OMS yashimangiye ko nta rukingo rwa Coronavirus ruzemerwa bitaragaragazwa ko rwizewe

Yanditswe na Dufitumukiza Salathiel
Kuya 5 Nzeri 2020 saa 01:38
Yasuwe :
0 0

Mu gihe irushanwa ryo gushaka urukingo rwa coronavirus mu bihugu byo hirya no hino ku Isi rikomeje, ishami rya Loni ryita ku buzima, OMS, ryatangaje ko nta rukingo ruzemerwa bitaragaragazwa ko rwizewe.

Ibi OMS ibitangaje nyuma y’u Bushinwa n’u Burusiya batangiye gukoresha inkingo bavumbuye mbere y’uko zigera ku ntambwe ya nyuma y’isuzuma iri shami ryateganyije.

OMS yaboneyeho gutangaza ko “hari umubare ushimishije” w’inkingo ziri ku rwego rwa nyuma rw’isuzuma.

Mu ijambo rye, umuvugizi wa OMS Margaret Harris yagize ati” Mu buryo bw’igihe kiboneye, ntabwo duteganya ko ikingira rizageza hagati mu mwaka utaha ritaratangira gukorwa hirya no hino.”

Umuyobozi w’inama rusange y’Umuryango w’Abibumbye Tijjani Muhammad-Bande nawe yibukije ko urukingo rwa coronavirus rugomba gusaranganywa nta n’umwe urukeneye uhejwe.

Muhammad-Bande yagize ati” Kuba buri wese abyisangamo niyo turufu; kubera ko abasigajwe inyuma bakomeje kwibasirwa n’iki cyorezo ntiwavuga ngo hari amahoro.”

Nubwo abashakashatsi babanje kuvuga ko urukingo rwa coronavirus rutazaboneka mbere y’amezi 18 uhereye mu mpera za 2019; ubu hari icyizere ko bishoboka cyane, nyuma y’amasuzuma akomeje gukorwa ku nkingo ibihugu bikomeje kugaragaza ko zishobora gukora.

Kugeza ubu mu Isi yose harabarurwa 26,816,887 bamaze kwandura coronavirus, aho 18,923,666, bayikize, naho 879,369 yarabahitanye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .