Imbuto Foundation yatangije umushinga ugamije gukumira inda ziterwa abangavu muri Nyagatare na Burera

Yanditswe na Hakizimana Jean Paul
Kuya 24 Mutarama 2020 saa 08:15
Yasuwe :
0 0

Umuryango Imbuto Foundation watangije kumugaragaro umushinga wita ku buzima bw’imyororokere mu rubyiruko mu turere twa Nyagatare na Burera nka tumwe mu turere dufite imibare y’abana baterwa inda iri hejuru n’ibindi bibazo by’ubuzima.

Uyu mushinga watangijwe ku mugaragaro kuri uyu wa Kane tariki 23 Mutarama mu Karere ka Nyagatare. Witezweho gufasha abana bari hagati y’imya icumi na 24 gusobanukirwa ibijyanye n’ubuzima bw’imyororokere hifashishijwe ababyeyi babo, abaganga ndetse n’abarimu.

Insanganyamatsiko y’uyu mushinga iragira iti “ Rubyiruko, kugira ubumenyi ku buzima bw’imyororokere ni uburenganzira bwanyu.”

Umukozi wa Imbuto Foundation, Eric Kayiranga, ushinzwe uyu mushinga mushya avuga ko uyu mushinga uzibanda ku byiciro bitatu birimo urubyiruko ruri hagati y’imyaka icumi kugeza kuri 24.

Ati “ Muri abo bose harimo abari mu ishuri n’abataririmo, tuzakorana n’ibigo by’amashuri yisumbuye, ibigo Nderabuzima byose byo muri Nyagatare, amavuriro y’ibanze arimo 47, aho hose ni urubyiruko tureba. Ntabwo navuga ko iki kibazo tuje kugica burundu ariko tuzanye umusanzu kugira ngo kigabanuke, nirwo rugamba turiho rwo kugira ngo inda ziterwa abangavu zigabanuke.”

Kayiranga yakomeje avuga ko bazafasha urubyiruko ruri mu matsinda ku buzima bw’imyororokere kubona ibiganiro na serivisi ku bigo Nderabuzima n’amavuriro y’ibanze, ngo bazakoresha imikino, ibiganiro muri rusange ndetse banapime abana kubushake indwara zitandukanye.

Umuyobozi w’Akarere ka Nyagatare wungirije ushinzwe imibereho myiza y’abaturage Murekatete Julliet yashimiye Imbuto Foundation ku gikorwa cyiza izanye mu Karere kabo, avuga ko ku kuba bafite imibare myinshi y’abana batwara inda imburagihe, ngo usanga ababyeyi n’abana badafite ubumenyi ku buzima bw’imyororokere bakaba bazahita bahera kuri ba babyeyi no mu Nteko z’abaturage kugira ngo babigishe.

Yakomeje agira ati “ Amakimbirane mu miryango niyo ntandaro ya mbere aho abenshi baba batarahindura imyumvire ku buringanire bwo mu muryango.”

Umuyobozi w’urwunge rw’amashuri rwa Rwempasha, yavuze ko hakenewe imikoranire ya mwarimu n’umubyeyi mu kuganiriza umwana w’umukobwa ku buzima bw’imyororokere.

Ati “Umuntu mukuru wese akwiye kumva ko niba abonye umwana agiye gutatira igihango no kuva mu nshingano akwiye kongera kumukumira nk’umwana we cyangwa uw’igihugu kugira ngo twese dufatanye. Ikindi dukwiye gukomera ku ndangagaciro kuko abashuka bariya bana ni abantu bakuru.”

Umuyobozi w’Ikigo Nderabuzima cya Ndama, Kayumba Samuel, we avuga ko akurikije ibyo basabwe bari basanzwe babikora ahubwo ngo bagiye kubishimangira.

Yagize ati “ Buri kigo Nderabuzima gifite abantu babiri nibura bagiye bahugurwa ku bijyanye n’imyororokere y’urubyiruko, dufite naho turwigishiriza uko bakwirinda indwara n’ibindi.”

Yavuze ko hari abantu bamwe na bamwe imyumvire yabo ariyo ituma abana baterwa inda gusa ngo uko bongera imbaraga mu bukangurambaga birushaho gucika.

Mu mwaka wa 2010 uyu mushinga wakoreraga mu turere twa Nyarugenge na Gicumbi ukaba ugamije kwigisha, gutanga amakuru ahagije ku buzima bw’imyororokere mu rubyiruko bikorwa n’abakangurambaga b’urungano bakanimakaza ibiganiro hagati y’ababyeyi n’abana.

Ubushakashatsi bwakozwe na Minisiteri y’Uburinganire n’Iterambere ry’Umuryango rigaragaza ko hagati y’umwaka wa 2016 na 2018 abangavu ibihumbi 70 batewe inda imburagihe, 36% bangana n’ibihumbi 19 na 800 ni abo mu Ntara y’Iburasirazuba.

Akarere ka Nyagatare niko kaza imbere mu kugira abana benshi batewe inda aho byibuze mu mwaka ushize wa 2019 abangavu batewe inda imburagihe ari 1814 nkuko bitangazwa n’Umuyobozi w’Akarere ka Nyagatare wungirije.

Ababyeyi, abarezi n'abaganga bazafatanya mu gusobanurira abana ibijyanye n'ubuzima bw'imyororkere
Abayobozi batandukanye bitabiriye iki gikorwa cyatangirijwe mu Karere ka Nyagatare

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .