00:00:00 IGIHE NETWORK KN KINYARWANDA EN ENGLISH FR FRANCAIS

Ingaruka zo kunywa inzoga nyinshi nubwo byaba umunsi umwe

Yanditswe na Zigiranyirazo Bajecteur
Kuya 14 June 2022 saa 03:32
Yasuwe :

Umuntu unywa agatama ashobora kukubwira ko azi uburyo buboneye bwo kugenzura iminywere ye ashingiye ku kuba anywa izoroheje kandi akabikora mu buryo bugereranyije nk’iminsi abikora.

Mwarimu mu ishami ry’ubuvuzi bw’indwara zo mu mutwe rya Kaminuza ya Stanford, Rudolf Moos avuga ko kuba hari abanywi babikora bavuga ko banywa mu rugero bibata mu mutego wo kuba bahura n’ibyago hatitawe ku buryo bwabo bw’iminywere.

Moos uri mu banditse ibyavuye mu bushakashatsi bushya, agaragaza ko abantu bavuga ko ubusanzwe banywa mu rugero aho mu minsi ya weekend bimara icyaka, baba bafite ibyago byo kwibasirwa n’ingaruka ziterwa n’inzoga, ku kigero cyikubye inshuro eshanu abandi bantu by’umwihariko iyo babikora barengeje imyaka 30.

Charles Holahan na we uri mu banditse ibyavuye mu bushakashatsi akanaba umwarimu muri Kaminuza ya Texas, ashimangira ko abantu banywa bagasinda baba bafite ibyago bikubye inshuro eshanu byo guhura n’ingaruka ziterwa n’inzoga zirimo gukomereka mu buryo bw’amarangamutima n’ubw’imitekerereze.

Ngo ibyo bibazo bitangira kubicira akazi, kwangiza imyigire ndetse bikagira ingaruka mu buryo bwo kwita ku rubyaro.

Holahan abisonanuraho agira ati “Ibi bivuze ko umuntu ushobora kunywa ibirahuri birindwi mu ijoro ryo ku wa Gatandatu, ahura n’ibyago byinshi ugereranyije n’ufata ikirahure kimwe buri munsi mu gihe cy’iminsi irindwi ariko we akabikora abijyaniranya n’ifunguro.”

Nubwo baba bafashe ibipimo bingana ku cyumweru, Holahan avuga ko ubifatiye icyarimwe bishobora kumugiraho ingaruka zikubye uwabifashe gahoro gahoro buri munsi kandi akibuka kubifatana n’ibyo kurya.

Ikigo cy’igihugu cya Amerika kigenzura ibijyanye n’ingaruka zo kunywa ibisindisha (NIAA), kigaragaza ko abagore bitewe n’imiterere y’umubiri wabo bakunze kugirwaho ingaruka zikomoka ku kunywa ibisindisha mu buryo bukomeye ugereranyije n’ab’igitsinagabo kandi izo ngaruka zikagaragara vuba kabone n’ubwo baba banyoye nke kurusha abagabo.

Ubushakashatsi buvuga ko abagore banywa nibura ikirahure kimwe ku munsi, bibazamurira ibyago byo kwangirika ubwonko no kwibasirwa na kanseri y’ibere ku rugero ruri hagati ya 5 na 9% ugereranyije n’abagore batanywa.

Ubu bushakashatsi bushya bwakorewe ku bagera ku 1300 bafite hagati y’imyaka 25 na 74.

Abantu bagirwa inama yo kudashakira ibisubizo mu kunywa ibisindisha cyane mu gihe bahuye n’ibikomere mu rukundo cyangwa mu kazi ka buri munsi bagamije kwiyibagiza ibibazo kuko ibyari ijosi biba bishobora kubabyarira umwingo.

Hagaragajwe ko inzoga nyinshi icyarimwe ari bibi cyane kurusha kunywa nke igihe kinini

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .