Hahishuwe ko ibihugu bikize biri guhunika inkingo za Covid-19, ibikennye bishobora kwimyiza imoso

Yanditswe na Uwimana Abraham
Kuya 9 Ukuboza 2020 saa 09:30
Yasuwe :
0 0

Ihuriro rikurikirana uburyo inkingo zigera kuri bose (People’s Vaccine Alliance) ryahishuye ko ibihugu bikize byamaze kwitegura guhunika inkingo za Covid-19, bityo ko ibihugu bikennye bizagorwa no kubona inkingo ku buryo nk’ibihugu 70 bikennye, bizashobora gukingira 10% gusa y’abaturage babyo bose.

Ubushakashatsi bwakozwe n’ibigo nka Amnesty International, Oxfam na Global Justice, bwerekanye ko ibihugu bikize byamaze kugura inkingo zishobora gukingira abaturage babyo bose inshuro eshatu, mu gihe izo nkingo zizaba zemerewe gukoreshwa.

Ubu bushakashatsi bwahishuye ko n’ubwo ibihugu bikize bituwe na 14% by’abaturage b’isi muri rusange, ubu byamaze kugura 53% by’inkingo zose zitanga icyizere. Urugero nka Canada ngo yaguze inkingo zishobora gukingira abaturage bayo bose inshuro eshanu.

N’ubwo bimeze bityo ariko hari ingamba zimwe zikomeje gushyirwaho zigamije kuzafasha n’ibihugu bikennye kubona inkingo, nk’abakoze urukingo rwa AstraZeneca narwo ruri mu zitanga icyizere, bavuze ko 64% y’inkingo bazakora zizahabwa ibihugu bikiri mu nzira y’amajyambere.

Hari n’izindi ngamba zikomeje gushyirwaho nk’ihuriro rya Covax kuri ubu ryamaze guteganya inkingo miliyoni 700 zizatangwa mu bihugu 92 biri mu nzira y’amajyambere byamaze kwiyandikisha muri iri huriro.

Gusa n’ubwo izi gahunda zihari, imiryango mpuzamahanga yagaragaje ko ari ngombwa ko abari gukora inkingo basangiza abandi ikoranabuhanga bari gukoresha kugira ngo baryifashishe hakorwe umubare munini w’inkingo.

Umunyamabanga Nshingwabikorwa wa Oxfam, Anna Marriot, yavuze ko ntawe ukwiye kubura amahirwe yo kubona urukingo bitewe n’ikintu icyo ari cyo cyose, ahubwo ko abantu bakwiye kugira ayo mahirwe angana.

Yagize ati “Nta muntu n’umwe ukwiye kuvutswa amahirwe yo kubona urukingo rutabara ubuzima bitewe n’igihugu atuyemo cyangwa amafaranga afite, gusa mu gihe nta gikozwe abantu barenga za miliyari hirya no hino ku isi ntibazabasha kubona urukingo rwa Covid-19 mu myaka iri imbere.”

People’s Vaccine Alliance irahamagarira ibigo byose biri gutunganya inkingo, gusangiza abandi byeruye ikoranabuhanga n’ibikoresho bari kwifashisha kugira ngo hakorwe izindi nkingo nyinshi zizabasha kugera kuri bose bazikeneye hirya no hino ku isi, ibi ngo bishobora gukorwa binyuze mu Ishami ry’Umuryango w’Abibumbye ryita ku Buzima, ahasangirirwa amakuru kuri Covid-19.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .