Abatuye mu Mujyi wa Kigali boroherejwe kwipimisha indwara zitandura

Yanditswe na Joy Monique Dukuze Umutesi
Kuya 12 Ukuboza 2019 saa 10:04
Yasuwe :
0 0

Umujyi wa Kigali ku bufatanye n’ikigo cy’igihugu gishinzwe ubuzima (RBC), bashyizeho gahunda yo gupima abaturage ku buntu indwara zitandura hagamijwe kubafasha kumenya uko ubuzima bwabo buhagaze bakanagirwa inama z’uko bazirinda.

Zimwe mu ndwara zitandura zirimo; diyabete, umuvuduko w’amaraso (hypertension), kanseri, indwara z’umutima, umubyibuho ukabije n’izindi.

Mu korohereza abatuye Umujyi wa Kigali kwipimisha izi ndwara zitandura, hashyizweho ahantu ho kuzipimira aho igikorwa cyatangiye kuwa 9 Ukuboza -15 Ukuboza 2019.

Mu Karere ka Kicukiro birakorerwa ku isoko rya Ziniya, muri Gasabo ni ku isoko rya Kimironko naho muri Nyarugenge ni ahazwi nka Car Free Zone.

Rwabukwaya Théogène, utuye mu karere ka Nyarugenge, Umurenge wa Muhima, wagendanaga umuvuduko w’amaraso ushobora kugera ku kigero cyo hejuru (Hypertension), avuga ko hari ibyo abashije kumenya bigiye kumufasha gukomeza kubungabunga ubuzima bwe anakangurira abandi kwipimisha hakiri kare.

Yagize ati “Hari ibyo najyaga nibwira, kumwe umuntu agenda akumva nta ndwara afite cyangwa umubiri we nta kibazo ufite, ariko ubungubu hari ibyo mbashije kumva bamaze kunsobanurira ko hari ikibazo mfite. Babashije no kumpa ingamba z’uko ngomba kwitwara, bambwiye kugabanya inzoga, isukari, n’umunyu.”

“Ubutumwa natanga ni uko buri muntu wese atakwirara ngo yumve ko umubiri we ntakintu kimurya ngo yumve ko ari muzima, na we akegera ibigo Nderabuzima cyangwa ahantu habereye igikorwa nk’iki akabasha na we kureba uko ubuzima bwe buhagaze.”

Mukasekuru Julienne, wasanze afite umubyibuho ukabije avuga ko asanzwe akora ibishoboka ngo agabanye ibiro, anasaba ko bashyirirwaho na gahunda yo gupimwa kanseri kuko na yo iri mu ndwara zugarije abatuye mu mijyi.

Yagize ati “Iki gikorwa nakijemo nishimye, bamfashe ibipimo byose basanga ndi muzima ariko basanze mfite ibiro byinshi bangira inama yo gukora siporo, nkagabanya amavuta, n’umunyu mwinshi. Ubusanzwe nageragezaga kugabanya ibiro ariko siporo ni yo numva izananira.

“Iyi gahunda ndayishima ariko icyo nifuza ni uko badushyiriraho na gahunda yo gupima kanseri kuko hari abo usanga barayirwaye bataragize amahirwe yo kuyipimisha mbere kandi ni indwara iduhangayikishije cyane.”

Ubushakashatsi bwakozwe n’ishami ry’umuryango w’Abibumbye ryita ku buzima (OMS) ndetse n’ikigo cy’igihugu gishinzwe ubuzima (RBC), bugaragaza ko umubare munini w’abibasirwa n’izi ndwara zitandura ari abo mu mijyi bitewe ahanini no kutita ku mirire.

Indwara zitandura zishobora kwirindwa hitabwa cyane ku mirire, gukora siporo, kurya imbuto, kureka kunywa inzoga n’itabi.

Indwara zitandura zica abantu miliyoni 38 ku isi buri mwaka. 3/4 byabo bangana na miliyoni 28 ni abo mu bihugu biri mu nzira y’amajyambere. Miliyoni 17 ngo baba bari munsi y’imyaka 70.

Indwara zihitana benshi ni umutima bangana na miliyoni 17.5, kanseri yo ihitana miliyoni 8.2, indwara z’ubuhumekero miliyoni enye, naho diyabete yo ikaba ihitana miliyoni 1.5.

Hatagize igikorwa mu mwaka wa 2030, muri Africa y’Uburasirazuba abaturage 42% bashobora kwicwa n’izi ndwara bavuye kuri 25%.

Bamwe mu bitabiriye igikorwa cyo kwisuzumisha indwara zitandura
Mukasekuru avuga ko yasanze afite umubyibuho ukabije
Rwamukwaya yagendanaga umuvuduko w'amaraso atabizi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza