Minisante yafatiye ingamba ibikoresho byajyaga mu bitaro bidakenewe

Yanditswe na Ferdinand Maniraguha
Kuya 19 Nzeri 2019 saa 02:49
Yasuwe :
0 0

Minisiteri y’Ubuzima (Minisante) yatangaje ko yamaze gufata ingamba zizatuma nta bikoresho byongera kujya mu bitaro bidakenewe nk’uko byakunze kujya bigaragara.

Raporo y’Umugenzuzi Mukuru w’Imari ya Leta y’umwaka warangiye muri Kamena 2018, yagaragaje ko mu bitaro by’uturere hari imitungo n’ibikoresho bifite agaciro ka 322,433,517 Frw bidakoreshwa, bigateza igihombo Leta kuko biba byaraguzwe amafaranga.

Iki kibazo cyongeye kugaragazwa kur uyu wa Kane n’abadepite bagize Komisiyo Ishinzwe gukurikirana imikoreshereze y’Umutungo wa Leta, PAC ubwo bakiraga ubuyobozi bwa Minisante n’ubw’ibitaro by’Uturere ngo bisobanure ku makosa yagaragaye muri raporo y’umugenzuzi mukuru w’imari.

Abadepite batanze urugero rwo mu bitaro bya Bushenge mu Karere ka Nyamasheke, aho umugenzuzi mukuru w’imari yasanze imashini zitandukanye zifashishwa mu buvuzi n’ibindi bikoresho bidakoreshwa kuva byazanwa muri 2013.

Perezida wa PAC, Dr Ngabitsinze Jean Chrysostome yagize ati “Ugasanga hamwe bavuga ngo RBC yaduhaye iyi mashini ariko ntirakora kuva yahagera. Na Bushenge murazifite nyinshi. Inyinshi ziba ari imashini zifatika ariko ugasanga ziri mu ikarito zimaze imyaka itatu.”

Umuyobozi w’Ibitaro bya Bushenge, Tuganeyezu Vedaste yavuze ko ayo makosa yabayeho mbere ariko guhera mu 2017 ngo Minisante yashyizeho uburyo bwo kumenya ahari ibikoresho by’ubuvuzi bidakoreshwa kugira ngo bihabwe ababikeneye.

Ati “ Dufatanyije na Minisante na RBC, hakozwe raporo igaragaza ibyo bikoresho kimwe ku kindi hanyuma hategurwa n’uburyo bwo kubiha ababikeneye. Muri iyi minsi bigiye gukorwa hanyuma batangire babikwirakwize ahandi bikenewe.”

Umunyamabanga Uhoraho muri Minisante, Dr Jean Pierre Nyemazi yavuze ko icyatumaga ibikoresho bimwe bijya aho bidakenewe ari uko nta nyigo yabanzaga gukorwa mu buryo bwimbitse ngo hamenyekane ibikoresho nyirizina bikenewe no kuba hatari hari uburyo ibikoresho bitangwa n’abagiraneza bigenzurwa.

Ati “Impamvu ya mbere yari ihari inyigo zitakorwaga neza kugira ngo ukore ibikenewe umenye ngo iki gikoresho koko kizajya Bushenge, ntabwo byakorwaga neza. Icya kabiri urwego rw’ubuzima ruterwa inkunga n’abantu batandukanye ku buryo budahurije hamwe , washoboraga no kuzana ibikoresho ugasanga hari undi wakizanye wenda yagitanze nk’impano.”

Nyemazi yavuze ko hasohotse amabwiriza agenga uburyo ibikoresho bitangwa mu bitaro, ku buryo ikibazo nk’icyo kitazongera kubaho.

Umwe mu bakozi b’agashami gashinzwe ikoranabuhanga n’ibikorwa remezo mu Kigo cy’Igihugu gishinzwe Ubuzima (RBC), yavuze ko bamaze gukora ibarura ry’ibikoresho by’ubuvuzi biri mu bitaro bidakoreshwa kugira ngo bijyanywe aho bikenewe.

Ati “ Twagiye mu bitaro byose tureba buri kintu kuko hari ibyari bimazemo igihe bikeneye kwitabwaho byihariye. Twasanze ibyinshi bikeneye kuba byasanwa mbere y’uko ibitaro babikoresha cyangwa bijyanwa ahandi, ibishya twatangiye kubiha ibitaro bibikeneye.”

Hatanzwe urugero rw’Ikigo nderabuzima cya Rusizi giherutse gusaba ibikoresho bakagiha ibyari mu bindi bitaro bidakoreshwa aho kujya kubagurira ibindi bishya.

Minisante yagaragaje ko ikindi kibazo gikunze kubaho ari ubuke bw’inzobere mu gusana no kwita ku bikoresho by’ubuvuzi ku buryo hari ibyangirika utuntu duto bikabikwa kuko nta nzobere mu kubisana zihari.

Dr Ngabitsinze yavuze ko bidakwiriye ko ibikoresho bijyanwa ahantu bidakenewe
Bamwe mu bayobozi b'urwego rw'ubuzima bitabye PAC
Umunyamabanga Uhoraho muri Minisante, Dr Jean Pierre Nyemazi yavuze ko icyatumaga ibikoresho bimwe bijya aho bidakenewe ari uko nta nyigo yabanzaga gukorwa mu buryo bwimbitse ngo hamenyekane ibikoresho nyirizina bikenewe
Depite Ntezimana Jean Claude, umwe mu bagize PAC
Abadepite bagize PAC ubwo bakiraga Minisante, RBC n'ibitaro by'uturere

Amafoto:Munyarugerero Gift


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza