amafaranga yakoreshwaga bajya kwivuza hanze.

Yagize ati “Twari tumaze igihe dutakaza amafaranga menshi twohereza abarwayi bake hanze kujya kwivuza kanseri. N’ubundi nta mafaranga menshi dufite ariko nayo menshi yavuzaga bake kandi dufite abarwayi benshi.”

Perezida Kagame yavuze ko intego ari ugukomeza kwagura icyo kigo ku buryo kigira ubushobozi bwo gutanga serivisi nyinshi mu bijyanye n’ubuvuzi bwa kanseri.

Ati “ Twubatse iki kigo kandi tuzacyagura mu minsi iri imbere kugira ngo kibashe kwakira benshi. Uyu munsi abanyarwanda benshi barabasha guhabwa ubuvuzi bakeneye n’imiryango yabo, uko iminsi izajya ishira iki kigo kizakura kibashe kugera ku rwego rwo gusuzuma no kuvura abarwayi baba abataha n’ababa mu bitaro.”

Nubwo uyu munsi iki kigo kivura hifashishijwe imirasire, intego ni uko hatangirwa na serivisi zo kuvura kanseri hakoreshejwe imiti ndetse n’uburyo bwo kubaga ku buryo umurwayi wese uhaje, bamuha serivisi bijyanye n’ubwoko bwa kanseri afite ndetse n’ubuvuzi akeneye.

Nubwo kanseri ari indwara itandura kandi yizana, inzobere mu buvuzi zivuga ko ibyago byo kuyirwara hari ubwo nyir’ukuyirwara abigiramo uruhare ku kigero cya 40 %.

Perezida Kagame yasabye abanyarwanda kwirinda ibyo bishobora gutuma bikururira kurwara kanseri.

Ati “Kwirinda ni iby’ingenzi cyane. Hari byinshi biri gukorwa. Twigishijwe byinshi n’abashinzwe ubuzima, twigishwa ko kurya ifunguro ryuzuye intungamubiri , gukora siporo, kutanywa itabi ari imico igabanya cyane ibyago byo kurwara kanseri. Hari ibyo twatangiye gukora ariko turacyafite byinshi byo gukora.”

Yatanze urugero rwa siporo rusange izwi nka Car free day iba hirya no hino mu gihugu, avuga ko ari bumwe mu buryo bwo kwirinda indwara zirimo kanseri.

Minisitiri w’Ubuzima, Dr Diane Gashumba yavuze ko bashyize imbaraga nyinshi mu gusuzuma no kuvura kanseri hirya no hino mu gihugu, ku buryo kugeza ubu ibigo nderabuzima 50% n’ibitaro 50% byo mu Rwanda bishobora gupima kanseri zimwe na zimwe zirimo izibasira abagore.

Yavuze ko ikigo gishya kivura kanseri kije gutanga inyuganizi muri ubwo buvuzi, bikazarinda abarwayi gusiragira.

Ati “ Iki kigo kije kunganira ibindi bitaro byavuraga kanseri bikoresheje imiti cyangwa uburyo bwo kubaga, nk’ibitaro bya Butaro, CHUK, CHUB n’ibitaro byitiriwe umwami Faisal ariko ikigamijwe ni uko tugira ibitaro binini hano bitanga ubwo buvuzi bwose bukomatanyije abarwayi ntibasiragire.”

Captain Dr Félix Sinzabakira, umuganga uvura kanseri hakoreshejwe imirasire n’imiti mu kigo gishya kivura kanseri mu Rwanda, yavuze ko kuba mu Rwanda nta buvuzi bwa kanseri bukoresheje imirasira bwahabaga, byatumaga bakora ingendo za hato na hato bajya gushaka ubwo buvuzi hanze.

Yavuze ko amahirwe ahari ubu, ari uko ikigo cyafunguwe gifite ikoranabuhanga rikomeye mu karere u Rwanda ruherereyemo ku buryo bizakurura abarwayi bavuye mu bihugu bituranye n’u Rwanda kuza kuhivuriza.

Ikoranabuhanga ikigo gishya gikoresha mu gushiririza kanseri ryitwa Volumetric modulated arc therapy, VMAT , aho bavura igice kirwaye kanseri hakoreshejwe imirasire, ikerekezwa ku harwaye gusa.

Ati “Niba ugiye kuvura inkondo y’umura, uzi ko yegeranye n’ibindi bice bidafite uburwayi. Ku nkondo y’umura niho hashyirwa imirasire , ibindi bice bihakikije bigumane ubuzima bwabyo.”

Iki kigo cyatangiye gukora guhera muri Werurwe umwaka ushize. Kimaze kwakira abarwayi basaga 300.

Muri iki kigo gishya hari imashini ebyiri zivura kanseri hakoreshejwe imirasire zizwi nka linear accelerators n’indi imwe isuzuma. Hari abaganga batandatu bazobereye mu kuvura kanseri hifashishijwe izo mashini.

Buri mashini muri izo ebyiri, ifite ubushobozi bwo kuvura abantu nibura 80 ku munsi.

Ubuyobozi bw’iki kigo buvuga ko kizajya cyakira abarwayi bose, barimo bafite ubwishingizi butandukanye burimo na Mutuelle de sante.

Kanseri zibasira abanyarwanda cyane ku bagore hari iy’inkondo y’umura, iy’ibere, igifu naho abagabo iboneka cyane ni iya prostate.

Mu mwaka wa 2018, abantu basaga 3000 nibo bivuje kanseri. Umuryango mpuzamahanga wita ku buzima, OMS uvuga ko Kanseri ari indwara ya kabiri yica abantu benshi ku isi. Nibura umwe mu bantu batandatu bapfa ku isi aba yishwe na kanseri.

Perezida Kagame ubwo yageraga mu bitaro bya Kanombe ahubatse ikigo kivura kanseri
Perezida Paul Kagame (ibumoso) na Ambasaderi wa Leta Zunze Ubumwe za Amerika mu Rwanda, Peter Vrooman ubwo bafunguraga ikigo gishya kivura kanseri hifashishijwe imirasire
Perezida Kagame yafunguye iki kigo gifite ikoranabuhanga rigezweho mu kuvura kanseri hakoreshejwe imirasire
Abayobozi batandukanye bitabiriye umuhango wo gufungura ikigo gishya kivura kanseri
Minisitiri w'Ubuzima, Dr Diane Gashumba yavuze ko ikigo gishya kivura kanseri kije kunganira ibindi bitaro byatangaga ubuvuzi bwa kanseri
Minisitiri w'Ingabo, Maj Gen Albert Murasira yavuze ko ingabo z'u Rwanda zizakomeza gutanga umusanzu mu kubungabunga ubuzima bw'Abanyarwanda biciye mu bikorwa birimo ubuvuzi
Perezida Kagame yashimye ikigo gishya kivura kanseri, avuga kije gufasha igihugu kubika amafaranga yajyaga ajyanwa hanze n'abagiye kwivuza
Umuhango wo gufungura ikigo gishya kivura kanseri witabiriwe n'abantu b'ingeri zitandukanye
Rugera Jeannette uhagarariye Rotary Club mu Rwanda
Nubwo hafunguwe ikigo gishya, Perezida Kagame yagiriye inama abaturage yo gukomeza gushyira imbere uburyo bwo kwirinda aho bishoboka
Inzobere mu buvuzi zabanje gusobanura birambuye ibijyanye n'uburwayi bwa kanseri mu Rwanda, uko yirindwa n'uburyo bwo kuyivura
Abayobozi batandukanye bitabiriye umuhango wo gufungura ikigo gishya kivura kanseri
Iki kigo gishya kirimo ibikoresho bigezweho mu kuvura kanseri
Aha abitabiriye umuhango wo gufungura ikigo kivura kanseri, basobanurirwaga imikorere y'icyo kigo
Imashini izwi nka linear accelerator yifashishwa mu kohereza imirasire itwika utunyangingo twa kanseri
Abitabiriye basobanurirwaga imikorere y'imashini ya linear accelerators yifashishwa mu kuvura kanseri hakoreshejwe imirasire
Mbere yo kuvura umurwayi ufite kanseri, babanza kumunyuza mu mashini igaragaza neza imiterere y'uburwayi bwe
Ikigo gishya kivura kanseri cyafunguwe, giherereye mu bitaro bya gisirikare bya Kanombe

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza