00:00:00 IGIHE NETWORK KN KINYARWANDA EN ENGLISH FR FRANCAIS

Monkeypox yihinduranyije ku muvuduko utari witezwe

Yanditswe na Zigiranyirazo Bajecteur
Kuya 25 June 2022 saa 12:50
Yasuwe :

Abashakashatsi bakurikiranira hafi ibya virusi ya Monkeypox batangaje ko basanze iyi virusi yarihinduranyije cyane kandi ku muvuduko wo hejuru mu buryo butari bwitezwe.

Newsweek itangaza ko ibyavuye muri ubu bushakashatsi bwakozwe n’abanya-Portugal, byasohotse mu kinyamakuru cya Nature Medicine aho bahurije hamwe amakuru bavanye kuri virusi 15 ziganjemo izo bakuye muri icyo gihugu no mu bindi bice maze baza gutungurwa no kubona zigiye zitandukanye mu buryo batatekerezaga mbere.

Iki cyorezo bikunda kuvugwa ko cyakomotse mu nkende zo muri Afurika yo Hagati n’iy’Uburengerazuba, gikunda gusanishwa n’icya smallpox cyigeze kwibasira isi kigahitana ababarirwa muri miliyoni 800, icyakora muri uyu mwaka cyagiye kiboneka mu bihugu byo ku migabane itandukanye bitanafite aho bihuriye n’aho hakundaga gufatwa nk’indiri n’inkomoko yacyo.

Kugeza ku wa Kane w’iki cyumweru hari hamaze kubarurwa abarenga 3500 hirya no hino ku isi bamaze kwandura iyi virusi nk’uko imibare y’Ikigo cya Leta Zunze Ubumwe za Amerika gishinzwe gukurikirana no gukumira ibyorezo (CDC) ibigaragaza.

Iyi virusi abantu bashobora kuyanduzanya binyuze mu gukoranaho n’uwayirwaye, kurya inyama z’inyamaswa iyifite ndetse ishobora no kwandura biciye mu matembabuzi mu gihe kuri ubu amakuru anavuga ko ishobora guhanahanwa biciye mu mwuka n’inzira z’ubuhumekero.

Abashakashatsi mu by’ubuzima ubu bahangayikishijwe n’ukuntu iyi virusi yatangiye kujya yihinduranya mu buryo butari bwitezwe kandi ikanakwirakwira ku muvuduko wo hejuru ugereranyije n’uko yari isanzwe imenyerewe.

Mu bushakashatsi buherutse gukorwa, havumbuwe ko hari ingirabuzimafatizo 50 z’iyi virusi zihinduranyije bagereranyije n’ubwari bwarakozwe kuri virusi zo mu 2018 na 2019 ku buryo ari nabyo byashingiweho havugwa ko iri kwihinduranya mu buryo n’umuvuduko bitari byitezwe.

Itsinda ryakoze ubushakashatsi ryagize riti “Amakuru twakusanyije agaragaza ibimenyetso bifatika by’ukwihinduranya kw’iyi virusi ku buryo ishobora guhangara abasirikare b’umubiri w’umuntu.”

Bakomeza bavuga ko hagikenewe gukora ubucukumbuzi bwimbitse kugira ngo hamenyekane ibyago iki cyorezo gishobora kuzanira Isi mu gihe iyi virusi igitera yakomeza kwihinduranya ku rugero n’uburyo byagaragayeho.

Abashakashatsi bavuga ko mu gihe abatuye isi babasha kumenya amakuru yo kwihinduranya kwa monkeypox, bishobora kubatera gukaza ingamba zo kwirinda bikaba byayihagarika dore ko ubusanzwe imibare yagaragazaga ko abahitanwa nayo baba bari munsi y’umwe ku ijana ndetse hariho n’uburyo bwo kuba abantu bahabwa urukingo rwayo.

Virusi ya Monkeypox ikomeje kwihinduranya cyane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .