00:00:00 IGIHE NETWORK KN KINYARWANDA EN ENGLISH FR FRANCAIS

Buri kwezi Abaturarwanda ijana bagerageza kwiyahura

Yanditswe na Thamimu Hakizimana
Kuya 30 Ugushyingo 2021 saa 04:07
Yasuwe :

Ikigo cy’Igihugu Gishinzwe Ubuzima (RBC), cyatangaje ko buri Kwezi mu Rwanda abantu bagera ku ijana bagerageza kwiyahura, bikaba bigaragaza ubukana bw’indwara zo mu mutwe zugarije umuryango nyarwanda.

Kuri uyu wa Mbere tariki 29 Ugushyingo hari umukobwa wagerageje kwiyahura muri Nyabarongo ariko atabarwa atararohama.

Abahanga mu by’Ubuzima bwo mu mutwe bavuga ko abenshi mu biyahura, baba basanganywe ibibazo byo mu mutwe bitavuwe hakiri kare ari nabyo bikomeje kugaragara mu muryango nyarwanda muri iki gihe.

Umuyobozi w’agashami gashinzwe ubuvuzi bw’indwara zo mu mutwe muri RBC, Dr Iyamuremye Damascène yabwiye IGIHE ko umuntu wiyahuye akenshi aba afite ikibazo cyo kwiheba, kandi aba amaranye igihe ku buryo yakabaye yaratabawe mbere.

Ati “Kwiyahura bifitanye isano no kwiheba kandi kwiheba ni ikimeneyetso cy’ikibazo cyo mu mutwe kijyanye n’imitekerereze umuntu aba afite. Umuntu ugiye kwiyahura ubusanzwe abanza gutekereza ko kuba ariho ntacyo bimumariye noneho akumva ko kutabaho aribyo byiza.”

Yakomeje agira ati “Hari ibintu biba byabiteye birimo nk’ikibazo cy’imibanire n’abandi , imihangayiko y’ubuzima kuko bituma agira intege nke z’ukuntu yahangana n’ibibazo ahura nabyo mu buzima, bigatuma abona ko nta mpamvu yo kubaho.”

Dr Iyamuremye yavuze ko akurikije raporo bakira, mu Rwanda buri kwezi abantu 100 bagerageza kwiyahura.

Ati “ Buriya ku munsi byibuze hapfa umuntu umwe yiyahuye. Ikindi hari abantu benshi baba bateshejwe kwiyahura ku buryo ku kwezi tubona abantu bagera ku ijana baba bateshejwe kwiyahura baba bari mu bitaro bitandukanye.”

Iyamuremye yasabye Abanyarwanda kujya bita ku bantu babona bafite ibibazo byo kwiheba bakabagira inama zo kujya kwa muganga kuko ku bigo nderabuzima no ku Bitaro hari serivisi z’ubuzima bwo mu mutwe zigamije kubafasha.

Urwego rw’Igihugu rushinzwe ubugenzacyaha (RIB) ruherutse kugaragaza ko mu myaka ibiri ishize, abantu 576 biyahuye mu Rwanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .