Byinshi ku ndwara ya Diabète ishobora gutuma umuntu ananirwa gukora imibonano mpuzabitsina

Yanditswe na Evariste Nsengimana
Kuya 24 Mutarama 2020 saa 09:28
Yasuwe :
0 0

Abahanga mu by’ubuzima bavuga ko indwara y’igisukari cyangwa se Diabète mu ndimi z’amahanga ari indwara yo kugira isukari nyinshi mu mubiri ikarenga igipimo cy’iyo umubiri usanzwe ukenera, biterwa ahanini no kubura k’umusemburo witwa insuline cyangwa utabasha kwakirwa n’umubiri bitewe n’uko utarekurwa ku rugero rukenewe.

Ni indwara ishobora kugenda mu ruhererekane rwo mu muryango cyangwa igaterwa no guhindura imibereho, imirire n’ibindi.

Ibamo ubwoko bubiri aho ubwa mbere cyangwa se Diabète Type I ikunze gufata abakiri mu bugimbi n’ubwangavu. Iyi ibaho igihe inyama yitwa impindura ikora umusemburo (insuline) ugabanya cyangwa ukongera isukari mu mubiri yangirika ntibashe gukora uko bikwiye.

Ubwoko bwa kabiri bw’iyi ndwara cyangwa se Diabète Type II ari na yo ikunze kugaragara ku bantu benshi, aho mu gice umusemburo wa insuline ugabanyirizamo isukari yinjiye mu mubiri habaye ubwirinzi bigatuma ikomeza kwiyongera mu mubiri.

Uko iminsi ishira indi igataha uturemangingo dukora uwo musemburo tugera aho tukananirwa, ukaba muke bigatuma isukari yiyongera mu mubiri.

Mu kiganiro yahaye IGIHE, Umuyobozi w’ishami rishinzwe kuvura indembe mu bitaro bya Muhima, akaba n’umuganga w’indwara rusange, Dr Maniraguha Yeze Aimée Victoire, yavuze ko ibimenyetso by’indwara y’igisukari bigenda bitandukana.

Ati “Ikimenyetso cya mbere ni uguta ibiro cyane, kugira inyota nyinshi kubera ko umubiri uba ushaka gusohora isukari nyinshi noneho biciye mu mpyiko, uko isohokera mu mpyiko bijyana n’amazi menshi bigatuma umuntu ajya kwihagarika kenshi, rimwe na rimwe bigatera n’inzara ikabije.”

“Ikindi iyo isukari ibaye nyinshi mu maraso igenda yangiza utundi turemangingo, hari n’abatangira kugira ibimenyetso byo kutareba neza. Diabète yangiza amaso.”

Dr Maniraguha avuga ko umuntu ugeze kwa muganga akeka ko yaba arwaye igisukari hari ibizamini ahita akorerwa bigamije kureba ingano y’isukari mu maraso, ibi bishingirwaho hemezwa niba umuntu arwaye cyangwa atarwaye iyi ndwara.

Dr Maniraguha ati “Diabète iravurwa ariko ni indwara idakira kuri iriya y’ubwoko bwa mbere kubera impindura iba idakora neza, ni yo abayirwaye bitera inshinge z’umusemburo wa insuline yakozwe, naho abarwaye iya kabiri bakoresha ibinini bigera mu mubiri bigakora uwo musemburo ariko bigafatanya na yayindi nkeya iba igikorwa mu mubiri.”

Indwara y’igisukari ni imwe mu zishobora kwirindwa binyuze mbere na mbere mu kwisuzumisha hakiri kare kuko abenshi bajya kuyivuza yarabarenze batazi ko bayirwaye.

Ikigo cy’igihugu cy’ubuzima mu Rwanda, RBC, kivuga ko nibura ahantu hateraniye abanyarwanda 30 umwe muri bo aba arwaye indwara ya Diabète ndetse ngo umuntu umwe muri babiri bayirwaye ntaba azi ko ayirwaye.

Dr Maniraguha ati “Iyo uzi ko hari abo mu muryango bayirwaye [yo mu bwoko bwa mbere] biba byiza iyo ugiye gukoresha ibizamini byerekana uko isukari mu muburi yahindutse mu mezi atatu ashize. Ni na byo dushingiraho twemeza niba umuntu ayirwaye cyangwa atayirwaye, waba uyirwaye ukavurwa itaragira byinshi yangiza.”

Ati “Ku yo mu bwoko bwa kabiri ikunda kuza akenshi ku bari hejuru y’imyaka 40 uretse ko muri iki gihe no mu bana bato isigaye ihaboneka kubera ikibazo cy’umubyibuho ukabije. Tumugira inama guhindura imibereho, kugabanya ibiryo birimo ibinure, ibirimo amasukari [Fanta, imitobe,..] tukanamugira inama yo gukora siporo kuko umubiri ukenera isukari ariko ugomba kuyikoresha ukayitwika.”

Ntabwo byoroshye kumenya ngo niba umuntu anyoye icupa rimwe ry’umutobe akuyemo isukari ingana gutya ku buryo bimushyira mu kaga ko kurwara diabète. Iyi ni yo mpamvu abantu bagirwa inama zo gukora siporo cyane.

Ingaruka zikomeye

Uretse kwangiza amaso, Diabète nk’indwara ikunda kwibasira imitsi, yangiza ingingo hafi ya zose igeramo ariko by’umwihariko impyiko, imitsi, kumunga abasikare b’umubiri, ugatakaza ubwirinzi.

Ati “Uhita utangira kumera nk’ufite virusi itera Sida, abasirikare bawe bakagabanyuka, ukaba wugarijwe n’ibyorezo byinshi. Yica uturemangingo tw’uruhu bikagera hamwe ushobora gukomereka igisebe ntigikire, kikaba cyamara nk’umwaka, ishobora kugutera umuvuduko w’amaraso utari uwusanganywe, imiheha y’umutima ikifunga.”

Iyi ndwara kandi ishobora gutuma umuntu bamuca urugingo bitewe n’uko imiti yarwo yarwangije.

Dr Maniraguha ati “Ni indwara y’imitsi itwara amaraso kandi kugira ngo umuntu atere akabariro, akenera ko amaraso agenda neza, iyo imitsi rero yamaze kwangirika, urwo rugingo [igitsina] ntiruzahagarara neza, ntiruzaba rufite amaraso ahagije kugira ngo rukore neza. Ni hahandi uzumva umuntu atangira kunanirwa gutera akabariro.”

Umurwayi wa Diabète asabwa kwivuza kare kandi agakurikiza inama ahabwa na muganga mu kwirinda ko izamuzahaza. Urugero nk’iyo yishe impyiko ni hahandi usanga umuntu akeneye guhora azogesha.

Muri izo nama harimo kugabanya ibiribwa birimo ibinure, gukora siporo, kwivuza hakiri kare, gutunga ubwishingizi mu kwivuza kugira ngo ubuvuzi bworohe.

Dr Maniraguha Yeze Aimée Victoire avuga ko ibimenyetso by'indwara y'igisukari bigenda bitandukana

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza