Binyura mu zihe nzira kugira ngo hafatwe umwanzuro wo gukura umuti ku isoko?

Yanditswe na Uwimana Abraham
Kuya 9 Ugushyingo 2020 saa 07:30
Yasuwe :
0 0

Kuva Coronavirus yakwaduka, hagashyirwaho amabwiriza y’uko abantu bagomba gukaraba intoki kenshi, bakoresheje amazi meza n’isabune cyangwa bakifashisha umuti usukura intoki wabugenewe, hakunze gucicikana amatangazo ya Rwanda FDA yahagaritse hand sanitizer zitandukanye, bivugwa ko yasanze itujuje ubuziranenge.

Mu nshingano z’ibanze za Rwanda FDA, Ikigo cy’Igihugu gishinzwe ibiribwa n’imiti mu Rwanda, harimo kugenzura imiti icuruzwa ku isoko ry’u Rwanda kikamenya niba yujuje ubuziranenge, cyasanga itwabujuje igakurwa ku isoko.

Benshi bibaza ikigenderwaho ngo ikigo cyahaye umuti uburenganzira bwo gucuruzwa abe aricyo kiwuhagarika ku isoko.

Binyura mu zihe nzira ngo hanzurwe ko umuti runaka ukurwa ku isoko? Abawukora se bigenda bite nyuma y’icyo cyemezo? Abagizweho ingaruka no kuwukoresha utujuje ibisabwa se bo bafashwa bate?”

Ni byinshi byibazwa kuri iyi ngingo, hari na benshi babona hari ibikwiye kongerwamo imbaraga ndetse n’ubufatanye ku mpande zinyuranye ngo byose bikorwe ntibisige ingingimira cyangwa urunturuntu mu bantu.

Ibitekerezo byatanzwe ku nkuru yanditswe na IGIHE ku wa 28 Nzeri 2020, yavugaga ko Rwanda FDA yahagaritse by’agateganyo umuti witwa Unibrol (Aminosidine Sulphate USP 250mg), kugira ngo ikore ubugenzuzi bw’ubuziranenge bwawo, byagaragazaga ko hari byinshi abantu badasobanukiwe kuri icyo cyemezo.

Umwe yagize ati “Nyagasani atube hafi, nonese umuganga yandikira umurwayi imiti idafite ubuziranenge koko, none ko njye nyirangije kandi nayandikiwe na muganga mbigire nte?”

Uwitwa Célestin na we yagize ati “Niwo najyaga nkoresha ahubwo mudusuzume niba utaratugizeho ingaruka, ahubwo uba warinjiye ute batarabanje kuwugenzura koko?”

Naho uwitwa Eric we yaragize ati “Amafaranga yatanzwe n’abawucuruza se yo ibyayo bizatangazwa ryari ngo bayasubizwe? Kuki bidatangarizwa rimwe, n’ihagarikwa ry’iyo miti?”

Kuva muri Nzeri, Rwanda FDA yahagaritse ku isoko imiti isukura intoki irimo Purell-instant hand sanitizer (60ml) ikorwa na BELLA Limited; Guard- hands sanitizers (30ml) ya KVMS Co Ltd; Lime Fresh hand sanitizer and dinfectant (isopropyl alcohol based)’ ukorwa n’Uruganda rwa ‘Lime Fresh Family Ltd na Pure Skin Stay Safe Hand Sanitizer ya African Buffalos Ltd.

Izi ni ingero z’imiti isukura intoki ivanwa ku isoko bitewe no kutuzuza ubuziranenge, uretse iyo miti isukura intoki hari n’indi ikoreshwa mu buvuzi na yo yagiye ikurwa ku isoko.

-  Inzira yo gukura umuti ku isoko

Ubusanzwe hari amabwiriza yashyizweho na Rwanda FDA agenderwaho kugira ngo uruganda runaka rukore umuti uzacuruzwa ku butaka bw’u Rwanda, hakaba hasabwa rero ko icyemererwa gucuruzwa ari ikiba kiyubahirije.

Buri gicuruzwa kiri muri icyo cyiciro cy’ibiribwa cyangwa imiti gicuruzwa mu Rwanda, kigomba kuba cyaragenzuwe kandi cyarahawe ibyangombwa ko cyujuje ubuziranenge kandi gikurikije amabwiriza.

Ni ukuvuga ko habanza kubaho kucyandikisha kugira ngo cyemererwe gutangira gucuruzwa, aho kibanza kugenzurwa, hakarebwa ibigikoze, ingano y’ibigomba kuba bikigize, hakamenywa niba nta ngaruka zindi gifite ku muntu, n’ibindi.

Ibyo iyo bikozwe bikurikije amabwiriza, byujuje ibipimo ngenderwaho, nibwo icyo gicuruzwa cyandikwa kigatangira gucuruzwa.

Rwanda FDA itangaza ko kugira ngo umuti runaka cyangwa ibiribwa bivanwe ku isoko, biba byavuye mu igenzura ikora isuzuma ubuziranenge bwabyo, ubundi hakanzurwa niba byujuje ibisabwa kugira ngo bikomeze bicuruzwe.

Guhitamo impagararizi (samples) zikorerwaho ubushakashatsi biba byavuye mu makuru Rwanda FDA yakira aturutse hirya no hino mu baguzi, harimo akemanga ubuziranenge bw’umuti runaka, ubundi bakazifata zigapimirwa muri laboratwari, ibisubizo bivuyemo bigashingirwaho hafatwa umwanzuro.

Aha birumvikana ko bishoboka ko igicuruzwa runaka (aha turavuga ku biribwa n’imiti) gishobora kuba cyarahawe uburenganzira bwo gutangira gucuruzwa ariko nyuma ukazasanga kiri mu byakuwe ku isoko.

Umuyobozi ushinzwe Igenzura n’Iyubahiriza ry’Ubuziranenge bw’Ibiribwa n’Imiti muri Rwanda FDA, Gisagara Alex, yabwiye IGIHE ko gukura umuti runaka ku isoko kandi wari waremerewe gucuruzwa, biterwa ahanini no gutezuka kw’abawukora, ahanini bashaka inyungu y’umurengera.

Yagize ati “Uyu munsi arayiduha yujuje standards ibipimo ngenderwaho cya gihe twamusuye ashaka kwandikisha igicuruzwa, ariko yajya gukora agakora ibitandukanye n’ibyo yasabiye. Rero birashoboka ko ikintu ushobora kuba waracyemereye, ejo wajya ku isoko ugasanga yagabanyije standards.”

Yakomeje avuga ko ibyo akenshi ababikora baba bashaka kubona inyungu y’umurengera, kuko kubahiriza ayo mabwiriza bitwara amafaranga, bityo ugabanyije ibipimo bituma n’ayo yakoreshaga agabanuka ugasanga inyungu ibaye nyinshi, nyamara ibyo akora bitujuje ubuziranenge.

Gisagara kandi yavuze ko Rwanda FDA iyo bakiriye amakuru akemanga ubuziranenge bw’igicuruzwa runaka (ibiribwa cyangwa imiti), basura nyiracyo bakagenzura ishingiro ry’ayo makuru.

Ati “Hari igihe umuteguza, nk’iyo ubona atari busibanganye ibimenyetso, hari n’igihe umutungura kugira ngo ikibazo ugisangeyo nk’uko cyarezwe.”

Icyo gihe bihutira gushyira icyo gicuruzwa mu kato ubundi bagafata impagararizi zigapimwa muri laboratwari kugira ngo harebwe ko cyujuje ibisabwa.

Gupima bitwara igihe gito cyangwa kinini bitewe n’ubushobozi, nko ku bipimirwa mu Rwanda, ibisubizo biboneka nko mu minsi itatu. Naho ibipimirwa hanze nk’imiti imwe n’imwe, igihe kiriyongera.

Iyo ibisubizo bigaragaje ko amakuru yavugaga ukuri wa muntu acuruza ibitujuje ubuziranenge cya gicuruzwa gihita kivanwa ku isoko, ndetse ababifite bagasabwa kubisubiza aho babiguze.

Igikurikiraho ngo ni ibihano bishobora gufatirwa nyir’ugukora igicuruzwa, birimo gucibwa amande n’ibindi, gusa ngo iyo habayemo ibinyuranya n’amategeko mpanabyaha, inzego z’ubutabera ni zo zibikurikirana.

-  Bigenda bite ku ruhande rw’abashoramari baba bahagarikiwe ibicuruzwa?

N’ubwo Rwanda FDA ivuga ko nk’uko amabwiriza yayo abiteganya, ko ibanza kuganira na ba nyir’uruganda rutunganya igicuruzwa runaka, hari abahagarikiwe ibicuruzwa bavuga ko rimwe na rimwe bidakorwa neza uko byakagombye.

Gasangwa Peterson uyobora Uruganda rwa Lime Fresh Family Ltd rukora imiti isukura, rwanakoze ‘Lime Fresh hand sanitizer and dinfectant, wakuwe ku isoko, yabwiye IGIHE ko na we asa n’uwatunguwe no guhagarikirwa umuti kuko ngo atari we wihereye impagaragarizi (samples) abapima.

Yavuze ko bamuhamagaye bamubwira ko baje kumusura bagasanga adahari kuko ngo batari bamuteguje, ubundi nyuma bamubwira ko nataboneka bitari bugende neza, ibyakurikiyeho nyuma ngo nibwo yabonye itangazo rivuga ko uwo muti wahagaritswe.

Yagize ati “Ntabwo bansuye ngo batware sample yanjye, ubwo sinzi aho bayikuye, ubundi njye ninjye wagombye kubihera sample, bakagenda bakayishyira muri laboratwari yabo, bakaduha ibisubizo, bakatubwira bati ntabwo yemerewe gukora muyikure ku isoko.”

Yongeyeho ko batakwiye kwihutira kuvana igicuruzwa ku isoko nyiracyo adafite amakuru, ahubwo ko bakwiye gupima igicuruzwa ari wowe ukibihereye, bakamuha ibisubizo, bakamubwira ibyo agomba gukosora ubundi bakazongera kugenzura ko yabikosoye.

Ati “Ni ibintu bagombye gutwara na buhoro, erega bakanigisha n’abantu, ababikora bakabafasha kubikora neza, njye nshobora kuba nziko ndi kubikora neza, ariko dufatanyije na bo twabikora neza kurushaho.”

-  Abaturage bo babibona bate?

Abaganiriye na IGIHE bavuze ko ubukangurambaga bukorwa iyo umuti runaka ukuwe ku isoko bushobora kuba butagera ku baturage bo hasi, bakaba bakomeza kuwukoresha, kuko bataba babwiwe ingaruka ushobora kubagiraho.

Muhonzire Sylvine utuye mu Karere ka Nyarugenge mu Mujyi wa Kigali, yagize ati “Abaturage bamwe bo hasi nkeka ko batabimenya, ahubwo bo bareba ibibahendukiye, ariko abasobanukiwe bo ntabwo bayigura iyo miti, barayireka kubera ko iba yabujijwe.”

Yongeyeho ati “Ariko n’abandi bo hasi bagenda babimenya ariko ntabwo baba babisobanukiwe neza, kenshi baba bareba ibibahendukiye, bakavuga bati ‘nta kica umutindi sha bajye bampa mfe kwitwarira.”

Ukurikiyimfura Léonce we yavuze ko yigeze kuva kugura imiti muri farumasi, atangira kuyinywa, bukeye yumva ngo yahagaritswe, ayihagarika adakize, biranamugora kubona iyo ayisimbuza yamukiza.

Yagize ati “Nahise mpagarika kuyinywa ntarakira, ubundi natangiye kwiruka mu mafarumasi mbaza niba nabona indi miti birangora, urumva ko byahise bintera ubwoba kuko nari nayinyweyeho.”

Aba baturage basanga icyo Rwanda FDA yakora ari ukongera imbaraga mu kumenyekanisha mu gihe bahagaritse umuti runaka.

Ukurikiyimfura yagize ati “Bakongera uburyo bamenyekanisha, bikabasha kugera ku bantu bose, bagakoresha itangazamakuru rigera ku bantu bose, kuko akenshi usanga bigira ingaruka ku bantu batabasha kugera kuri iyo miyoboro bakoresha bamenyekanisha, bakwiye kongera imbaraga mu kugera no ku baturage bo hasi.”

Muhonzire we yavuze ko icyo Rwanda FDA ikwiye kuba ikora ari ugufatanya n’abakora ibyo bicuruzwa bikaba byujuje ubuziranenge ariko na none bihendukiye umuturage.

Ati “Imiti itujuje ubuziranenge nyine bakwiye kuyikura ku isoko, ariko iyemewe bakayikora ku buryo ibiciro umuturage abasha kuyigondera, ikitujuje ubuziranenge bagikure ku isoko, ariko na none icyujuje ubuziranenge bareke kugihenda.”

Rwanda FDA ivuga ko ahanini abateshuka ku bipimo ngenderwaho byemewe bakora ibiribwa cyangwa imiti, baba bashaka kwigabanyiriza amafaranga bakoresha mu kubitunganya kugira ngo bazabone inyungu y’umurengera, cyangwa bizagere ku isoko bihendutse kurusha ibindi kandi ari uko bitujuje ubuziranenge.

Mu 2018 nibwo hemejwe ishyirwaho ry’Ikigo gishinzwe kugenzura ibiribwa n’imiti Rwanda FDA.

Inshingano zayo zirimo kugenzura imiti, inkingo, ibiribwa by’abantu n’amatungo byahinduriwe umwimerere n’ibindi bikomoka mu mubiri w’umuntu cyangwa itungo bikoreshwa mu buvuzi nk’imiti, ibyongera n’ibyongerewe intungamubiri, ibintu bihumanya, imiti ikomoka ku bimera, ibinoza kandi bisukura umubiri birimo umuti, ibikoresho byo mu buvuzi bw’abantu n’amatungo, itabi n’ibirikomokaho, imicungire y’imiti n’ibiribwa bitujuje ibisabwa, imiti ikorwaho igeragezwa ku bantu no ku matungo.

Harimo kandi kugenzura iyubahirizwa ry’amabwiriza y’ubuziranenge ajyanye no gukora, kubika, kugurisha, gukwirakwiza, gukoresha, gutumiza no kohereza mu mahanga, ibirango, ibipfunyiko n’ibyibanze bikoreshwa mu gukora ibigengwa n’iri tegeko, kugenzura ibinyabutabire bikoreshwa muri laboratwari n’ibikoreshwa mu gusukura no kwica udukoko kimwe n’inyubako zikorerwamo.

Hari kandi gutegura, kwemeza, no kumenyekanisha urutonde rw’ibiribwa n’imiti y’abantu n’amatungo kimwe n’ibindi bigengwa n’iri tegeko byahawe uruhushya rwo gushyirwa ku isoko, n’ibindi bitandukanye nk’uko biteganywa n’itegeko 003/2018 ryo ku wa 9/02/2018 rishyiraho Rwanda FDA.

Rwanda FDA imaze iminsi ihagarika cyane imiti isukura intoki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .