Muri Amerika hagaragaye umuntu wa mbere wanduye ‘Coronavirus’

Yanditswe na Nkurunziza Ferdinand
Kuya 22 Mutarama 2020 saa 10:55
Yasuwe :
0 0

Inzego z’Ubuzima muri Leta Zunze Ubumwe za Amerika zatangaje ko bwa mbere ku butaka bw’iki gihugu hagaragaye umuntu ufite ubwandu bwa ‘Coronavirus’, mu gace kari hafi y’Umujyi wa Seattle, uhereye muri Leta ya Washington.

Kuri uyu wa Kabiri, Umuyobozi Mukuru w’Ikigo cyita ku Ndwara z’Ubuhumekero muri Leta Zunze Ubumwe za Amerika, Nancy Messonnier, yabwiye itangazamakuru ko uwagaragayeho ubwo bwandu yageze ku kibuga cy’indege cya Seattle tariki ya 15 Mutarama, avuye mu Mujyi wa Wuhan wo mu Bushinwa, ahagaragaye iyi virus bwa mbere.

Akigera ku kibuga cy’indege nta bimenyetso by’ubwandu bwa Coronavirus yagaragazaga, ariko ku Cyumweru yahise yihamagarira inzego z’ubuzima amaze kwibonaho ibimenyetso byayo.

Imyirondoro y’uyu murwayi ubarirwa mu myaka 30 ntiyashyizwe ahagaragara, ariko inzego z’ubuzima muri Amerika zahise zitangira kumwitaho mu bitaro bya Everett.

Leta Zunze Ubumwe za Amerika ziyongereye ku bihugu byagezemo icyorezo cya ‘Coronavirus’, nyuma y’u Bbushinwa, u Buyapani, Koreya y’Epfo, Thaïlande na Taïwan, aho iki cyorezo kimaze guhitana abagera ku icyenda.

Kugeza ubu abaganga batangaje ko ubuzima bw’uyu muntu wagaragaweho ubwandu bwa ‘Coronavirus’ bumeze neza.

Kuva ku wa gatanu w’icyumweru gishize, Leta Zunze Ubumwe za Amerika zashyizeho ubugenzuzi bukomeye ku bibuga by’indege bitatu bya mbere bikomeye muri iki gihugu bya New York JFK, San Francisco na Los Angeles.

Muri iki Cyumweru biteganyijweko ubugenzuzi bwo gukumira iki cyorezo buzanashyirwa ku bibuga by’indege byo mu Mijyi ya Chicago na Atlanta.

Abagenzi bose baturuka mu Mujyi wa Wuhan bategetswe kuzajya banyura kuri kimwe muri ibyo bibuga byashyizweho ubwo bugenzuzi.

Ibimenyetso by’indwara ya Coronavirus birimo kugira umuriro, gukorora no guhumeka nabi. Abenshi mu bagaragayeho iyi ndwara ni abagiye mu isoko barangurizamo amafi n’amatungo muri Wuhan mu Ntara ya Hubei mu Bushinwa.

Iryo soko ryatewe imiti yica udukoko ndetse rihita rifungwa guhera ku itariki ya 1 Mutarama 2020. Kuri uyu wa Mbere tariki ya 20 Mutarama 2020 nibwo Leta y’u Bushinwa yemeje ko abantu bashobora kwanduzanya hagati yabo.

Iyo ndwara yandura ite?

Umuntu yanduzwa Coronavirus n’uwayanduye. Yandurira mu mwuka wahumetswe n’uwakoroye ayanduye. Yandura iyo umuntu akoze ku wayanduye cyangwa amusuhuje; iyo umuntu akoze ku kintu cyangwa ahantu hari iyo virusi noneho agakora ku munwa, ku izuru cyangwa ku maso mbere yo gukaraba intoki ndetse rimwe na rimwe ishobora kwandurira mu mwanda wo mu musarani.

Nta muti wihariye uvura iyo ndwara. Igishoboka kugeza ubu kuyivura batanga imiti ifasha mu guhangana n’ibimenyetso byayo.

Iyi virusi yafashwe nk’ikibazo kubera ko iki cyorezo kimaze kugaragara ku bantu bagera kuri 440 bamaze kuyandura, icyenda bo bakaba bamaze kwitaba Imana.

Coronavirus yandurira mu mwuka abantu bahumeka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .