00:00:00 IGIHE NETWORK KN KINYARWANDA EN ENGLISH FR FRANCAIS

Kwinjira muri gare zimwe i Kigali hari gusabwa urukingo rwa kabiri rushimangira

Yanditswe na Akayezu Jean de Dieu
Kuya 14 August 2022 saa 05:39
Yasuwe :

Ku muntu umaze amezi ane ahawe doze ya mbere y’urukingo rushimangira rwa Covid-19 kuri ubu ntabwo yemerewe kwinjira hamwe mu hahurira abantu benshi nko muri Gare mu gihe cyose atarahabwa doze ya kabiri ishimangira.

Guhera ku wa Mbere tariki ya 8 Kanama 2022 nibwo u Rwanda rwatangiye gutanga doze ya kabiri ishimangira ariko hibandwa ku bakuze bari hejuru y’imyaka 60 n’abandi bafite intege nke z’umubiri.

Mu gitondo cyo kuri iki Cyumweru, tariki 15 Kanama 2022, nta muntu wari wemerewe kwinjira muri gare yo mu Mujyi rwagati ahazwi nka ‘Downtown’ atagaragaje ko yakingiwe.

Umwe mu bari bagiye muri gare akangirwa kwinjira yavuze ko urubyiruko rw’abakorerabushake ruba ruri imbere ya gare rwemerera umuntu kwinjiramo ari uko yerekanye ko yakingiwe Covid-19 nk’uko bisanzwe bikorwa ahantu hatandukanye.

Avuga ko ku muntu umaze amezi ane ahawe doze ya mbere y’urukingo rushimangira, asabwa guhabwa iya kabiri n’abakozi b’Ikigo cy’Igihugu gishinzwe Ubuzima, RBC, cyangwa ntiyemererwe kwinjira muri Gare.

Ati “Bakubaza niba warakingiwe byuzuye ndetse waranahawe doze ishimangira, iyo basanze umaze amezi ane uyihawe, uhitamo kugenda bakagukingira mbere yo kwinjira muri gare cyangwa ugasubira inyuma ntiwemererwe kwinjiramo.”

Umunyamabanga wa Leta muri Minisiteri y’Ubuzima, ushinzwe Ubuzima bw’Ibanze, Dr Mpunga Tharcisse, aherutse gutangaza ko gutanga doze ya kabiri y’urukingo rushimangira byatewe n’imihindagurikire ya virusi ikomeje kubaho.

Yagize ati “Virus ya Covid-19 igenda ihindagurika kandi inkingo dukoresha zakozwe hagendewe kuri virusi yari iriho icyorezo kicyaduka. Twatangije gahunda ya doze ya kabiri ishimangira y’urukingo rwa Covid-19 duhereye ku bakuze n’abandi bafite intege nke mu mubiri.”

Imibare ya Minisiteri y’Ubuzima igaragaza ko kugeza ubu abagejeje imyaka yo gukingirwa bamaze guhabwa dose ya mbere y’urukingo ari 9.150.154 (101%) mu gihe abahawe ebyiri ari 8.870.113 (97.9%).

Ku rundi ruhande abamaze guhabwa dose ishimangira 5,269,254 (58.1%).

Ikigo cy’Igihugu cy’Ubuzima, RBC, kibinyujije ku rukuta rwacyo rwa Twitter cyatangaje ko abakuze bafite imyaka 60 kuzamura ari bo bari mu bari guhabwa urukingo rwa kane.

Ubwo butumwa bugira buti "Doze ya 2 ishimangira y’urukingo rwa #COVID19 ubu iri guhabwa abakuze bafite kuva ku myaka 60 kuzamura ndetse n’abarwaye indwara zidakira bafite kuva ku myaka 50 kuzamura.’’

Abari muri ibi byiciro bahabwa umwihariko kuko mu gihe banduye COVID-19 bari mu bashobora kuzahazwa na yo cyane kurusha abandi.

Impamvu ari ngombwa gufata urukingo rushimangira

Ubushakashatsi bwerekanuye ko abantu bahabwa inkingo nyinshi za Covid-19 bigenda bigabanya ibyago byo kwanudura no kuzahazwa n’iyi ndwara.

Ubushakashatsi bwakorewe muri Israel, igihugu kiri mu bimaze gutanga inkingo nyinshi za Covid-19, bwerekanye ko nk’abaganga bamaze guhabwa inkingo enye bafite ibyago bike cyane byo kwandura.

Ni ubushakashatsi bwatangajwe mu kinyamakuru cya American Medical Association ku wa Kabiri.

Bwerekanye ko nk’abaganga bahawe inkingo enye za mRNA (Pfizer cyangwa Moderna), bagezweho n’ubwandu kuri 7%, mu gihe abahawe inkingo eshatu, urwa gatatu bakaruhabwa kugeza mu mpera za Nzeri umwaka ushize, banduye kuri 20%.

Leta Zunze Ubumwe za Amerika yo irimo kugira ihame urukingo rwa gatatu (urwa mbere rwo gushimangira) ku bantu baregeje imyaka itanu.

Ni mu gihe abarengeje imyaka 50 bemererwe urukingo rwa kabiri rwo gushimangira, cyangwa abantu barengeje imyaka 12 bafite ubundi burwayi bukomeye.

Kugeza ubu inkingo zitangwa muri doze zo gushimangira ni iza Pfizer-BioNTech, Moderna na Jansen.

Abarengeje imyaka 18 bamaze amezi ane bishimangije barimo kwishimangiza bwa kabiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .