Amb. Deborah Banks yagiriye inama ababyeyi kumenya buri gihe ibyo abakobwa babo bahugiyemo

Yanditswe na Habimana James
Kuya 5 Ukuboza 2019 saa 04:32
Yasuwe :
0 0

Umuhuzabikorwa akaba n’Intumwa ya Leta Zunze Ubumwe za Amerika mu muryango Global Health Diplomacy, Amb. Deborah Banks, yavuze ko iyo uganirije umwana w’umukobwa ukanamenya icyo arimo gukora, bimugiraho ingaruka nziza bikanafasha umuryango we.

Amb. Deborah Banks yabigarutseho mu kiganiro cyagarukaga ku kubwiza ukuri abakiri bato, by’umwihariko abangavu n’abagore, ko aribyo byaba igisubizo cya virusi itera Sida ku mugabane wa Afurika.

Ni ikiganiro cyatanzwe muri gahunda z’Inama Mpuzamahanga yiga kuri SIDA n’izindi ndwara zandurira mu mibonano mpuzabitsina (ICASA) iteraniye i Kigali guhera tariki ya 1 Ukuboza kugeza kuwa 7 Ukuboza 2019.

Ishami ry’Umuryango w’Abibumbye ryita ku Bana, UNICEF, rivuga ko kugeza ubu buri cyumweru abangavu bagera ku bihumbi bitandatu bandura ubwandu bwa Virusi Itera Sida ku isi, imibare minini ikaba iri munsi y’Ubutayu bwa Sahara.

Amb. Banks avuga ko imbaraga z’abakiri bato iyo zihawe agaciro bitanga umusaruro, gushyira abangavu n’abagore muri izi gahunda bikaba ari ngombwa.

Agira ari “Iyo tuganirije abana b’abakobwa tukamenya ibyo barimo gukora, bitanga umusaruro kuri bo ndetse bikazamura imiryango yabo.”

Dr. Paula Mandeli uhagarariye UNAIDS, we avuga ko uburyo bwiza bwashyirwaho ari ugushyiraho gahunda nziza zo kurwanya Sida mu bakobwa n’abagore kandi hakabaho kumva abagenerwabikorwa.

Avuga ko abakobwa bakwiye kujya bungukira muri gahunda ziba zabashyiriweho mu guhangana n’iki kibazo cya virusi itera SIDA gikomeye guhitana benshi.

Ishami ry’Umuryango w’Abibumbye ry’ubuzima (OMS), rigaragaza ko abantu miliyoni 19.6 bafite ubwandu bwa virusi itera Sida mu gace ka Afurika y’u Burasirazuba n’Amajyepfo, muri aba, abarenga miliyoni imwe ni urubyiruko harimo abangavu barenga ibihumbi 600.

Amb. Deborah Banks avuga ko kuganiriza abana b'abakobwa ari ngombwa ngo umenye ibyo barimo gukora
Dr. Paula Mandeli yavuze ko abana b'abakobwa bakwiye kujya bashyirwa muri gahunda zibafasha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .