Ishusho ya Coronavirus mu minsi 10: Nta murwayi waturutse mu baturage hagati

Yanditswe na Cyprien Niyomwungeri
Kuya 28 Gicurasi 2020 saa 10:39
Yasuwe :
0 0

Imibare ya Minisiteri y’Ubuzima yo kuri uyu wa Gatatu tariki 27 Gicurasi 2020, yerekana ko abamaze kwandura Coronavirus mu Rwanda ari 346 babonetse mu bipimo 62 502 byafashwe, abakize ni 245, abakirwaye ni 101, nta n’umwe uricwa n’iki cyorezo.

Kuri uyu wa Gatatu gusa habonetse abantu barindwi basanganywe Coronavirus mu bipimo 2059 byafashwe mu gihe umwe ariwe wasezerewe mu bitaro nyuma yo gukira.

Imibare y’abanduye Coronavirus, irerekana ko muri iyi minsi bari kuboneka cyane mu bashoferi b’amakamyo yambukiranya imipaka n’abo bakorana ndetse n’abaturuka hanze y’igihugu batashye.

Minisitiri w’ubuzima Dr Ngamije Daniel, yavuze ko mu bushakashatsi butandukanye bwo kureba uko icyorezo gihagaze mu gihugu, byagaragaye ko kitari mu baturage ku buryo gikwirakwizwa ntawe uzi uwanduza undi mu baturage. Ibi ni nabyo byagendeweho hafatwa icyemezo cyo kugira ngo imirimo itandukanye isubukurwe.

Yakomeje avuga ko muri iyi minsi imibare y’abanduye Coronavirus itangazwa nta muturage w’imbere mu gihugu urimo.

Ati “Abantu duhora dutangaza muri iyi minsi abenshi ni abava mu cyiciro cy’abatwara amakamyo ya rukururana cyangwa se abantu bari bagiye mu bihugu hanze”.

Minisitiri Ngamije atanga icyizere ko hari ingamba zafashwe zo gutuma Coronavirus, itambuka imipaka y’u Rwanda ngo yinjire mu gihugu, aho uwambutse wese asuzumwa, yaba yaranduye akajyanwa aho avurirwa yaba ataranduye agashyirwa mu kato nk’uko amabwiriza abiteganya.

Ati “Ingamba zihari ni uko ntabwo twafunga imipaka ibyo birumvikana ariko abinjira turabasuzuma, ku buryo muri bo uwanduye ntaho aducikira rwose, turamwakira, tukamusuzuma, ufite ubwandu tukajya kumuvurira ahantu habugenewe, udafite ikibazo agakomeza ubuzima bwe busanzwe”.

Ku mipaka yose y’u Rwanda hashyizwe amatsinda y’abaganga bakira abantu baje, bakareba ufite ibimenyetso, bagasuzumwa bakajya gupimwa, bagategereza ya minsi yo kuba mu kato, ugaragayeho uburwayi ajya kuvurwa, udafite ikibazo akarekurwa amaze kurangiza iminsi ye y’akato.

Imiterere y’ubwandu mu mibare

- Tariki 18 Gicurasi: Habonetse abantu batanu bose baturutse hanze

- Tariki 19 Gicurasi: Habonetse abantu 10 baturutse hanze n’umwe wahuye n’uwanduye

- Tariki 20 Gicurasi: Habonetse batandatu baturutse hanze

- Tariki 21 Gicurasi: Habonetse batanu baturutse hanze n’umwe wahuye n’uwanduye

- Tariki 22 Gicurasi: Habonetse umwe waturutse hanze

- Tariki 23 Gicurasi: Habonetse bane baturutse hanze

- Tariki 24 Gicurasi: Habonetse babiri baturutse hanze

- Tariki 25 Gicurasi: Habonetse icyenda baturutse hanze

- Tariki 26 Gicurasi: Habonetse umwe waturutse hanze na babiri bahuye n’uwanduye

- Tariki 27 Gicurasi: Habonetse abantu barindwi baturutse hanze

Kuba imibare yerekana ko mu baturage imbere mu gihugu nta bwandu burimo, biri mu byatumye inama y’Abaminisitiri yo kuwa 18 Gicurasi, yemeza ko ingendo zihuza intara n’Umujyi wa Kigali zizongera gusubukurwa ku wa 1 Kamena ndetse ko ari nawo munsi moto zitwara abantu zizemererwa kongera gukora.

Mu ngamba zatangiye kubahirizwa kuwa 4 Gicurasi, imihango yo gushyingura yagombaga kujyamo abantu batarenze 10 ariko barongerewe bagirwa 30. Ishyingirwa imbere y’Ubuyobozi ryaremewe ariko rigomba kwitabirwa n’abantu batarenze 15. Iyindi mihango nko gusezerana mu nsengero cyangwa byo kwiyakira ntibyemewe.

Izi ngamba zizakomeza gukurikizwa mu gihe cy’iminsi 15, kugeza kuwa 4 Kamena ari nabwo hazasohoka andi mabwiriza mashya yo gukurikiza. Bisobanuye ko habura iminsi itandatu ngo hatangwe andi mabwiriza mashya.

Imibare yerekana ko kuva kuwa 18 Gicurasi kugeza kuwa 27 Gicurasi, abantu 48 bakize Coronavirus bagasezererwa.

Icyizere ku bikorwa bitarafungurwa

Inama y’abaminisitiri iheruka yemeje ko insengero zizakomeza gufunga, utubari tuzakomeza gufunga n’Inama n’amateraniro rusange cyangwa mu ngo z’abantu bibujijwe.

Bamwe mu baturage bavuga ko nubwo icyorezo kigihari, basanga ubukwe n’insengero byafungurwa ariko hakubahirizwa amabwiriza yo kwirinda nko gukaraba intoki n’ayandi.

Minisitiri w’Ubutegetsi bw’Igihugu, Prof Shyaka Anastase, aherutse kuvuga ko ‘ibyakozwe atari ukugora amadini n’amatorero, aboneraho gusaba abifuza gukora ubukwe bwabo bwiza ko bategereza igihe izi gahunda zose zizaba zemewe’.

Yagize ati “Ntabwo ari ukugora abanyamadini n’amatorero ahubwo imikurikiranire yayo tubihuza no kwirinda ntabwo byashoboka...abashobora gutegereza twabagira inama yo gutegereza bakazabikorera hamwe mu bukwe bwiza bari hamwe.”

Minisitiri w’Ubuzima, Dr Ngamije, avuga ko abantu bakomeje kubahiriza amabwiriza yo kwirinda Coronavirus nta kabuza u Rwanda ruzatsinda iki cyorezo, ariko habayeho kwirara gato, byafata indi ntera.

Avuga ko mu mahanga iki cyorezo gikomeje kwica abantu, ku buryo abaturarwanda badakwiriye gutegereza ko kigira abo gihitana ngo babone kwemera ko gikaze.

Ati “Ahubwo imibare ibaye mibi, n’ingamba zafashwe zo kugira ibirekurwa zakongera zigasubirwamo, hagafatwa izindi ngamba zikaze. Ni ukuvuga rero ko abantu bakwiye gushyira mu gaciro, bakirinda icyatuma imibare yacu iba mibi, haboneka abantu benshi banduye, ahubwo tukagenda tubagabanya buhoro buhoro, abarwaye bagakira, kugeza igihe icyorezo kizarangira.”

Minisiteri y’Ubuzima kandi ikomeje ubushakashatsi ahantu hose hagenda hahurira abantu benshi nko muri za restaurants, za hotel, Salon biyogosheramo, mu mabanki n’ahandi kugira ngo yongere ifate amakuru ajyanye n’uko kuva hafungurwa bimwe mu bikorwa uko ibintu bihagaze ubungubu.

Mu minsi 10 ishize abarwayi ba Coronavirus bagiye baturuka hanze y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .