00:00:00 IGIHE NETWORK KN KINYARWANDA EN ENGLISH FR FRANCAIS

Minisiteri y’Ubuzima mu rugendo rwo gushyira amaraso mashya mu bajyanama b’ubuzima yibanze ku bakiri bato

Yanditswe na Thamimu Hakizimana
Kuya 8 July 2022 saa 07:39
Yasuwe :

Minisiteri y’Ubuzima ifite gahunda yo gushyira amaraso mashya muri gahunda y’abajyanama b’ubuzima, ku buryo mu minsi iri imbere abakora uyu mwuga baba ari abari hagati y’imyaka 20 na 45, hanyuma abakuze bari basanzwe bagasigara bagira inama banamenyereza abo bakiri bato.

Mu bushakashatsi bwakozwe n’iyi Minisiteri, byagaragaye ko hari abajyanama b’ubuzima bagiye mu zabukuru n’abaretse ako kazi ku mpamvu zitandukanye.

Minisitiri w’Ubuzima, Dr. Daniel Ngamije, yavuze ko basanze abantu bafite imyaka iri hagati ya 20 na 45 ari bo babasha gukurikirana neza gahunda zose z’abajyanama b’ubuzima, ari nayo mpamvu hatekerejwe ku mpinduka.

Dr. Ngamije yavuze ko ikigamijwe ari uko abajyanama b’ubuzima batanga serivisi nziza.

Yagize ati “Dushaka ko batanga serivisi mu buryo bukomatanyirije hamwe aho kugira ngo tugire abajyanama bahuguwe muri gahunda zitandukanye, bose uko ari bane bahurira mu mudugudu umwe aho umwe aba adashabora gukora iby’undi ashoboye, mu gihe atabonetse serivisi ntizibashe kuboneka ku bazikeneye.”

Yongeyeho ko mu kuvugurura gahunda y’abajyanama b’ubuzima bakemura ibibazo biyigaragaramo birimo kuba ari urwego rugaragaramo abageze mu zabukuru, bifuza kuzanamo amaraso mashya y’abakiri bato.

Ati “Hari abamaze gukura bafite intege nke, ikindi turashaka no kuzana ikoranabuhanga mu mikorere y’abajyanama b’ubuzima aho usanga dukeneye ko tugira abantu bakiri bato bashobora kwiga ubwo bumenyi bushya no gukoresha iryo koranabuhanga ryadufasha mu gutanga raporo, no mu kuba twabakurikirana ndetse tukabagira inama.”

Yakomeje agaragaza imiterere y’ikibazo gituma serivisi z’ubuzima zitaboneka neza, avuga ko biterwa n’uko hari abajyanama b’ubuzima bakora ibintu bimwe. Ati “Hari abavura malaria, imisonga n’impiswi, tukagira abita ku ndwara z’ubuzima bw’imyororokere no ku isuku ndetse [n’abakora mu] guteza imbere inzego z’ubuzima, ugasanga gukora muri ubwo buryo bw’amatsinda bidatuma serivisi ihora iboneka.”

Kuri iyi nshuro, yavuze ko gahunda bafite ari uguhugura abajyanama b’ubuzima muri serivisi zose kugira ngo babone ubumenyi butandukanye, bikemure ikibazo cya za serivisi zajyaga zibura kuko umwe mu bajyanama b’ubuzima adahari.

Umuyobozi w’Ibitaro bya Byumba, Uwizeye Marcel, yagarutse ku ruhare rw’abajyanama b’ubuzima mu kugeza serivisi z’ubuzima ku baturage.

Ati “Abajyanama nibo bantu bakomeye cyane badufasha mu bigendanye n’ubuzima mu kurinda abaturage bacu kuko ibyo bakora ni ibirinda indwara.”

Ushinzwe gukurikirana ibibazo by’abajyanama b’ubuzima mu Bitaro bya Kigeme mu Karere ka Nyamagabe, Nibagwire Marie Alice, yemeza ko kuba abajyanama b’ubuzima bakuze bagiye gusimbuzwa abato bizatanga umusaruro muri serivisi z’ubuzima.

Yagize ati “Kuba bagiye gusimbuzwa n’abakiri bato bizagira umumaro kuko turi kujya mu Isi y’ikoranabuhanga mu gihe abakuze bari bamenyereye gukoresha ikaramu n’urupapuro ku buryo byaduteraga impungenge ko haje gukoresha ikoranabuhanga byabagora, cyane ko mu minsi iri imbere ari ryo rigiye kujya rikoreshwa mu kuzuza za raporo n’ibindi.”

Iyi gahunda yo gushyira amaraso mashya muri gahunda y’abajyanama b’ubuzima ije mu gihe mu Rwanda habarurwa abajyanama b’ubuzima bagera ku bihumbi 50, biteganyije ko bazagabanuka bakagera ku bihumbi 35.

Umuyobozi w’Ibitaro bya Byumba, Uwizeye Marcel yagarutse ku ruhare rw’abajyanama b’ubuzima mu kugeza serivisi z’ubuzima ku baturage
Ushizwe gukurikirana ibibazo by’abajyanama b’ubuzima mu Bitaro bya Kigeme mu Karere ka Nyamagabe, Nibagwire Marie Alice, yemeza ko kuba abajyanama b’ubuzima bakuze bagiye gusimbuzwa abato bizatanga umusaruro muri serivisi z’ubuzima
Inzego zitandukanye zifite aho zihuriye n'urwego rw'ubuzima zari zitabiriye iki gikorwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .