00:00:00 IGIHE NETWORK KN KINYARWANDA EN ENGLISH FR FRANCAIS

Ni ba rusahuriramunduru- RBC ivuga ku bucuruzi bahanika ibiciro bya Cotex

Yanditswe na Idukunda Kayihura Emma Sabine
Kuya 29 May 2024 saa 10:42
Yasuwe :

Ikigo cy’Igihugu cy’Ubuzima, RBC cyatangaje ko ko leta yakoze ibishoboka kugira ngo ibiciro by’impapuro zisuku zifashishwa mu gihe cy’imihango (cotex) bigabanuke kugeza nubwo zikuriweho umusoro ku nyungu, ariko ko hari abacuruzi ba rusahuriramunduru batigeze bareka kuzihenda.

Ni ibikubiye mu butumwa Umuyobozi w’Agashami Gashinzwe gahunda zo kwita ku buzima bw’ababyeyi n’abana mu mavuriro muri RBC, Dr Cyiza François Regis, yatangiye mu birori byo kwizihiza umunsi mpuzamahanga ngarukamwaka w’isuku iboneye ku bagore n’abakobwa bari mu mihango.

Yavuze ibi nyuma yuko abo mu miryango itegamiye kuri leta yateguye ibi birori irimo AHF Rwanda, Rwanda NGOs Forum, Empower Rwanda, Afro Ark na SAYE Company, bagaragaje ko leta ikwiye kugira ikindi ikora hakagabanywa ibiciro bya ‘cotex’, kuko ihenda ryazo rifite uruhare mu kubadindiriza iterambere.

Dr Cyiza François Regis yavuze ko hakenewe ubufatanye bw’inzego mu guhwitura abacuruzi bakagabanya ibiciro bya ‘cotex’ kuko icyari gikomeye leta yakoze ari ukuzikuriraho imisoro.

Ati ‘‘Umusoro nyongeragaciro (TVA) bawukuyeho mu Kigo cy’Igihugu cy’Imisoro n’Amahoro, ariko abacuruzi ni ba rusahuriramunduru byaranze […] uyu munsi aba ari umunsi mwiza wo kwibutsa ko dukeneye kongera gukora ubuvugizi kugira ngo cya cyemezo cyabaye itegeko twongere twibutse abadepite ko mu by’ukuri ibyo bintu bitigeze biba.’’

Uwase Ariane uri mu bahawe cotex, yavuze ko kugenera cotex z’ubuntu abatishoboye bazikeneye byakabaye igikorwa gihoraho, kuko hari abakoresha uburyo bwa gakondo nk’ibitambaro, ugasanga bibateye ‘infections’ batanafite ubushobozi bwo kwivuza.

Ushinzwe ibijyanye n’ubuzima bw’imyororokere n’uburinganire mu Rugaga rw’Imiryango itari iya leta, Rwanda NGOs Forum, Igihozo Yassina, yavuze ko utavuga ko gahunda y’uburezi kuri bose yagezweho mu gihe hari abana b’abakobwa b’amikoro make basiba ishuri iminsi itanu buri kwezi babuze ‘cotex’ bari mu mihango, kandi basaza babo bo biga iminsi yose.

Ati ‘‘Ntabwo dushobora kuvuga uburinganire, ntidushobora kuvuga uburezi kuri bose, ntidushobora kuvuga kureshya k’umugabo n’umugore mu Muryango Nyarwanda, igihe umwana w’umuhungu ashobora kwiga iminsi 30 yose ariko umwana w’umukobwa akaba afite iminsi itanu ashobora gusiba, kuko nibajya gukora ibizamini ntibazakora ibitandukanye, kandi wa mwana w’umukobwa ntabwo bazamukuriramo bya bindi atize muri ya minsi itanu yasibye.’’

Ibi kandi byashimangiwe na Jennifer Mujuni wahagarariye Umuryango Empower Rwanda, wavuze ko nubwo mu mashuri hashyizweho icyumba cy’umukobwa gishyirwamo ‘cotex’ ku buryo umunyeshuri wagiye mu mihango ari ku ishuri yazikoresha, usanga hari n’aho zitari kubera ihenda ryazo asaba ubufatanye bw’ibigo mu kuzishyiramo.

Abagore n'abakobwa b'amikoro make bifuza ko igikorwa cyo kubafasha kubona cotex cyahoraho
Nubwo imiryango itegamiye kuri leta itanga cotex ku batishoboye, igaragaza ko hakenewe ubufatanye bw'inzego zose kugira ngo iki gikorwa kigere ku bazikeneye bose
Umuyobozi wa WaterAid Rwanda, Vestine Mukeshimana, na we yitabiriye ibirori byo kwizihiza uyu munsi
Dr Cyiza François Regis, wa RBC yavuze ko leta yakoze ibishoboka ngo ibiciro bya cotex bigabanuke, ariko ko abacurizi batabikurikije, asaba ko bahwiturwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .