00:00:00 IGIHE NETWORK KN KINYARWANDA EN ENGLISH FR FRANCAIS

Ibitaro by’uturere byemerewe kohereza abarwayi muri Faisal

Yanditswe na IGIHE
Kuya 19 May 2022 saa 10:58
Yasuwe :

Minisiteri y’Ubuzima yemeje ko abaganga b’inzobere mu bitaro by’uturere bashobora gutangira kohereza abarwayi mu Bitaro byitiriwe Umwami Faisal, bakavurwa n’inzobere zaho kandi kuri mituweli.

Mu kwezi gushize ni bwo Ibitaro byitiriwe Umwami Faisal byashyizwe ku rwego rw’Ikigo cy’Ubuvuzi no Kwigisha ku rwego rwa kaminuza, icyiciro gisanzwemo ibitaro bibiri, iby’i Kigali (CHUK) n’i Butare (CHUB).

Mu kiganiro n’abanyamakuru kuri uyu wa Gatatu, Minisitiri w’Intebe, Dr Edouard Ngirente, yatangaje ko Guverinoma yihaye intego ko buri Munyarwanda akwiye kuvurwa, ariko haracyari ikibazo cy’ubuke bw’abaganga b’inzobere.

Yakomeje ati "Abaganga b’inzobere tubagira mu bitaro by’icyitegererezo, ariko nk’ibitaro by’uturere ari nabyo Abanyarwanda benshi bivurizaho, usanga tutaragira inzobere zihagije kuri ibyo bitaro, ariko imbaraga zirimo gushyirwamo duhugura abaganga benshi."

Minisitiri w’Ubuzima, Dr Daniel Ngamije, yavuze ko hashyizweho gahunda yo gusaranganya abaganga bahari, mu gihe hakinozwa uburyo bwo kubongera.

Yakomeje ati "Hari n’ikindi cyo kuvugurura uburyo bwo kohereza abarwayi bava ku bitaro by’uturere bajya bitaro bikuru, kugira ngo tugabanye urutonde rw’abategereje kubonana na muganga."

Muri ubwo buryo, Dr. Ngamije yavuze ko barebye uburyo niba nka serivisi runaka itangwa mu Bitaro Byitiriwe Umwami Faisal nk’indwara z’umutima n’izindi, mu gihe hari umurwayi mu bitaro by’akarere, akaba yakoherezwaho bidasabye ko abanza guca muri CHUK.

Yakomeje ati "Ibyo byavuyeho, hari amasezerano twashyizeho umukono mu cyumweru gishize na Faisal, atuma umurwayi ubonywe n’umuganga w’inzobere kandi akaba azi ko iyo ndwara ivurwa gusa mu Bitaro byitiriwe Umwami Faisal, ahabwa transfert."

"Akajya mu Bitaro byitiriwe Umwami Faisal, akanavurwa, agafatwa nk’umurwayi wa mituweli usanzwe, no ku biciro akishyura ku biciro yagatanze muri CHUK cyangwa mu bindi bitaro bya Kaminuza."

Hari gahunda yo kongera abaganga b’impuguke

Minisitiri w’Ubuzima, Dr Ngamije Daniel, yavuze ko kugeza ubu mu Rwanda hari abaganga b’inzobere 689, aho abarangiza buri mwaka b’impuguke ari 50.

Yakomeje ati "Twatangije izindi porogaramu mu byumweru bishize, tugiye kuzajya dushyira ku isoko abandi 30 b’inzobere mu zindi nzego z’ubuvuzi zitandukanye, biyongera kuri ba bandi basanzwe."

"Ibyo byose ni ukugira ngo tubone abaganga bahagije bakora mu bitaro bikuru by’igihugu, ariko tukanamanuka tugera ku bitaro by’Intara n’iby’uturere."

Yavuze ko mu buryo bwo gusaranganya abaganga bahari kuri ubu, hagenda hifashishwa gahunda yo kwegera abarwayi, inzobere zikava aho zikorera zikabegera mu bitaro bitandukanye.

Minisitiri w'Intebe Dr Edouard Ngirente aganira n'abanyamakuru kuri uyu wa Gatatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .