00:00:00 IGIHE NETWORK KN KINYARWANDA EN ENGLISH FR FRANCAIS

Kugabanyuka kw’impfu za malaria na SIDA: Umusaruro wa Global Fund imaze imyaka 18 mu Rwanda

Yanditswe na Ntabareshya Jean de Dieu
Kuya 14 Nzeri 2021 saa 01:08
Yasuwe :
0 0

Minisiteri y’Ubuzima yatangaje ko Umuryango Mpuzamahanga utera inkunga ibikorwa by’ubuvuzi bw’indwara zirimo virus itera Sida, igituntu na Malaria , Global Fund wagize uruhare rukomeye mu kuzirwanya mu gihugu mu myaka isaga 20 umaze ukorera mu Rwanda.

Ibi Umunyamabanga uhoraho Muri Minisiteri y’Ubuzima, Zachee Iyakaremye, yabigarutseho ubwo umuryango Global Fund wizihizaga isabukuru y’imyaka 20 umaze uvutse.

Yagize Ati "Inkunga yayo iza mu buryo butandukanye, burimo ubw’amafaranga n’uburyo bwo gutanga inama. Ibyo byose bifasha Abanyarwanda bahura n’izo ndwara eshatu. Ubu dufite aho twavuye mu myaka hafi 20 dukorana na Global Fund mu kugabanya ubwandu bushya bw’izo ndwara, kuvura abahuye nazo ndetse no kugabanya abapfa bahitanywe nazo."

Yavuze ko mu guhangana n’izo ndwara eshatu, amafaranga menshi ashorwamo ava muri global Fund.

Ati "Inkunga yayo iracyakenewe kugira ngo dukomeze gusigasira ibyo tumaze kugeraho, twirinda ko twasubira inyuma ndetse no kubasha kugira ibyo tugeraho. Kuba hari umuntu ugipfa yishwe na Malaria ntabwo ari cyo twifuza."

Yavuze ko hari icyizere cy’uko muri 2030 intego yo kuba nta muntu uzaba akicwa na Malaria, nta wandura Virusi itera SIDA n’igituntu bitewe n’uko ari indwara zahagurukiwe n’inzego zose.

Ati “Si urugamba rw’umuntu umwe, ni nayo mpamvu na Global Fund ari ikigega cy’isi yose. Abafatanyabikorwa batandukanye bagashyiramo imbaraga. Icyizere turagishingira ku myumvire y’abanyarwanda aho bagenda bashyira mu bikorwa ibyo tubabwira.

Mu rwego rwo kwirinda Malaria, Global Fund yagiye itanga inzitiramibu mu bihe binyuranye, imiti ndetse n’amahugurwa atandukanye agamije gukangurira Abanyarwanda guhangana nayo mu gihe n’igituntu hatanzwe ubufasha bwo kugihashya mu buryo bunyuranye."

Asaga miliyari y’Amadorali amaze gutangwa na Global Fund

Kuva muri 2003, imyaka 18 irashize Global Fund itangiye gukorera mu Rwanda. Uyu muryango wakoze byinshi muri gahunda z’ubuvuzi n’ubukangurambaga ku ndwara zirimo Malaria, igituntu na virusi itera SIDA.

Muri iyo myaka uwumvaga ko yarwaye imwe muri zo ndwara, byasaga no gupfa.

Icyo gihe Umuryango Global Fund watangiye ufasha Abantu bari bafite ubwandu bw’agakoko gatera SIDA, ukabafasha kubona imiti no kubagira inama.

Uhagarariye abafite Virusi itera SIDA muri Sosiyete Sivile, Nizeyimana Isabelle, yavuze ko kuboneka kw’imiti igabanya ubukana byongeye gutanga icyizere cyo kubaho ku bantu bari naramaze kwiheba

Yagize ati "Imiti itaraboneka abantu bapfaga ari benshi, mbese nta cyizere cyari gihari. Ariko muri 2003 nibwo mu Rwanda hatangiye kuza imiti izanywe na Global Fund."

Yakomeje agaragaza ko icyo gihe n’ubwo bitari byoroshye, Global Fund yazanye imiti ariko iherekejwe n’ubundi bufasha burimo ibiryo ndetse no kwishyurira amashuri abana b’abantu bafite ubwandu.

Yakomeje agira ati "Imiti imaze kuboneka no kwishyurira abana amashuri, abantu bahise basa n’aho babonekewe, ubuzima bwongeye kugaruka bagira icyizere cy’ubuzima.”

Nizeyimana yasabye urubyiruko nk’urugifite imyumvire yo guterwa ipfunwe n’ibikorwa byo kwisuzumisha ngo rumenye uko ubuzima bwarwo ruhagaze, kwitabira kubikora kugira ngo n’ufite ikibazo abashe gufashwa mu buryo buboneye.

Ati "Urubyiruko rwo na n’ubu ruracyafite ibibazo, ujya kubona umuntu araje akavuga ngo njyewe narakize, nyamara ukaza kumubona byamurenze yajyanwe mu bitaro. Iyo tugize Imana ntapfe icyo gihe amenya uko afata imiti neza. Urubyiruko nubu ruracyananirana. Usanga rwiha akato."

Kugeza ubu imibare igaragaza ko impfu ziterwa na SIDA zagabanutse ku kigero cya 24%, iza Malaria zigabanuka ku kigero cya 60% naho igituntu zigabanuka ku 46% mu gihe intego ari uko nta muntu ugomba kuzaba yicwa n’izo ndwara muri 2030.

Abitabiriye bashimye uruhare rwa Global Fund mu iterambere ry'urwego rw'ubuzima mu Rwanda
Ambasaderi w'u Bwongereza mu Rwanda, yavuze ko nta muntu ukwiye kwicwa na malaria, asaba ibihugu guhagurukira rimwe bikayirandura burundu
Umunyamabanga uhoraho Muri Minisiteri y'Ubuzima Zachee Iyakaremye yagaragaje ko intego yo kuba muri 2030 nta muntu uzaba akicwa na Malaria, SIDA n'igituntu izagerwaho
Isabelle Nizeyimana yansabye urubyiruko gutinyuka kwipimisha Virusi itera SIDA kugira ngo rumenye uko ruhagaze, rufate ingamba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .