00:00:00 IGIHE NETWORK KN KINYARWANDA EN ENGLISH FR FRANCAIS

Impamvu udakwiriye kugereranya Monkeypox na Covid-19

Yanditswe na Zigiranyirazo Bajecteur
Kuya 25 May 2022 saa 09:50
Yasuwe :

Hashize iminsi hacicikana amakuru avuga kuri Virus ya Monkeypox, indwara ikomeje gukwirakwira hirya no hino ku migabane itandukanye ku buryo hari abatari bake bakomeje kurebera ubu burwayi mu ishusho y’icyorezo cya COVID-19 kimaze imyaka irenga ibiri cyibasiye Isi.

Imibare igaragaza ko kuva mu ntangiriro za Gicurasi, abarenga 250 biganjemo abaturuka mu bihugu by’u Burayi na Amerika ya Ruguru, bamaze kwandura Monkeypox.

Abahanga bo muri Kaminuza ya Oxford batangaza ko imibare y’abandura ikomeje kuzamukana ingoga.

Babishingira ku kuba nko muri Espagne hamaze kuboneka abanduye bagera ku 100, abagera kuri 37 muri Portugal, 56 mu Bwongereza mu gihe muri Canada hamaze kuboneka abagera kuri 23 hashingiwe ku mibare yo ku wa 23 Gicurasi.

Abakora mu nzego z’ubuzima bahangayikishijwe no kuzamuka bwangu kw’imibare y’abandura bakanahura n’imbogamizi yo kuba bigoye ko hahita hamenyekana amakuru menshi kuri virusi imaze ibyumweru.

Ikindi nta wahita yihandagaza ngo ayihuze na COVID-19 imaze igihe ikorwaho ubushakashatsi butandukanye bwaba ubw’igihe kigufi cyangwa kirekire.

Agam Rao, inzobere ku bijyanye n’indwara z’ibyorezo zandura, yavuze ko bahangayikishijwe n’ubuzima bw’abatuye Isi kandi hakomeje gukorwa ibishoboka byose ngo hamenyekane isano ishobora kuba iri hagati y’iyi virusi n’izindi, hanamenyekane impamvu zose zishobora kuba zarabaye intandaro.

Ku rundi ruhande, Rao ahumuriza abantu ko badakwiye guhagarika imitima kubera iyi ndwara aho agira ati “ibyago ishobora guteza mu bantu biracyari bike.”

Monkeypox itandukanywa na Virus ya SARS-CoV-2 itera COVID-19, kubera ko hari uburyo n’ibikoresho byafasha mu kuyirinda no gutangwa ubuvuzi ugereranyije n’uko byari byifashe mu minsi ya mbere ya Covid-19.

Ubusanzwe Monkeypox ni virusi yamenyekanye cyane mu nyamaswa z’agasozi mu bice bya Afurika yo Hagati n’iy’Uburengerazuba.

Yageze mu bantu binyuze mu kwegerana cyane cyangwa kurya inyama z’inyamaswa ziyirwaye.

Yagaragaye bwa mbere mu bushakashatsi bwakozwe ku nyamaswa mu myaka ya 1950 hanyuma mu 1980 iboneka no mu bantu.

Kuva mu 2017, Nigeria yari imaze kugira abanduye Monkeypox bagera kuri 450 aho uyirwaye arangwa n’ibicurane bimuzahaza, umuriro, kuribwa umutwe no kumva uburyaryate mu mikaya.

Ibindi ni ukubabara umugongo, kuzana uduheri tumeze nk’ibibembe mu maso tukagenda dukwirakwira ku maboko no ku maguru ku buryo nyuma y’iminsi ine dutangira guturika.

Ntabwo ari indwara ihererekanwa cyane nk’uko byari bimeze kuri Smallpox, icyorezo cyigeze kwibasira Isi kigahitana abagera kuri miliyoni 800.

Anne Rimoin wo muri Kaminuza ya California aho akora ubushakashatsi kuri virusi n’indwara z’ibyorezo zinyuranye, ashimangira ko Monkeypox itandukanye cyane na COVID-19.

Ntabwo umuntu utaragaragaza ibimenyetso ashobora kwanduza iyi virus nk’uko bigenda kuri COVID-19, kandi mu bihugu ubuvuzi buteye imbere ntabwo Monkeypox ishobora kwica uwayanduye.

Icyakora mu bice by’icyaro nko mu bihugu bya Afurika aho usanga ubuvuzi butagera kuri bose ku gihe, imibare igaragaza ko Monkeypox ishobora guhitana 4% by’abayanduye.

Inkuru bifitanye isano: Ibyo wamenya kuri Monkeypox, virus iri gukwirakwira mu Bwongereza

Monkeypox ikomeje gutitiza abatuye Isi muri iyi minsi bafite ubwoba ko ishobora gukwira nka Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .