00:00:00 IGIHE NETWORK KN KINYARWANDA EN ENGLISH FR FRANCAIS

Ese koko kutabona bituma umuntu agira ubwenge burenze ubwo yagira abaye abona?

Yanditswe na Dufitumukiza Salathiel
Kuya 22 Werurwe 2021 saa 12:12
Yasuwe :
0 0

Hakunze kwibazwa kenshi impamvu abantu bafite ubumuga bwo kutabona cyangwa bwo kutumva bashobora gukora ibintu neza rimwe na rimwe bakanabinoza kurusha abadafite ubwo bumuga. Impaka kuri iyo ngingo zihora ari nyinshi, ariko abashakashatsi berekana ko iyo amaso atakibona cyangwa amatwi atumva, ubwonko buhindura imikorere.

Ni ingingo yagarutsweho kuva mu kinyejana cya 18, ubwo umucurabwenge w’Umufaransa, Denis Diderot, yavugaga ko umuntu utabona ashobora gutandukanya igiceri cy’icyiganano n’icy’ukuri iyo abifasheho.

Bamwe banze kubyizera, kugeza ubwo mu 2009 Kaminuza ya California yakoze inyigo yerekana ko iyo umuntu atabasha kureba igice cy’ubwonko kigenewe gufata amashusho kiba ari gito cyane, ariko ibindi bice birebana no gutanga amakuru bikaba ari binini.

Muri Werurwe 2017, abashakashatsi ku maso n’amatwi bo muri Kaminuza ya Massachusetts bamuritse inyigo bakoreye ku bantu 28 hagamijwe gusuzuma imikorere y’ubwonko bw’ureba n’utareba. Harimo 12 bavutse batareba cyangwa bikababaho bafite imyaka itarenze itatu n’abandi 16 bareba neza.

Ibyavuye mu bushakashatsi byagaragaje ko igice gishinzwe amashusho mu bwonko bw’abatabona aba ari gito, ariko ibindi bice nk’igishinzwe kumva amajwi cyangwa ibyo ukozeho biba ari binini cyane kurusha iby’abareba.

Muri make, umuntu ufite ubumuga bwo kutabona, afite ubushobozi bwo gukoresha amatwi no kumenya ibimukozeho cyangwa ibyo afasheho kurusha ureba. Icyo ni cyo bita “neuroplasticité” aho siyansi isobanura ko ubwonko bukora utundi tunyangingo ndetse bugahindura imikorere bushaka kuziba icyuho cyo kuba amaso adahari.

Umuyobozi wa Laboratwari ya Kaminuza ya Massachusetts ikora ubushakashatsi ku matwi n’amaso, Dr Loffi Merabet, yavuze ko ubwonko bushakisha uko bwiyubaka ku buryo amakuru yatangwaga n’urugingo rudahari “akomeza kuboneka, kandi mu buryo bwiza kurushaho.”

Yakomeje agira ati “Niba ubwonko bushobora kwiyubaka bushyashya binyuze mu kwihugura cyangwa kongerera ingufu ibindi byiyumviro birimo kumvisha amatwi cyangwa uruhu, hari ubushobozi buhanitse bufite bwo kugena imikorere mishya.”

Uretse amaso, mu 2012 abashakashatsi barimo Christina M. Karns, Mark W. Dow na Helen J. Neville bagaragaje ko iyo amatwi atumva nabwo ubwonko bwongerera ingufu amaso akabasha kureba kurusha ay’umuntu wumva, ndetse n’ibindi byiyumviro by’umubiri bikaba byakora cyane mu kuziba icyuho cy’amatwi.

Bagize bati “Ibyavuye mu bushakashatsi bwacu birerekana ko kuba utumva bihindura uburyo amakuru ava mu kureba n’ibindi byiyumviro asesengurwa n’igice gishinzwe kumva amajwi.”

Umuhanga mu by’imikorere y’ubwonko akaba n’umuganga mu Bitaro bya Kaminuza bya Kigali, CHUK, Dr Nshimiyimana François Xavier, yemeza ko iyo ingingo zimwe ku mubiri zitagikora, “ubwonko bwirwanaho kugira ngo akamaro kazo gakomeze kagerweho.”

Ati “Ibyo ni ibintu bibaho tubona buri munsi, igihe igice cy’umubiri kivuyeho, ubwonko bukora ikindi cyo kugisimbura.”

Nubwo amaso n’amatwi ari byo bigarukwaho kenshi kuba igihe bidakora hari impinduka ziba mu bindi byiyumviro, Dr Nshimiyimana yasobanuye ko n’izindi ngingo z’umubiri zibaye zidakora ubwonko hari uko buzisimbuza.

Ati “Nk’iyo umuntu yacitse ukuboko ashobora kugira uburyo bwo kugusimbuza. Uko umubiri wawe uteye, ufite undi umeze nkawo neza mu bwonko. Ubwo rero iyo icyo gice gicitse ku mubiri, mu bwonko ntikiba gicitse. Bukora uburyo bwose burema utundi tunyangingo dushya kugira ngo tugire icyo dufasha mu kamaro icyo gice cyari gifite.”

Hagaragazwa ko iyo amaso atareba, ibice bishinzwe kubika amakuru, kumva neza ururimi ndetse n’ibindi byiyumviro bikora cyane kurusha uko byakora iyo amaso areba. Iyo ni yo mpamvu bamwe mu batabona cyangwa batumva bashobora kunoza ikintu runaka kurusha abadafite ubwo bumuga.

Ubushakashatsi bwerekana ko iyo amaso atabona ubwonko buhindura imikorere, bukongerera ingufu ibice bikora / Ifoto: Sky News

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .