Minisitiri Gashumba yagaragaje impamvu ituma malaria yibasira Afurika

Yanditswe na Evariste Nsengimana
Kuya 22 Mata 2019 saa 05:29
Yasuwe :
0 0

Minisitiri w’Ubuzima, Dr. Diane Gashumba, yagaragaje ko Malaria ikomeje kwibasira abaturage benshi muri Afurika bitewe n’uko ibihugu bigize uwo mugabane bidashyira hamwe muri gahunda zo kuyikumira.

Raporo y’Ishami ry’Umuryango w’Abibumbye ryita ku Buzima, OMS, igaragaza ko mu 2016 mu bantu barenga miliyoni 216 barwaye malaria ku Isi, abarenga ibihumbi 445 yabishe.

Iyo raporo igaragaza ko 90% by’abarwaye Malaria na 91% by’abo yishe mu 2016 ari abo ku mugabane wa Afurika. Si ibyo gusa kuko muri uwo mwaka malaria yashegeshe ubukungu bwa Afurika ku kigero cya 1.3%.

Kuri uyu wa 22 Mata 2019, i Kigali hateraniye inama yahuje abafite mu nshingano kurwanya malaria muri Afurika y’Iburasirazuba na Repubulika Iharanira Demokarasi ya Congo.

Muri iyi nama igamije kwihutisha ishyirwa mu bikorwa ry’imyanzuro yafashwe n’abakuru b’ibihugu byabo mu rwego rwo kurwanya malaria, Minisitiri Gashumba yavuze ko kudashyira hamwe kw’ibihugu bigize Afurika biri mu bituma yiyongera.

Dr. Gashumba yavuze ko kuba imibare y’abarwaye n’abicwa na malaria myinshi igaragara muri Afurika, bigaragaza imikoranire mike y’ibihugu bigize uwo mugabane.

Ati “Ntabwo buri wese yakomeza gukora ukwe, ntabwo buri wese yakomeza gushyiraho ingamba yihariye. Tudakoreye hamwe ntabwo byakunda, niyo mpamvu imibare itagabanuka cyane.”

Minisitiri Gashumba yabwiye abitabiriye iyo nama ko ibihugu bituranyi bikwiye gushyira hamwe, bikanoza igenamigambi mu gukumira no kurwanya malaria muri Afurika.

Raporo ya OMS iheruka kugaragaza ko u Rwanda na Ethiopie aribyo bihugu muri Afurika byabashije kugabanya umubare w’abarwara n’abicwa na Malaria. Muri iyo myaka ibiri, u Rwanda rwagabanyijeho abayirwara barenga ibihumbi 430.

Minisitiri Gashumba ati “Kikaba ari ikintu cyiza rero ariko tugomba gukomeza gushyiramo imbaraga kugira ngo dukomeze gutera intambwe irushijeho.”

Umuyobozi wa Gahunda yo kurwanya Sida na Malaria mu Muryango wa Afurika y’Iburasirazuba, Dr. Michael Katende, yasabye ko guverinoma z’ibihugu bya Afurika ziteganya amafaranga yo gushyigikira gahunda zo kurwanya malaria.

Kwirinda malaria birashoboka cyane binyuze mu gutema ibihuru bikikije inzu, gusiba ibidendezi by’amazi, kurara mu nzitiramubi, kwihutira kwivuza igihe bagaragaje ibimenyetso byayo birimo kubabara umutwe, kubabara mu ngingo, guhinda umuriro, kugira iseseme n’ibindi.

Minisitiri Gashumba ubwo yari mu kiganiro n'itangazamakuru
Minisitiri Gashumba yagaragaje ko hakenewe ubufatanye mu bihugu bya Afurika kugira ngo malaria ihashywe

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza