Abarenga miliyoni ebyiri bapfa buri mwaka kubera serivisi mbi z’ubuvuzi

Yanditswe na IGIHE
Kuya 16 Nzeri 2019 saa 10:09
Yasuwe :
0 0

Ishami ry’Umuryango w’Abibumbye ryita ku buzima (OMS), ryasabye ko hakorwa ibishoboka byose mu guca burundu serivisi mbi zihabwa abarwayi kuko ari kimwe mu bihitana miliyoni z’abantu buri mwaka.

OMS yabisabye mu gihe kuri uyu wa Kabiri tariki 17 Nzeri hizihizwa umunsi mpuzamahanga wo kwita ku mutekano w’umurwayi.

Abantu bararwara bakajya kureba abaganga babo cyangwa bakajya kwa muganga bafite icyizere cyo kwakirwa neza bagahabwa ubufasha n’imiti bibavura, gusa ikibabaje ni uko hari ubwo bakirwa mu buryo bubahuhura aho kubavura.

Raporo ya OMS igaragaza ko umurwayi umwe mu 10 yakirwa nabi mu bihugu byateye imbere naho miliyoni 134 mu bihugu biri mu nzira y’amajyambere n’ibifite ubukungu buciriritse bakakirwa nabi, byose bigatuma abagera kuri miliyoni 2.6 buri mwaka bicwa no kutitabwaho uko bikwiye. Izi mpfu zose zishobora kwirindwa.

Umuhuzabikorwa ushinzwe umutekano w’abarwayi muri OMS, Neelam Dhingra-Kuram, avuga ko ibihungabanya umutekano w’abarwayi bituruka mu kwibeshya mu kuvumbura indwara, gutanga imiti itari yo, gukoresha nabi imiti, kubaga nabi ndetse n’izindi ngaruka zifitanye isano n’ubuvuzi umurwayi yahawe.

Ati "Ariko impamvu nyamukuru y’uku kubura k’umutekano w’umurwayi ni ibikorwa remezo byo mu rwego rw’ubuzima bidahagije ndetse n’umuco wo kutita ku barwayi. Ibi bivuze ko ubuyobozi buba bujenjetse. Kubura itumanaho no kutigira ku makosa yabaye”.

Dhingra-Kuram avuga ko abakozi mu nzego z’ubuzima bashishikarizwa gutangaza amakosa yabaye ntibagire ubwoba bwo kuryozwa ko bayatangaje.

Uretse kuba abantu batakariza ubuzima mu kutita ku barwayi, hari n’igihombo cya tiriyoni z’amadolari Isi ihomba buri mwaka. OMS ivuga ko amakosa mu bijyanye n’ubuvuzi yonyine ahombya Isi abarirwa muri miliyari 42 z’amadolari ku mwaka.

OMS ivuga ko inyigo yakorewe muri Leta zunze Ubumwe za Amerika yagaragaje ko impinduka mu kwita ku murwayi zatumye hazigamwa miliyari 28 z’amadolari mu bitaro hagati ya 2010 na 2015.

Serivisi mbi zihabwa abarwayi zihitana ubuzima bwa benshi buri mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza